جۇما, 5 ناۋرىز 2021
انە، كوردىڭ بە؟ 6474 23 پىكىر 25 جەلتوقسان, 2018 ساعات 12:29

قازاقتى دەپورتاتسيالاۋعا قۇمار سوتتىڭ قاۋقارى پەرەگۋداعا جەتپەي وتىر

كەشە الماتى قالاسىنداعى بوستاندىق اۋدانىندا سوت پروتسەسسى ءوتتى. قازاقتار قازاقشا سويلەگەنى ءۇشىن قازاق قىزى اسەل نازارباەۆانى سوققىعا جىققان رەسەي ازاماتى ديانا پەرەگۋدانى ەلدەن الاستاۋ (دەپورتاتسيالاۋ) ماسەلەسى قارالدى.

انىعىن ايتقاندا، قارالعان جوق. سوت وتىرىسى باستالماي جاتىپ اياقتالدى. بۇگىن سول تۋرالى جازامىز.

10-جەلتوقسان كۇنى قابىلدانعان شەشىم بار. ول بويىنشا الماتى قالاسىنداعى بوستاندىق اۋداندىق سوتىنىڭ سۋدياسى مەزگىلباەۆا گ.ە الماتى قالالىق ىشكى ىستەر دەپارتامەنتىنىڭ ارىزى بويىنشا ازاماتتىق ءىس ماتەريالدارىمەن تانىسىپ شىققان. ءسويتىپ، قر ازاماتتىق پروتسەسسۋالدىق كودەكستىڭ (اپك) 382, 268, 269 باپتارىنا سۇيەنە وتىرىپ، قر زاڭنامالارىن بۇزعانى ءۇشىن ديانا پەرەگۋدانى ەلدەن شىعارۋ ءىسىن 24-جەلتوقسانعا، ياعني كەشەگى كۇنگە، ساعات 15:40-قا بەلگىلەگەن.

ءبىزدىڭ بىلۋىمىزشە بۇل اشىق سوت پروتسەسسى بولاتىن، ونىڭ ۇستىنە ازاماتتىق پروتسەسس. سوندىقتان ديانانى ەلدەن قۋ ماسەلەسى قارالاتىن بۇل سوتقا ءبىز دە قاتىسقاندى ءجون كوردىك. وربيتا 2 ىقشاماۋدانىنا (بوستاندىق اۋداندىق سوتىنا) باردىق. سوتقا بارعان ەكى ادامنىڭ ءبىرى - اسەل نازارباەۆا، ەكىنشىسى - نۇرگەلدى ابدىعانيۇلى (Abai.kz اقپاراتتىق پورتالىنىڭ شەف-رەداكتورى، ياعني وسى جولداردىڭ اۆتورى).

ءبىزدىڭ كورگەنىمىز...

ءبىز 15:35-تە باردىق. ەسىكتىڭ تۇسىندا جول سىلتەيتىن ەشكىمدى تاپپاعان سوڭ، سوت عيماراتىن ارالادىق. سۋديا مەزگىلباەۆانىڭ پروتسەسسى قاي زالدا ءوتىپ جاتقانىن سونداعى جۇرتتاردان سۇراستىردىق.

ءبىز سوت عيماراتىنىنىڭ ىشىنەن ديانا پەرەگۋدانىڭ ادۆوكاتىن جولىقتىردىق. جانار ىسماعۇلوۆا (نەمەسە يسماگۋلوۆا) دەيتىن كەلىنشەك جانىمىزدان اسىعىس-ۇسىگىس ءوتتى دە كەتتى.  ال ديانانىڭ ءوزى تۇگىلى كولەڭكەسى كورىنبەدى. ارىز بەرۋشى الماتى قالالىق ءىىد وكىلدەرىن دە كوزىمىز شالعان جوق.

ءسويتىپ جۇرگەندە ەسىك تەلمىرگەن ەكەۋىمىزگە بوستاندىق اۋداندىق سوتىنىڭ قىزمەتكەرى جولىعىپ، سوت وتىرىسىنىڭ اياقتالعانىن ايتتى.

