بەيسەنبى, 28 ناۋرىز 2024
2850 0 پىكىر 30 قازان, 2018 ساعات 09:54

گرۋزيادا پرەزيدەنت سايلاۋىنىڭ ەكىنشى كەزەڭى وتەدى

گرۋزياداعى پرەزيدەنت سايلاۋىندا داۋىس بەرۋدىڭ ەكىنشى كەزەڭى وتەتىن بولدى. گرۋزيا ورتالىق سايلاۋ كوميسسياسىنىڭ 29 قازان كۇنى تاڭەرتەڭ حابارلاۋىنشا، بيۋللەتەندەردىڭ 96 پايىزىن ساناعانداعى كورسەتكىش بويىنشا كانديداتتاردىڭ ەشقايسىسى پرەزيدەنت بولىپ سايلانۋعا قاجەتتى 50 پايىزدىق مەجەگە جەتە المادى.

سايلاۋدان باستى ۇمىتكەرلەر سانالاتىن بۇرىنعى سىرتقى ىستەر ءمينيسترى سالومە زۋرابيشۆيلي 38,6 پايىز، وعان باستى قارسىلاس سانالاتىن "بىرىككەن ۇلتتىق قوزعالىس" پارتياسىنىڭ ۇمىتكەرى گريگول ۆاشادزە 37,7 پايىز داۋىس جينادى.

ال بۇرىنعى پارلامەنت سپيكەرى، وپپوزيتسيالىق "ەۋروپالىق گرۋزيا" پارتياسىنان سايلاۋعا تۇسكەن داۆيت باكرادزە 10,9 پايىز داۋىس يەلەندى. باكرادزە سايلاۋدا جەڭىلگەنىن مويىنداپ، داۋىس بەرۋدىڭ ەكىنشى كەزەڭىندە ۆاشادزەنى قولدايتىنىن مالىمدەدى.

ورتالىق سايلاۋ كوميسسياسى سايلاۋدىڭ العاشقى كەزەڭىندە تىركەلگەن ءۇش ميلليوننان استام سايلاۋشىنىڭ 46,7 پايىزى داۋىس بەرگەنىن حابارلادى.

بيلىكتەگى "گرۋزيا ارمانى" پارتياسى قولدايتىنىنا قاراماستان سايلاۋعا ءوزىن-ءوزى ۇسىنعان كانديدات رەتىندە قاتىسىپ جاتقان سالومە زۋرابيشۆيلي سايلاۋدا جەڭىسكە جەتسە، گرۋزيانىڭ العاشقى ايەل پرەزيدەنتى بولۋى مۇمكىن.

گريگول ۆاشادزەنى سايلاۋعا ۇسىنعان "بىرىككەن ۇلتتىق قوزعالىس" پارتياسىن ءبىر كەزدەرى قازىر قۋعىندا جۇرگەن بۇرىنعى پرەزيدەنت ميحايل سااكاشۆيلي باسقارعان. ۆاشادزە بيلىكتى تەرىس ماقساتتا پايدالاندى دەگەن ايىپپەن سىرتتاي سوتتالعان ميحايل سااكاشۆيليدىڭ گرۋزياعا ورالۋىنا رۇقسات بەرىلۋى ءتيىس دەپ مالىمدەگەن.

پرەمەر-مينيستر مامۋكا ۆاحتادزە سايلاۋ ۋچاسكەلەرى جابىلعان سوڭداۋىس بەرۋدىڭ "بەيبىت، ەركىن جانە دەموكراتيالىق اۋاندا وتكەنىن" مالىمدەپ، گرۋزيالىقتاردى قۇتتىقتادى.

گرۋزيادا جالپىحالىقتىق پرەزيدەنت سايلاۋى سوڭعى رەت ءوتىپ وتىر. 2024 جىلدان باستاپ پرەزيدەنتتى پارلامەنت پەن سايلاۋشىلار كوللەگياسى سايلايدى.

گرۋزيا زاڭى بويىنشا، سايلاۋشىلاردىڭ 50 پايىزدان استام داۋسىن جيناعان ۇمىتكەر جەڭىسكە جەتەدى. ەگەر بۇل كورسەتكىشكە جەتە الماسا، وندا كوپ داۋىس جيناعان ەكى كانديدات سايلاۋدىڭ ەكىنشى كەزەڭىندە سىنعا تۇسەدى.

پارلامەنت سپيكەرى يراكلي كوباحيدزە سايلاۋدىڭ ەكىنشى كەزەڭى 1 جەلتوقساننان كەشىكتىرىلمەي وتكىزىلۋى مۇمكىن ەكەنىن مالىمدەدى.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3511