سەنبى, 1 قازان 2022
3091 9 پىكىر 29 قازان, 2018 ساعات 10:52

"امىرە" ءفيلمى گولليۆۋدتاعى كينوفەستيۆالدە ءبىرىنشى ورىن الدى

قازاقستاندىق “امىرە” كوركەم ءفيلمى حالىقارالىق Hollywood Film Festival كينوفەستيۆالىندە جەڭىمپاز اتاندى. بۇل جايلى فيلمدەگى باستى كەيىپكەر، ءانشى امىرە قاشاۋباەۆتىڭ ءرولىن ويناعان اكتەر سانجار ءمادي Facebook-تاعى پاراقشاسىندا حابارلادى.

“دوستار! ءبىزدىڭ “امىرە” (Paris song) ءفيلمى Hollywood Film Festival-ىندە ءبىرىنشى ورىندى يەلەندى جانە ادىلقازى القاسى ونى جوعارى باعالادى” دەپ جازدى اكتەر.

19-20 عاسىردا ءومىر سۇرگەن ايگىلى ءانشى امىرە قاشاۋباەۆ تۋرالى ءفيلمدى "قازاقفيلم" كينوستۋدياسى مادەنيەت جانە سپورت مينيسترلىگىنىڭ تاپسىرىسىمەن DAR play كومپانياسىمەن بىرىگىپ تۇسىرگەن.

امىرە قاشاۋباەۆ ءانشى عانا ەمەس، قازاق ۇلتتىق تەاتر ونەرىنىڭ نەگىزىن قالاۋشىلاردىڭ ءبىرى رەتىندە اتى اتالادى. وتكەن عاسىردىڭ 30-جىلدارى الاشوردا قايراتكەرلەرىمەن بايلانىسى ءۇشىن ونى نكۆد قۋعىنداعان.

“قىز جىبەك” وپەراسىندا تولەگەن ءرولىن سومدايتىن بولعان قاشاۋباەۆ پرەمەراعا ءبىر كۇن قالعاندا 1934 جىلى 6 جەلتوقساندا الماتىداعى كوشەلەردىڭ بىرىندە ءولى كۇيىندە تابىلعان. بۇل وپەرادا جىبەكتىڭ ءرولىن اتاقتى ءانشى كۇلاش بايسەيىتوۆا ويناۋى ءتيىس بولعان.

Abai.kz

9 پىكىر