29-30 قىركۇيەك كۇندەرى وڭتۇستىك استانامىزدا «الماتى تۋرى 2018» حالىقارالىق شوسسەدەگى كاسىبي ۆەلوجارىسى وتەدى.

ەلىمىزدىڭ وسى كۇزدەگى باستى سپورتتىق وقيعالارىنىڭ ءبىرى سانالاتىن ۆەلوجارىس الماتىدا التىنشى رەت قاتارىنان ۇيىمداستىرىلىپ وتىر. وسى جولى دا وتكەن جىلداعىداي دودانىڭ ەكى كەزەڭى بولادى جانە 30 قىركۇيەكتە مەدەۋ مۇز ايدىنىنداعى مارەدە اياقتالادى.

ءبىرىنشى كەزەڭ قبتۋ عيماراتىنىڭ الدىنداعى «استانا» الاڭىنان باستالادى، سودان كەيىن پەلوتون «قالا اينالىمى» كوشەلەرىمەن ءجۇرىپ وتەدى – بارلىعى 7 اينالىم، ءسويتىپ، جارىس «استانا» الاڭىنداعى مارەدە اياقتالادى (183,4 شاقىرىم). ال ەكىنشى كەزەڭنىڭ سورەسى «حالىق ارەنادان» باستالىپ، مارەسى وتكەن جىلعىداي «مەدەۋدە» ورنالاسادى (152,2 شاقىرىم).

جارىسقا الەمنىڭ 15 ەلىنەن كەلگەن ۆەلوشاباندوزدار قاتىسادى. جالپى 19 كوماندا باق سىنايتىن بولادى. بىلتىر وتكەن جارىستا Astana Pro Team سپورتشىلارى الەكسەي لۋتسەنكو مەن ياكوب فۋلسانگ ءبىرىنشى ورىن العان بولاتىن.

بيىل وزىمىزدىڭ «AstanaProTeam» ۆەلوكومانداسىنان بولەك. فرانتسيادان «DelkoMarseilleProvenceKTM» قۇرلىقتىق كومانداسى كەلەدى، بۇل كوماندا «الماتى تۋرىنىڭ» ءداستۇرلى قاتىسۋشىسى. قازاقستان مەن رەسەيدىڭ ۇلتتىق قۇرامالارى كەلەدى. قالعاندارى قۇرلىقتىق كوماندالار، ولاردىڭ قاتارىندا پەتروپاۆلدىق «VinoAstanaMotors» جانە الماتىلىق «AppleTeam» كوماندالارى بار.

«الماتى تۋرى» - ورتالىق ازياداعى ەڭ ءىرى ۆەلوجارىستاردىڭ ءبىرى جانە وتكىزىلىپ كەلە جاتقالى بەرى تالاي سپورتشى مەن ۆەلوسپورت جانكۇيەرلەرىنىڭ نازارىن اۋداردى. بۇگىندە تۋريستەردىڭ دە قىزىعۋشىلىعىن ارتتىرىپ وتىر. جارىستى جىل سايىن 60 ەلدە Eurosport تەلەارناسى ارقىلى تىكەلەي ەفيردەن تاماشالاپ ءجۇر.

Abai.kz