ارگەنتينا استاناسى بۋەنوس-ايرەستە 6 قازان جالاۋىن جەلبىرەتكەن جاسوسپىرىمدەر اراسىنداعى وليمپيادا ويىندارىندا قۇراما قورجىنىنا العاشقى التىن مەدال ءتۇستى.

كەشە ەلىمىز سپورتشىلارى ءبىر التىن، ءبىر كۇمىس جۇلدەگە قول جەتكىزدى. ايتا كەتەرلىگى، قوس مەدالدى دە دزيۋدوشىلار جەڭىپ الدى.

جىگىتتەر اراسىندا 100 كەلىگە دەيىنگى سالماق دارەجەسىندە بەلدەسكەن 17 جاستاعى بالۋان بەكارىس سادۋاقاس مۇحيتتىڭ ارعى بەتىندە مىقتىلىعىن دالەلدەدى. فينالعا دەيىن يران جانە ۆەنگريا سپورتشىلارىنىڭ بەتىن قايتارعان بەكارىس اقتىق سىندا گرۋزيالىق يليا سۋلۋمانيدزەنى ۆازاري ادىسىمەن جەڭدى.

ال قىزدار اراسىندا 78 كەلىدە كۇش سىناسقان مارگاريتا گريتسەنكو فينالدا گەرمانيالىق راففاەلا يگلدەن جەڭىلىپ، كۇمىس مەدال الدى. مارگاريتا شيرەك فينالدا ەكۆادورلىق  ەديت ءورتيزدى، جارتىلاي فينالدا چەحيالىق ەستەر سۆوبودوۆانى جەڭدى.

جاسوسپىرىمدەر اراسىنداعى III جازعى وليمپيادا ويىندارى 6-18 قازان ارالىعىندا وتەدى. ءىرى سپورتتىق شاراعا 206 ەلدەن 4 مىڭعا جۋىق سپورتشى قاتىسىپ جاتىر. ءدۇبىرلى دودادا قازاقستان نامىسىن 57 سپورتشى قورعايدى.

ايتا كەتەيىك، وسىعان دەيىن جاسوسپىرىمدەر اراسىنداعى جازعى وليمپيادا ويىندارى العاش رەت 2010 جىلى سينگاپۋردە، كەيىن 2014 جىلى قىتايدىڭ نانكين قالاسىندا وتكەن بولاتىن. ءتورت جىلدا ءبىر رەت ءوتىپ تۇراتىن بايراقتى باسەكەگە 14-18 جاس ارالىعىنداعى سپورتشىلار-يۋنيورلار عانا قاتىسادى.

Abai.kz