«استانا» ەۋروپا ليگاسى توپتىق كەزەڭى اياسىنداعى العاشقى ماتچىن سىرت الاڭدا كيەۆتىك «دينامو» كومانداسىنا قارسى وتكىزىپ، 2:2 ەسەبىمەن تەڭ تارقاستى.

ءۇشىنشى جىل قاتارىنان ەۋروپا ليگاسىنىڭ توپتىق كەزەڭىندە باق سىناپ جاتقان ەلورلادىق كوماندا كەڭەس فۋتبولىنىڭ ۇزدىگى بولعان داڭىقتى «ديناموعا» قارسى ماتچقا ۇلكەن ۇمىتپەن اتتانعان. ۋكراينالىق كوماندانىڭ سوڭعى كەزدەرى الا-قۇلا ونەر كورسەتىپ جۇرگەنىن پايدالانىپ، سىرت الاڭنان ۇپاي ەنشىلەپ قايتۋدى ماقسات ەتتى.

كوماندانىڭ باس باپكەرى گريگوري بابايان نەگىزگى قۇرامعا ازداعان وزگەرىس ەنگىزدى. جارتىلاي قورعانىس شەبىنە سەرىكجان مۋجيكوۆتىڭ ورنىنا ءازىربايجان قۇراماسىنىڭ ويىنشىسى ريچارد المەيدانى شىعاردى. بىراق، ءبىزدىڭ ويىمىزشا بۇل اسا كورەگەن شەشىم بولا قويعان جوق. المەيدانىڭ سەرىكجاننان اسىرىپ ونەر كورسەتكەنىن بايقاي المادىق.

وسى جەردە ايتا كەتەر ءبىر ماسەلە، «استانا» ساپىندا بۇل كەزدەسۋدى بىرىنشى مينۋتتان باستاعان 11 فۋتبولشىنىڭ تەك بىرەۋى عانا تازا قازاقستاندىق. سول قاپتالداعى قورعاۋشى ديمتري شومكودان باسقا ون ويىنشى شەتەلدەن كەلگەن شەبەرلەر. راس، قاقپاشى ەريچ پەن ورتالىق قورعاۋشى پوستنيكوۆتا قازاقستاننىڭ كوك پاسپورتى بار. بىراق، بۇنىڭ ءبىرىنشىسى سەربيادا تۋىپ-وسكەن، ال سوڭعىسى رەسەيدىڭ ەكىنشى سورتتى ويىنشىسى. ال قالعانى لەگيونەرلەر.

قۇرامىندا قازاق تۇگىلى قازاقستاندىق ويىنشى از ەلوردالىق كومانداعا ەلدە قالعان ميلليونداعان قازاق جانكۇيەرلىك ەتتى. قازاقستاننىڭ كومانداسىن قازاقتان باسقا كىم قولدايدى دەيسىز؟ ەلدەگى وزگە ۇلت وكىلدەرىنىڭ رەسەيلىك كوماندالارعا جانكۇيەر ەكەنى جاسىرىن ەمەس، ولار ءۇشىن «استانانىڭ» جەڭىسىنەن «زەنيتتىڭ» جەڭىلىسى الدەقايدا ارتىق.

بىراق، ءبىر قۋانتارلىعى كوماندامىز ك توبىنىڭ مىقتىسى سانالاتىن «دينامودان» جەڭىلگەن جوق. كيەۆتەن ءبىر ۇپاي ەنشىلەپ قايتتى. تاعى ءبىر ايتا كەتەرلىگى، وزىنە بەرىلگەن بار بولعانى بەس مينۋت ۋاقىتتى ءساتتى پايدالانعان رومان مۋرتازاەۆ ويىن بىتەر تۇستا گول سوعىپ، ەسەپتى تەڭەستىردى.