سارسەنبى, 23 قىركۇيەك 2020
COVID-19 قازاقستاندا. جۇقتىرعاندار — 107450. جازىلعاندار — 102219. قايتىس بولعاندار — 1699
«سوقىر» فەميدا 3169 25 پىكىر 21 جەلتوقسان, 2018 ساعات 07:28

ق.توقاەۆ: ۇكىمەتتىڭ جۇمىسى وتە ناشار

سەناتقا زاڭ جوبالارىنىڭ كەلۋىندە بىرقالىپتى جۇيە جوق. شىن مانىندە، وتە سالماقتى ءارى كۇردەلى زاڭ جوبالارى بويىنشا قىسقا مەرزىمدە جۇمىس ىستەۋگە تۋرا كەلەدى. ءتيىستى تۇزەتۋلەر اسا قاۋىرت، قاربالاسپەن ەنگىزىلەدى. ءبىزدىڭ ۇسىنىسىمىزدى ۇكىمەت نازارىنا الادى دەپ ويلايمىن. ۇكىمەتتىڭ وكىلدىگىنە قاتىستى ايتارىم، سىزدەرگە جۇمىستى ىستەۋ كەرەك قوي. سىزدەردىڭ جۇمىستارىڭىز وتە ناشار.

سەنات توراعاسى بۇگىنگى سەنات وتىرىسىندا ۇكىمەتكە وسىنداي ەسكەرتۋ جاسادى.

«زاڭ جوبالارىن سەناتتىڭ قاراۋىنا ۇسىنۋ مەرزىمدەرىنە قاتىستى وسىنداي كەلەڭسىز جاعدايلاردىڭ قايتا ورىن الۋىنا جول بەرمەۋ قاجەت. وسى ماسەلەگە ۇكىمەتتىڭ نازارىن ايرىقشا اۋدارامىن»، - دەدى قاسىم-جومارت توقاەۆ.

بۇگىنگى وتىرىستىڭ كۇن تارتىبىنە وتە ماڭىزدى زاڭ جوبالارى ەنگىزىلىپ وتىرعانىن، ونىڭ بەسەۋى ەلباسىنىڭ جولداۋلارىندا ايقىندالعان ماقساتتاردى ورىنداۋ ءۇشىن ازىرلەنگەن زاڭ جوبالارى ەكەنىن ايتقان ق. توقاەۆ «ەلباسىنىڭ تاپسىرمالارىن ورىنداۋعا جىل باسىنان بەرى جەتكىلىكتى ۋاقىت بولعانىنا قاراماستان، بىرنەشە كۇردەلى زاڭ جوبالارى سەناتقا جىل سوڭىندا عانا ءبىر پاكەتپەن كەلىپ ءتۇستى. سەنات دەپۋتاتتارى زاڭ جوبالارى ماڭىزدى بولعاندىقتان، اسا قىسقا مەرزىمدە قاراپ، تالقىلاۋعا ءماجبۇر بولدى»، - دەدى.

جىل سايىن قايتالاناتىن مۇنداي جاعداي قابىلداناتىن زاڭداردىڭ ساپاسىنا وڭ ىقپال ەتپەيتىنى بەلگىلى. مۇنداي كەلەڭسىز جاعدايلاردىڭ قايتا-قايتا ورىن الۋىنا جول بەرمەۋ قاجەتتىگىنە ۇكىمەتتىڭ نازارىن ايرىقشا اۋدارعان ق.توقاەۆ «ماڭىزدى زاڭ جوبالارى بويىنشا ۇكىمەت پارلامەنت پالاتالارىمەن الدىن الا ۇيلەسىمدى جۇمىس كەستەسىن بەلگىلەپ العانى دۇرىس»، - دەپ ەسكەرتتى.

ادىلبەك قابا

Abai.kz

25 پىكىر