بۇگىن ءداستۇرلى «قازاقستاننىڭ ۇزدىك الەۋمەتتىك جوبالارى» بايقاۋىنىڭ قورىتىندىسى جاريالاندى. بيىل بايقاۋ العاش رەت «نۇر وتان» پارتياسىنىڭ جانە ەڭبەك جانە حالىقتى الەۋمەتتىك قورعاۋ مينيسترلىگىنىڭ بىرلەسىپ ۇيىمداستىرۋىمەن ءوتىپ وتىر.

ماراپاتتاۋ راسىمىندە «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ جەڭىمپازدار مەن قاتىسۋشىلاردى قۇتتىقتاپ، بارلىق جوبانىڭ جەڭىسكە لايىق ەكەنىن ايتتى. سونداي-اق ول مۇنداي بايقاۋدىڭ الەۋمەتتىك، رۋحاني جانە تاربيەلىك ماڭىزى زور ەكەنىنە نازار اۋداردى.

– بۇل، بىرىنشىدەن، الەۋمەتتىك سالادا بەلسەندىلىگىمەن تانىلعان قوعامدىق ۇيىمدار مەن مۇقتاج جاندارعا كومەك قولىن سوزعان جەكە ازاماتتارعا قولداۋ كورسەتۋگە، ولاردىڭ ەڭبەكتەرىن ەلەپ-ەسكەرۋگە مۇمكىندىك بەرەتىن بولسا، ەكىنشىدەن، سونداي بىرلەستىكتەردى كوپشىلىككە ۇلگى-ونەگە رەتىندە دارىپتەۋگە جول اشادى. قازىرگى تاڭدا ەلىمىزدە ونداي ۇيىمدار مەن ازاماتتار مىڭداپ سانالادى. ءبىز ولاردىڭ جۇمىستارىن جوعارى باعالاي وتىرىپ، اتالعان ۇيىمدارعا ءتيىستى جاعداي جاساۋدى بارلىق مەملەكەتتىك ورگانداردىڭ، بيزنەس قاۋىمداستىقتىڭ جانە ساياسي پارتيالاردىڭ جاۋاپكەرشىلىگى دەپ قابىلدايمىز. ويتكەنى ولار وسىنداي يگى ىستەرىمەن قوعامىمىزدا قايىرىمدىلىق مادەنيەتى مەن الەۋمەتتىك جاۋاپكەرشىلىكتىڭ قالىپتاسۋىنا ۇلكەن ۇلەستەرىن قوسىپ كەلەدى. سول سەبەپتى «نۇر وتان» پارتياسى وسى ءداستۇرلى بايقاۋعا اتسالىسىپ، ونىڭ جاڭا دەڭگەيگە كوتەرىلۋىنە ءوز سەپتىگىن تيگىزىپ وتىر، – دەگەن ماۋلەن اشىمباەۆ الداعى ۋاقىتتا پارتيا وسى سالاداعى جۇمىستارىن جالعاستىرا بەرەتىنىن جەتكىزدى.

ءوز كەزەگىندە ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا بايقاۋدىڭ وتۋىنە قولداۋ كورسەتكەن «نۇر وتان» پارتياسىنا العىسىن ءبىلدىردى.

– بيىل بايقاۋ العاش رەت «نۇر وتان» پارتياسىنىڭ قولداۋىمەن وتكىزىلىپ وتىر. سونىڭ ناتيجەسىندە جوبا جالپىۇلتتىق دەڭگەيگە كوتەرىلىپ، قاتىسۋشىلار سانى رەكوردتىڭ مەجەگە جەتتى. جالپى بۇل بايقاۋدىڭ وسىنداي بيىككە جەتۋى قوعامىمىزداعى بىرلىكتىڭ بەلگىسى، – دەدى مينيستر حانىم.

وسىمەن قاتارىنان 6-شى رەت وتكىزىلگەن بايقاۋعا بيىل ەلىمىزدىڭ ءار وڭىرىنەن 318 اۆتور قاتىسىپ، ءوز جوبالارىن ۇسىندى. بايقاۋ كوميسسياسىنىڭ شەشىمىمەن ولاردىڭ ىشىنەن 55 جوبا ىرىكتەلىپ، رەسپۋبليكالىق كەزەڭگە جولداما الدى. ناتيجەسىندە «زەينەتكەرلەرگە تەگىن تۇسكى اس» جوباسىمەن قاتىسقان ءراسيما تەمىرباەۆا – 1-ورىن، «ارباداعى كەدەرگىسىز ءومىر» جوباسىمەن قاتىسقان نۇربولات قاراباسوۆ پەن «ەل نازى» ارت-تەراپيامەن دامىتۋ ورتالىعى جوباسىمەن قاتىسقان بەلگىلى ءانشى كەنجەبەك ءجانابىلوۆ – 2-ورىن جانە «ءۇمىت ساۋلەسى»، «مەيكاتون «TOM: Kazakhstan» جوبالارىمەن قاتىسقان مارجان ماديەۆا مەن ءسانيا اراپوۆا 3-ورىن الدى.

ودان بولەك، ونلاين-داۋىس بەرۋ ناتيجەسى بويىنشا 5 قاتىسۋشىعا جۇلدە تاپسىرىلدى جانە تاعى 3 جوبا اۆتورىنا ارنايى سىيلىق تاپسىرىلدى.

Abai.kz