استانادا قر پرەمەر-ءمينيسترى باقىتجان ساعىنتاەۆ حالىق تابىسىن ءوسىرۋ جانە ەڭبەكاقى تولەۋ جۇيەسىن جەتىلدىرۋ تۇرعىسىنان مەملەكەت باسشىسىنىڭ بيىلعى 5 قازانداعى جولداۋىن ىسكە اسىرۋ ماسەلەلەرى بويىنشا سەلەكتورلىق كەڭەس وتكىزدى.

مەملەكەت باسشىسى قازاقستان حالقىنا جولداۋىندا ەڭبەك سالاسىنداعى نەگىزگى الەۋمەتتىك ينديكاتوردىڭ — ەڭ تومەنگى جالاقىنىڭ پارامەترلەرىن وزگەرتۋدى تاپسىردى. سونىمەن قاتار پرەزيدەنت ءىرى كومپانيالاردى وسى وزگەرىستەردى قولداپ، سايكەسىنشە، ەڭ تومەنگى جالاقى الاتىن جۇمىسكەرلەردىڭ ەڭبەكاقىسىن كوتەرۋ شارالارىن قابىلداۋعا شاقىردى.

كەڭەس بارىسىندا جەرگىلىكتى اتقارۋشى بيلىك ورگاندارى مەن جەكە قۇرىلىمداردىڭ وسى تاپسىرمانى ورىنداۋى بويىنشا بىرىڭعاي تاسىلدەردى ازىرلەۋ ماسەلەلەرى تالقىلاندى. ماسەلەنى جان-جاقتى قاراۋ ءۇشىن كەڭەس جۇمىسىنا سەلەكتور رەجيمىندە وڭىرلەردىڭ اكىمدەرى، سونداي-اق، «اتامەكەن» ۇكپ جانە ەلىمىزدىڭ ءىرى كاسىپورىندارىنىڭ باسشىلارى قاتىستى.

كەڭەس بارىسىندا ءسوز سويلەگەن ەڭبەك جانە حالىقتى الەۋمەتتىك قورعاۋ ۆيتسە-ءمينيسترى س. جاقىپوۆا مەن وڭىرلەردىڭ اكىمدەرى 42,5 مىڭ تەڭگەگە دەيىن جالاقى الاتىن، مەملەكەتتىك جانە جەكەمەنشىك ۇيىمدارداعى قىزمەتكەرلەردىڭ سانىنا ستاتيستيكا كەلتىرىپ، جولداۋ–2019-داعى تاپسىرمالاردى ورىنداۋ ماقساتىندا قابىلدانىپ جاتقان شارالار تۋرالى باياندادى. بايانداماشىلاردىڭ پىكىرىنشە، ەڭ تومەنگى ەڭبەكاقىنى ارتتىرۋدان كۇتىلەتىن الەۋمەتتىك اسەر ەڭ تومەنگى جالاقى الاتىن قىزمەتكەرلەردىڭ ءومىر دەڭگەيىن ايتارلىقتاي كوتەرۋگە جول اشادى.

ەلىمىزدىڭ ءىرى ءارى ورتا كاسىپورىندارىنىڭ باسشىلارى دا ءوز ويلارىن جەتكىزدى. كەڭەستە ءسوز سويلەگەن «ارسەلور ميتتال تەمىرتاۋ» اق باس ديرەكتورى كالون سينگح پارامجيت تەك ەڭ تومەنگى جالاقى الاتىنداردىڭ ەمەس، جالپى كاسىپورىن جۇمىسشىلارىنىڭ 80%-عا جۋىعىنىڭ ەڭبەكاقىسىن كوتەرۋگە تولىقتاي دايىن ەكەنىن اتاپ ءوتتى.

مەملەكەت باسشىسىنىڭ حالىق جالاقىسىنىڭ دەڭگەيىن كوتەرۋ تۋرالى ۇندەۋىن تولىق قولداۋ جونىندەگى بيزنەستىڭ شوعىرلاندىرىلعان پوزيتسياسى «اتامەكەن» ۇكپ باسقارما توراعاسىنىڭ ورىنباسارى ە. جۇماعازيەۆتىڭ سوزىندە دە كورىنىس تاپتى.

ماسەلەنى تالقىلاۋ قورىتىندىسىن شىعارا وتىرىپ، قر پرەمەر-ءمينيسترى باقىتجان ساعىنتاەۆ ەڭبەك جانە حالىقتى الەۋمەتتىك قورعاۋ، اقپارات جانە كوممۋنيكاتسيالار مينيسترلىكتەرىنە، وبلىستاردىڭ اكىمدەرىنە جانە استانا، الماتى، شىمكەنت قالالارىنىڭ اكىمدەرىنە تومەنگى جالاقى تولەنەتىن جۇمىسشىلار ساناتتارىنا قاتىستى ەڭبەك زاڭناماسىنىڭ ساقتالۋىن ءتيىستى باقىلاۋدى قامتاماسىز ەتۋدى جانە بارلىق جەردە ءتۇسىندىرۋ جۇمىستارىن جۇرگىزۋ بويىنشا شارالار قابىلداۋدى تاپسىردى. بۇدان وزگە، ەڭبەكاقى تولەۋ جۇيەسىن رەتتەيتىن جانە ەڭبەك زاڭناماسىنىڭ ساقتالۋىن قاداعالايتىن، سونىڭ ىشىندە جۇمىسشىلاردىڭ جاپپاي قىزمەتتەن بوساتىلۋىنا جانە ولاردىڭ ەڭبەك شارتىنسىز جۇمىس ىستەۋىنە جول بەرمەيتىن ۇجىمدىق كەلىسىمدەرگە، جۇمىس بەرۋشى اكتىلەرىنە قول قويىلۋىن جانە ساقتالۋىن قامتاماسىز ەتۋ تاپسىرىلدى.

Abai.kz