- مەن سەنىمەن قوش ايتىسامىن.
ۆەي ادەتىنشە تاعزىم مازىرەتىن جاسادى. ول جاي شاپان كيىپتى. باسىندا – حاتتا. قولىندا-اسا تاياق. قارىنا دوربا ىلگەن.
ماقىتبەك بۇل كەزدە قامالداعى وڭاشا جايدا تىنىعىپ جاتقان بولاتىن. كۇزەتى انار اعاشتارىنىڭ اراسىنا جاسىرىنىپ، توڭىرەكتى تورىپ ءجۇر.
- نەگە؟ – دەدى ماقىت قاسىن كەرىپ. – مەن ەرتەڭ سۇلتاننىڭ نيسباسىن قابىلدايمىن. ەندى كۇللى حاليفاتتىڭ ءامىرشىسى - مەن.
- جوق، قىپشاق، – ۆەي كەلىسپەدى. – قاتەلەسەسىڭ. سەن قۇل كەيپىڭدە قالا بەردىڭ. بۇرىن تەك بىرەۋگە باعىنۋشى ەدىڭ ەندى كوپتىڭ قۇلىنا اينالدىڭ.
ماقىتبەكتى اشۋ بۋنادى.
- نە ساندالىپ تۇرسىڭ، قاقباس! مەن - سۇلتانمىن! مەنىڭ ەسىمىم جاراتۋشى ەسىمىمەن قاتار ايتىلادى. مەن قازىر ازاتپىن، اق دەگەنىم العىس، قارا دەگەنىم قارعىس.
- جوق، قىپشاق، – ۆەي باسىن شايقادى. – ازاتتىق دەگەن – قۇداي. ال سەن ونىڭ شاڭ باسقان جەردەگى كولەڭكەسى عاناسىڭ. ازاتتىق ىزدەگەن ادام بيلىككە ۇمتىلمايدى.
- بىراق ونىڭ تاڭداۋى ماعان ءتۇستى. پەندەلەرىنىڭ تاعدىرىن مەنىڭ قولىما سەنىپ تاپسىردى.
- بۇنىڭ راس، – دەدى ۆەي. – ول سەنى كوپ اراسىنان سۋىرىپ الىپ، ءامىرشى ەتتى. بىراق بۇنىڭ راقىم، نە جازا ەكەنىن ەشكىم ايتا المايدى. ويتكەنى بيلىكتىڭ جولاپ كەتكەن ادامنىڭ ىرقىن شىرماپ-ماتاپ تاستايتىن قاسيەتى بار. بيلىككە جەتۋ ءۇشىن اسقان باتىرلىقتىڭ قاجەتى دە جوق. كوبىنە ول ۋىسقا كەزدەيسوق تۇسەدى. ونى وزگەنىڭ قولىنا ەرىكپەن بەرۋ عانا ەرلىك بولىپ سانالادى. بارلىعىمىز جاراتقاننىڭ قۇلىمىز. ال، ورتامىزداعى ەڭ تاۋەلدى، قۇلاق كەستىسى – پاتشا. سەن قۇلدىق پەن بيلىكتىڭ اراسى الشاق ەمەستىگىن ءتۇسىنۋىڭ كەرەك. پەندەلەر الەمىندە پاتشالار تۋمايدى.
- جوق، شال. اللا ءادىل. ول تاققا وتىرعىزۋ ءۇشىن ەرىك-جىگەرىمدى ماتاپ، ۇزاق سىنادى، -دەدى ماقىتبەك. – بار ازابىنا ءتوزىپ، ءامىرىن ەكى ەتپەيتىنگە عانا بيلىك بەرۋگە بولاتىنىن جاراتقان انىق بىلەدى.
- بيلىك قورقاققا كەرەك، - ۆەي جاۋاپ قايىردى. – ول ءوزىن تومەندەتەتىن ورتادان سەسكەنەتىن ادامعا عانا پايدالى. بۇگىن اللا سەنى تاققا وتىرعىزدى، ال ەرتەڭگى كۇنى ءوز شاشتارازىڭنان دا ۇرەيلەنەتىن بەيشارا كۇيگە تۇسەسىڭ. جازادان قاشىپ قۇتىلعان پاتشا از.
(بەيبارىس سۇلتان مەن ۇستازىنىڭ ديولوگى: ە. تۇرسىنوۆتىڭ "ماملۇك" رومانىنان ءۇزىندى )

سەرىك ابىكەننىڭ facebook پاراقشاسىنان

Abai.kz