بىزگە تۇسىندىرگەنى بويىنشا...

جاڭاعى جىگىت ديانا پەرەگۋدانى ەلدەن دەپورتاتسيالاۋ ءىسى بويىنشا وتكەن سوت وتىرىسىنىڭ حاتشىسى - ەرنىس الماس ەركىنۇلى دەيتىن ازامات ەكەن. سونىڭ ايتۋىنشا، سوت وتىرىسى كەيىنگە شەگەرىلگەن. سوتقا ديانا پەرەگۋدانىڭ ادۆوكاتى عانا قاتىسقان. ءوزى كەلمەگەن. ال ءبىزدىڭ كوزىمىزگە كورىنبەگەن الماتى قالالىق ءىىد وكىلدەرى سوتقا قاتىسىپتى.

بۇل اشىق سوت پروتسەسسى. وعان كەلىپ قاتىسۋعا، سوت وتىرىسىن تىڭداۋعا بولادى. ال اسەل نزارباەۆانىڭ سوت وتىرىسىنا قاتىسۋ تۋرالى ءۇش رەت بەرگەن ءوتىنىشىنىڭ نە ءۇشىن ەسكەرىلمەگەنى جايلى حاتشى الماس ەركىنۇلى مۇلدە بىلمەيتىن بولىپ شىقتى.

«كەلەسى سوت وتىرىسى 26-جەتوقسان كۇنى ساعات 11:00-دە بولادى. سوت وتىرىسىنا قاتىسۋ ءۇشىن 10 مينۋت بۇرىن كەلىڭىزدەر. قالعان سۇراقتارىڭىزدى جازباشا جولداڭىزدار» دەدى الماس ەركىنۇلى.

كەشەگى سوتتىڭ قورىتىندىسى

كەشەگى سوت وتىرىسى اينالاسى 5-10 مينۋتتىڭ ىشىندە، باستالماي جاتىپ اياقتالدى. دالىرەك ايتساق، كەيىنگە شەگەرىلدى. ال وعان قاتىسۋعا بارعان اسەل ەكەۋىمىز سوت زالىنا كىرىپ تە ۇلگەرمەدىك. ديانا جوق، دۆد-نى دا كورگەن جوقپىز.

سوندا قالاي؟  جاۋاپكەر، ونىڭ ۇستىنە وزگە ەلدىڭ ازاماتى، قىلمىس جاساعان، ونىسىن سوت دالەلدەگەن، ايىپتاۋشى ۇكىم شىعارعان ازاماتتىڭ ءىسى قارالىپ جاتسا (جاي ءىس ەمەس، ەلدەن قۋ تۋرالى ءىس), ونىڭ سوت وتىرىسىنا قاتىسپاۋىنا بولا ما؟

بولادى ەكەن-مىس. جاڭاعى الماس ەركىنۇلى دەيتىن پروتسەسس حاتشىسى ايتتى. «بۇل قىلمىستىق ءىس ەمەس، ازاماتتىق ءىس» دەدى بىزگە.  وسىمەن ءتامام. كەلەسى سوت 26-جەلتوقساندا بولادى.

ەندى ديانا پەرەگۋدانىڭ بۇعان دەيىنگى جاساعان قىلمىسى تۋرالى ايتايىق.

