كەشە UEFA ۇلتتار ليگاسى اياسىندا قازاقستان قۇراماسى سىرت الاڭدا اندوررا فۋتبولشىلارىن جەڭە المادى. ەسەپ 1:1!

جەڭە المادى دەپ وتىرعانىمىز تەگىن ەمەس. قۇرامانىڭ قۋاتى جاعىنان بولسىن، فۋتبولشىلاردىڭ جەكە الەۋەتى جاعىنان بولسىن قارسىلاسىمىزدان كوش ىلگەرى ەدىك. اندوررا قۇراماسىنىڭ جارتىلاي كاسىبي فۋتبولشىلاردان قۇرالعانىن بۇعان دەيىن دە ايتقان بولاتىنبىز. دەمەك، ءبىزدىڭ ميلليونداپ جالاقى الىپ، فۋتبولمەن كاسىبي تۇردە اينالىساتىن ويىنشىلارىمىز اندوررانىڭ اۋەسقوي فۋتبولشىلارىن وڭاي ۇتۋى كەرەك ەدى.

قارجى جايلى ءسوز شىعىپ قالعان ەكەن، قازاقستان قۇراماسىنداعى ويىنشىلاردىڭ ترانسفەر نارىعىنداعى جالپى قۇنى اندوررا فۋتبولشىلارىنان 100 ەسە جوعارى ەكەنىن ايتا كەتەيىك. ال الاتىن جالاقى مولشەرى مەن فۋتبولعا مەملەكەت تاراپىنان بولىنەتىن قارجى اندوررا سەكىلدى 80 مىڭ عانا حالقى بار شاعىن ەلدەن الدەقايدا كوپ ەكەنى ءسوزسىز. بىراق، قازاقستان قۇراماسى اندوررا-لا-ۆەلە قالاسىنان تەڭ ەسەپتى قاناعات تۇتىپ قايتتى.

قازاقستان قۇراماسى جولداستىق كەزدەسۋلەردە وتە ءساتتى ونەر كورسەتكەن بولاتىن. وسى ناتيجەلەرگە قاراپ جانكۇيەرلەر ستانيمير ستويلوۆ باستاعان ءبىزدىڭ قۇراما ۇلتتار ليگاسىنداعى قارسىلاستارىن قالپاقپەن ۇرىپ الادى دەپ ۇمىتتەنگەن. الايدا، ماقتاۋلى ماماننىڭ قولىنان ەشتەڭە كەلمەدى. ۇلتتار ليگاسى اياسىندا الدىمەن استانادا گرۋزيادان 0:2 ەسەبىمەن جەڭىلدى. ال ەكىنشى ويىنداعى ناتيجەسى مىناۋ.

ءبىزدىڭ ويىمىزشا، قازاق فۋتبولىنا ۇلكەن وزگەرىس كەرەك. بۇل وزگەرىستى فەدەراتسيا باسشىلارىنان باستاعان ءجون. فەدەراتسيا تىزگىنىن قالايدا فۋتبول مامانىنا ۇستاتۋ كەرەك. بولماسا، زەينەتكەرلىك جاسىنا جەتىپ، كەشە عانا مەملەكەتتىك قىزمەتتەن "قۋىلعان" ادىلبەك جاقسىبەكوۆ قازاق فۋتبولىنا جاڭالىق ەنگىزەدى دەپ ۇمىتتەنۋدىڭ ەش ءجونى جوق.

ۇلتتار ليگاسى. D ديۆيزيونى. 1 توپ

اندوررا - قازاقستان 1:1 (0:0)

گولدار: 68’ لوگۆينەنكو (0:1) 85’ الاەس (1:1) 

قىزىل قاعاز: 76’ مۋجيكوۆ

قازاقستان قۇراماسى: ەريچ، پوستنيكوۆ، قۋات، مۋجيكوۆ، يسلامحان، تۇڭعىشباەۆ ، ششەتكين، مۋرتازاەۆ، شومكو، بەيسەبەكوۆ، لوگۆينەنكو.

قۋانىش قاپپاس

Abai.kz