- بۇگىنگى كۇنى قازاقستانعا 39 وتباسى قايتارىلدى. ول 39 وتباسىندا 91 بالا بار. بۇل 18 جاسقا دەيىنگى بالالار. ول بالالارمەن جۇمىس ىستەپ جاتىرمىز. وڭىرلەردەن توعىز ورتالىق اشتىق. وسى ورتالىق ارقىلى بالالاردى الەۋمەتتەندىرۋ، دەراديكاليزاتسيالاۋ جۇمىستارىن جۇرگىزىپ جاتىرمىز، - دەدى ءبىلىم جانە عىلىم مينيسترلىگىنىڭ بالالار قۇقىعىن قورعاۋ كوميتەتى توراعاسىنىڭ ورىنباسارى ەرجان ەرسايىنوۆ استانادا وتكەن بالا قۇقىعىنا قاتىستى جيىن بارىسىندا.
ونىڭ ايتۋىنشا، مەكتەپ جاسىنداعى بالالار تۇرعىلىقتى جەردەگى ورتا مەكتەپتەردە وقىپ جاتىر. ولار وزگە وقۋشىلار سياقتى فورما كيىپ، ءتارتىپ ساقتايدى. "ۇلكەن جاستاعى بالالاردىڭ بارلىعى - قىز بالالار. ولاردىڭ باسقا بالالارمەن قارىم-قاتىناسى جاقسى. ساباقتارى جاقسى. مەكتەپ فورماسىن ارينە، ساقتايدى" دەدى مينيسترلىك وكىلى.
ەرجان ەرسايىنوۆتىڭ ايتۋىنشا، يراكتا، سيريادا تۋعان كەيبىر قازاق بالالارى ارابشا سويلەگەندىكتەن ولارعا قازاق ءتىلى ۇيرەتىلىپ جاتىر. مينيسترلىك وكىلى بالالارمەن پسيحولوگتار دا جۇمىس ىستەپ جاتقانىن ايتتى.
- ارينە، ولار تەرروريستىك بەلسەندى ايماقتاردا تۋىپ-وسكەننەن كەيىن، تاربيەلەنگەننەن كەيىن ولاردىڭ پسيحولوگياسى ازىرشە بولەك. ءبىز سول ءۇشىن جۇمىس ىستەپ جاتىرمىز. ولاردىڭ پسيحولوگياسىن قازاقستاننىڭ مەنتاليتەتىنە بەيىمدەۋ ءۇشىن جۇمىس ىستەپ جاتىرمىز، - دەدى ەرجان ەرسايىنوۆ.
ول قاقتىعىس ايماعىنان وزگە بالالاردى قايتارۋ جۇمىستارى جالعاسىپ جاتقانىن ايتتى. دەگەنمەن مينيسترلىك وكىلى ازىرگە بۇعان قاتىستى ەشقانداي ستاتيستيكا ايتا المايتىنىن جەتكىزدى.
2018 جىلى شىلدە ايىندا قازاقستاننىڭ ۇلتتىق قاۋىپسىزدىك كوميتەتى (ۇقك) سيريا مەن يراكتا سوعىس باستالعالى تاياۋ شىعىسقا 800-گە تارتا قازاقستاندىق كەتكەنىن حابارلاعان. كوميتەت سيريا مەن يراكتاعى حالىقارالىق تەررورلىق ۇيىمداردا 120 ەر ادام، 250-دەن استام ايەل جانە 500 بالا بارىن ايتقان.
بيىل ناۋرىزدا ۇقك توراعاسىنىڭ ورىنباسارى نۇرعالي بىلىسبەكوۆ سيريادان 125 قازاقستاندىقتىڭ ورالعانىن، 57 ادام قاماۋدا وتىرعانىن، قالعاندارىنىڭ باقىلاۋدا ەكەنىن ايتقان.
Abai.kz