ەستەرىڭىزدە بولسا بيىلعى جىلدىڭ 5-ءساۋىرى كۇنى بوستاندىق اۋداندىق سوتىندا قازاق تىلىنە قاتىستى سوت پروتسەسسى وتكەن. ول سوت وتىرىسىنىڭ ەگجەي-تەگجەيى Abai.kz اقپاراتتىق پورتالى جاريالاعان «قازاقتار قازاقشا سويلەگەنى ءۇشىن... قازاق قىزى سوققىعا جىعىلعان» اتتى ماقالادا باياندالعان. بولعان جايدى قايتا بايانداپ جاتپايىق، تىنىسىپ شىعامىن دەگەن وقىرمان بولسا، سىلتەمە مىنە: https://abai.kz/post/68453

اۋەلى سوت پروتسەسسىنىڭ نەگىزگى فيگۋرانتتارى جايلى: جابىرلەنۋشى – اسەل نازارباەۆا. ۇلتى قازاق، قازاقستاندا تۋىپ-وسكەن. قازىر دە قازاقستاندا تۇرادى. ال جاۋاپكەر – ديانا پەرەگۋدا دەيتىن كەلىنشەك. قولىندا ۇستاعانى رەسەيدىڭ قىزىل پاسپورتى. ءيا، رەسەي ازاماتى.

ناپاقاسىن، نانىن قازاق جەرىندە تاۋىپ جۇرگەن پەرەگۋدا ديانا مەن اسەل نازارباەۆا اراسىنداعى جانجال نەدەن باستالعان؟

وزگەلەرگە وكتەم سويلەپ ۇيرەنىپ قالعان، ويتپەسە وتتەرى ءىسىنىپ، ولەردەي بۇلقان-تالقان بولاتىن، يمپەريالىق سانادان ارىلماعان، ارىلۋدى ارماندامايتىن، قايتا اڭساعان ۇستىنە اڭساي تۇسەتىن ورىس شوۆينيستەرىنىڭ وتانى -  رەسەيدىڭ باسى ءبۇتىن رەزيدەنتى – ديانا دەيتىن دولىگۇل قازاق جەرىندە بايبالام سالىپ، بۇلىك شىعارعان ەدى. ديانا – ءوزارا انا تىلدەرىندە، ياعني قازاقشا سويلەسكەن ساتۋشىلاردى سالا-قۇلاش تىلىمەن تىلدەپ، كەمسىتە سويلەپ، كەكىرەيە كۇلگەن. ولارعا اراشا تۇسپەك بولعان اسەل نازارباەۆاعا كۇش قولدانىپ، قول جۇمساعان. اياۋسىز تەپكىنىڭ استىنا الىپ، بالاعاتتاعان. قازاقستان رەسپۋبليكاسىنىڭ مەملەكەتتىك ءتىلىن، قازاق ءتىلىن – «نەپونياتنىي يازىك» دەپ كەمسىتكەن. بۇنىڭ بارلىعى سوتتا دالەلدەندى.

ءىستى سۋديا – كۆان ەلانا روبەرتوۆنا دەيتىن كىسى جۇرگىزگەن ەدى. سوت پروتسەسسىنىڭ اۋانى بۇزاقىلىق بولعانىمەن، ماسەلەنىڭ ءتۇبى قازاق تىلىنە كەلىپ تىرەلەدى.

ال بەلگىلى زاڭگەر ابزال قۇسپان اسەل مەن قازاق ءتىلىنىڭ مۇددەسىن قورعاپ، اقىرى ءبىراز جىل بۇلىڭعىرلانىپ تۇرعان بۇل ءىستى اياعىنا شىعارعان بولاتىن. سوتتا اسەل جەڭدى. اسەلمەن بىرگە قازاق ءتىلى جەڭدى. 13-ءساۋىر كۇنى Abai.kz اقپاراتتىق پورتالىندا «اسەلدىڭ جەڭىسى – قازاق ءتىلىنىڭ جەڭىسى!» اتتى ماقالا جاريا بولدى.

سول كۇنى وقىلعان سوت ۇكىمىنىڭ مازمۇنى بىلاي: ديانا پەرەگۋدا قازاقستان رەسپۋبليكاسىنىڭ قىلمىستىق كودەكسىنىڭ 293 بابى، 1-تارماعى بويىنشا كىنالى دەپ تانىلدى. 2 جىلعا شارتتى تۇردە سوتتالدى. جاۋاپكەر ديانا پەرەگۋدا جابىرلەنۋشى اسەل نازارباەۆاعا 1 ميلليون تەڭگە كولەمىندە ماتەريالدىق جانە مورالدىق شىعىن وتەپ بەرەتىن بولدى.

پەرەگۋدانىڭ جاساعان قىلمىستىق ءىس-ارەكەتى – 2016 جىلدىڭ جەلتوقسان ايىندا قر تاۋەلسىزدىگىنىڭ 25 جىلدىعىنا وراي جاريالانعان امنيستياعا سايكەس كەلگەندىكتەن جازاسى جەڭىلدەتىلدى.

سوت ۇكىمى بويىنشا كىنالى دەپ تانىلعان ديانا پەرەگۋدا وزىنە مىندەتتەلگەن ماتەريالدىق جانە مورالدىق شىعىندى تولىقتاي وتەپ بولدى.

كەيىن اسەل مەن ابزال الماتى قالالىق ىشكى ىستەر دەپارتامەنتىنە ارىز جازىپ، ديانا پەرەگۋدانى قازاقستاننان دەپورتاتسيالاۋدى تالاپ ەتكەن.

ول بويىنشا قالالىق ءىىد ارىز بەرىپ، كەشە ديانانى قازاقستاننان قۋ ءىسى قارالۋى كەرەك ەدى. كەشەگى سوتتىڭ بارىسى قالاي وربىگەنىن جوعارىدا ايتتىق.

 پەرەگۋدانى قازاقستاننان دەپورتاتسيالاۋ ءىسىن اياعىنا شىعارماي قويمايمىز

ابزال قۇسپان، زاڭگەر:

- ماعان دەيىن بۇل ىسپەن ءۇش ادۆوكات اينالىسقان. ال ءبىز ەڭ باستىسى 9 اي بويى دۇرىس تەرگەلمەي، قايتا-قايتا قىسقارتىلىپ، سوتقا جەتپەي قالىپ جاتقان ىسكە كىرىسىپ، سوتقا جەتكىزىپ، سوتتا ايىپتاۋ ۇكىمىن شىعارتقىزدىق.

شىندىعىنا كەلسەك، دياناعا ءوزىمىزدىڭ جەرگىلىكتى قازاقتار تاراپىنان ناقتى كومەكتەر كورسەتىلدى. ول ديانانى ەكى قازاق ازاماتىنىڭ قورعاعانىن ايتپاي-اق، قويايىن، جارايدى. بىراق، بىزگە قارسى استىرتىن جۇمىس جاساپ، ديانانى قورعاعان ادامدار بولدى. جانە ول ادام بيلىكتەگى ىقپالدى ادامداردىڭ ءبىرى بولسا كەرەك، الماتى ءىىد-نە وتە قاتتى ءسوزى ءجۇردى. اقىرىندا ءبىز استاناداعى ءىىم مەن باس پروكۋراتۋرانىڭ ارالاسۋىنان كەيىن عانا بۇل ءىس سوتقا جەتتى.

سوتتا دا ءبىراز قيىندىقتار بولىپ، اقىرى كىنالى دەپ تانىلدى. شارتتى جازاعا كەسىلدى. ودان مورالدىق جانە ماتەريالدىق شىعىن رەتىندە 1 ميلليون تەڭگە وتەماقى وندىرىلگەن بولاتىن. ونىڭ ءوزىن ءبىز ءماجبۇرلى تۇردە ورىنداتتىق. سەبەبى، ديانانىڭ بەلگىسىز كومەكشىلەرى، قولداۋشىلارى وعان دجيپ (ماركاسىن بىلمەيمىن) كولىگىن الىپ بەرگەن. ءبىز سونى ءبىلىپ، ارەستكە قويعىزدىق. سودان كەيىن عانا ديانا 1 ميلليون تەڭگەنى وتەپ بەردى. ونىڭ ءوزى بىرنەشە ايعا سوزىلدى. اۋەلى ءوز ەركىمەن تولەۋگە 1 اي ۋاقىت بەرىلدى. ونى تولەمەگەن سوڭ، ءىس سوت ورىنداۋشىلارىنا ءتۇستى. سوت ورىنداۋشىلارى ونىڭ كولىگىنە ارەست قويدى. ءسويتىپ بارىپ ول الگى سومانى وتەپ بەردى.

سودان كەيىن، 1 اي تۋراسىندا الماتى قالالىق ءىىد-نە ءبىز جازباشا ارىز تۇسىردىك. قولدانىستاعى زاڭناما تالاپتارىنا سايكەس، قر تەرريتورياسىندا ءبىر رەت نەمەسە ەكى نە ودان كوپ مارتە قىلمىستىق نەمەسە اكىمشىلىك قۇقىق بۇزۋشىلىق ارەكەتتەر جاساعان شەتەل ازاماتتارى قر تەرريتورياسىنان شىعارىلادى. بۇل ديانا بۇعان دەيىن دە اكىمشىلىك قۇقىق بۇزۋشىلىق جاساعانىن ءبىز انىقتادىق. ودان بولەك، بىزگە قاتىستى، ناقتى قوعامعا قاۋىپتى قىلمىستىق ءىس جاساپ وتىر. قىلمىستىق ىستەردى ابايسىزدا جانە قاساقانا جاسالعان قىلمىستىق ىستەر دەپ ەكىگە بولەتىن بولساق، بۇل قاسقانا جاسالعان قىلمىستىق ءىس بولىپ سانالادى. بۇزاقىلىق قاساقانا ءارى قوعامعا قاۋىپتى قىلمىستىق ىستەر قاتارىنا جاتادى. سول سەبەپتى دە، الماتى قالالىق ءىىد تالاپ-ارازى ءسوزسىز ورىندالۋى ءتيىس.

مىسال رەتىندە ايتا كەتەيىن، قازىر ءوزىم اينالىسىپ جاتقان تاعى ءبىر ءىس، ول – بالاسى قازاقستانعا كەلىپ، «ەكى رەت اكىمشىلىك ءىس جاسادى» دەپ قىتايعا قايتارىلىپ جىبەرگەن اتا-انانىڭ ءىسى. ونىڭ وتباسى، كىشكەنتاي ءسابيى وسى جاقتا قالدى. اتا-اناسى زار جىلاپ وتىر. جالعىز بالاسى ەكەن. سول جالعىز بالاسىن قىتايعا قايتارىپ جىبەردى.

ءبىز قىتايدان، موڭعوليادان، وزبەكستاننان كەلگەن ۇلتى قازاق ازاماتتاردى ءىسى سوتقا جەتپەي، قىسقارتىلسا دا، اكىمشىلىك قۇقىق بۇزدى دەپ، دەپورتاتسيالاپ جاتىرمىز. ال ەندى مىنا رەسەي ازاماتى ديانانى قىلمىسى سوت ارقىلى دالەلدەنسە دە، ونى دەپورتاتسيالاۋعا دارمەنسىزدىك تانىتىن وتىرمىز.

ءبىز وسى ۋاقىتقا دەيىن قىرىعىنا شىدادىق قوي. ديانا پەرەگۋدانى قازاقستاننان دەپورتاتسيالاۋ ءىسىن اياعىنا شىعارماي، ديانانى ەلدەن شىعارماي قويمايمىز.

وزگە ەلدىڭ ازاماتى قازاق ءتىلىن «نەپونياتنىي يازىك»، دەپ، ال ادامدارىن «مامبەتى» دەپ كەمسىتكەن...

اسەل نازارباەۆا، ديانا سوققىعا جىققان قازاق قىزى:

- كەشەگى سوتتى ءوزىڭىز كوردىڭىز. نە ماسقارا مىناۋ؟ وزگە ەلدىڭ ازاماتى، قازاقستاندا ءبىر ەمەس بىرنەشە رەت قۇقىق بۇزۋشىلىق ىستەر جاساعان. ونى جانە سوت دالەلدەپ، شارتتى جازاعا بولسا دا سوتتاعان.

ەندى سونداي ادامدى قازاقستاننان دەپورتاتسيالاۋدى نەگە سونشا سوزىپ وتىرعانىن تۇسىنسەم بۇيىرماسىن.

ديانا بۇعان دەيىن دە ءبىراز ۋاقىت رەسەيدە، كەمەر وبلىسىندا تۇرعان. ءوزى مەملەكەتتىك ءتىلىن «نەپونياتنىي يازىك»، دەپ، ال ادامدارىن «مامبەتى» دەپ مەنسىنبەيتىن قازاقستانعا سونشالىق ءتىس-تىرناعىمەن جابىسىپ، كەتكىسى كەلمەۋىنىڭ جالعىز سەبەبى بولسا كەرەك. ەرتەڭ رەسەيگە بارسا، ول جاقتا ديانا ەشكىم ەمەس.

ەكەۋىمىزدىڭ ارامىزدا بولعان كەزەكتى ءبىر اپپەلياتسيالىق سوتتا «زدەس ۋششەمليايۋت موي پراۆا» دەپ جىلارمان بولعان ەدى. اقىرى ونىڭ قۇقى بۇزىلىپ، ءوزى «ءجابىر كورىپ» جۇرسە، كەتپەي مە، رەسەيگە؟!

ءبىز وزگە ەلدىڭ ازاماتى قازاقستاندا بىرنەشە رەت قىلمىس جاساسا دا ونى دەپورتاتسيالاۋعا اسىقپايمىز...

ءتۇيىن. ديانا پەرەگۋدا رەسەي ازاماتى. قازاقستان رەسپۋبليكاسىنىڭ زاڭنامالارىن بىرنەشە مارتە بۇزعان. كونستيتۋتسيادا انىق جازىلعان قر مەملەكەتتىك ءتىلى – قازاق ءتىلىن «نەپونياتنىي يازىك» دەپ كەمسىتىپ، ونىڭ زاڭدى ازاماتتارىن «مامبەتى» دەگەن. ودان قالسا، قر ازاماتىن اياۋسىز تەپكىلەپ، سوققىعا جىققان. بۇنىڭ بارلىعىن سوت راستاپ، وعان ايىپتاۋ ۇكىمىن شىعارعان. ءسويتىپ شارتتى تۇردە 2 جىلعا سوتتاعان. ەندى وسىنداي ادامدى دەپورتاتسيالاۋعا نە كەدەرگى؟

دەپورتاتسيا – مەملەكەتتەن تۇرعانى ماجبۇرلەپ شىعارۋ دەگەن ءسوز. كوبىنە دەپورتاتسيا باسقا مەملەكەتكە شىققان شەتەل ازاماتتارىنا نەمەسە ازاماتتىعى جوق ادامدارعا قولدانىلادى.

ديانا وزگە مەملەكەتتىڭ ادامى.

قر 2014 جىلعى 3-شىلدەدەگى № 226-V قرز قىلمىستىق كودەكسىنىڭ «جازا تۇرلەرى» دەپ اتالاتىن 40-بابىنىڭ 3 تارماعىندا «قىلمىستىق قۇقىق بۇزۋشىلىق جاساعانى ءۇشىن كىنالى دەپ تانىلعان ادامعا نەگىزگى جازامەن قاتار مىناداي قوسىمشا جازالار:

-شەتەلدىكتى نەمەسە ازاماتتىعى جوق ادامدى قازاقستان رەسپۋبليكاسىنىڭ شەگiنەن تىسقارى جەرگە شىعارىپ جiبەرۋ قولدانىلۋى مۇمكىن»، دەپ،

ال «شەتەلدىكتى نەمەسە ازاماتتىعى جوق ادامدى قر شەگىنەن تىسقارى جەرگە شىعارىپ جىبەرۋ» دەپ اتالاتىن 51-باپتىڭ 1-تارماعىندا: «شەتەلدىكتى نەمەسە ازاماتتىعى جوق ادامدى قازاقستان رەسپۋبليكاسىنىڭ شەگiنەن شىعارىپ جىبەرۋ وسى ادامنىڭ قازاقستان رەسپۋبليكاسىنىڭ اۋماعىنا كىرۋىنە بەس جىل مەرزىمگە تىيىم سالۋ بەلگىلەنە وتىرىپ، ماجبۇرلەۋ تارتىبىمەن ورىندالادى», 2-تارماعىندا: «شەتەلدىكتى نەمەسە ازاماتتىعى جوق ادامدى قازاقستان رەسپۋبليكاسىنىڭ شەگىنەن تىس جەرگە شىعارىپ جىبەرۋ جازانىڭ قوسىمشا ءتۇرى رەتىندە تاعايىندالۋى مۇمكىن جانە جازانىڭ نەگىزگى ءتۇرى وتەلگەننەن كەيىن ورىندالادى»، دەپ تايعا تاڭبا باسقانداي انىق جازىلعان.

ديانا پەرەگۋدا ءوز جازاسىن وتەپ بولعانىن جوعارىدا ايتتىق. وزىنە مىندەتتەلگەن ماتەريالدىق جانە مورالدىق وتەماقىنى دا تولىق وتەپ بولدى. ەندى نە كەدەرگى؟

ءسوز سوڭىندا بيىل الماتى اۋەجايىندا بولعان مىنا ءبىر وقيعانى مىسال ەتكەندى ءجون كوردىك.

2018 جىلدىڭ 3-مامىرى كۇنى الماتى اۋەجايىنىڭ شەكارالىق باقىلاۋ قىزمەتى وتباسىمەن بىرگە ەلگە كەلگەن جايناگۇل عاجاپقىزىن «ورالمان كۋالىگى جارامسىز دەپ تانىلعان» دەگەن سىلتاۋمەن اينالاسى 3 ساعاتتىڭ ىشىندە ەلدەن دەپورتاتسيالاعان ەدى. جايناگۇلدىڭ كۇيەۋى نۇرسەيىت تولەگەنۇلى قر ازاماتى، ولاردىڭ 2 جاستاعى ۇلدارى اقجول نۇرسەيىتۇلى قر ازاماتى ەدى. وزىندە  ورالمان كۋالىگى بولعان. ول تۋرالى Abai.kz اقپاراتتىق پورتالى العاش بولىپ ماسەلە كوتەرگەن: https://abai.kz/post/69884

https://abai.kz/public/index.php/post/70645 

سول كەزدە ەكىقابات جايناگۇلدى جاعدايىنا قاراماي ەكى جاسار ۇلىنان ايىرىپ، ەلدەن قۋعان ەك. نەمەسە وتباسى بالا-شاعاسى ءۇشىن شەكارا بۇزىپ كەلگەن سايراگۇلدى دە سۇيرەلەي الىپ ەلدەن قۋماق بولدىق. ەل بولىپ، جۇرت بولىپ اقىرى سايراگۇلگە «پانا ىزدەۋشى تۇلعا» دەيتىن كۋالىكتى ازەر بەردىك. سايراگۇل ءنامى قازاق بولا تۇرا، قازاقستاننىڭ ازاماتتىعىن، ازاماتتىق تۇگىلى بوسقىن مارتەبەسىن ءالى كۇنگە العان جوق.

سايراگۇلدىڭ دە، جايناگۇلدىڭ دە ۇلتى قازاق. قازاق قىزدارىن شەتكە قۋعانعا ءالى جەتكەن ءبىزدىڭ قۇزىرلى ورگاندار بوتەن ەلدىڭ ازاماتى، ءوزى قىلمىسكەر ديانا پەرەگۋدانى ەلدەن الاستاۋعا قۇلىقسىزدىق تانىتىپ وتىرعانى قالاي؟

نۇرگەلدى ابدىعانيۇلى

Abai.kz

23 پىكىر