قازاقستاندىق كاسىپقوي بوكسشى دانيار ەلەۋسىنوۆتىڭ ءتورتىنشى جەكپە-جەگى قاشان وتەتىنى بەلگىلى بولدى.

Matchroom Boxing پروموۋتەرلىك كومپانياسىنىڭ Twitter جەلىسىندە حابارلاۋىنشا، دانيار 20 قازاندا بوستون قالاسىندا (اقش) جەكپە-جەك وتكىزبەك. قارسىلاسى كىم بولاتىنى قازىرشە بەلگىسىز. ايتا كەتەرلىگى، بۇل بوكس كەشىنىڭ باستى جەكپە-جەگىندە WBO چەمپيونى بيللي دجو سوندەرس (26-0, 12 كو) پەن دەمەتريۋس اندرادە (25-0, 16 كو) جۇدىرىقتاسادى.

اۋەسقوي بوكستا تولاعاي تابىسقا جەتىپ، وليمپيدا چەمپيونى (2016 جىل) اتانعان دانيار ەلەۋسىنوۆ بيىلدان باستاپ كاسىپقوي بوكستا باعىن سىناپ ءجۇر. العاشقى جەكپە-جەگىن اقپان ايىندا، ەكىنشى، ءۇشىنشى كەزدەسۋىن ماۋسىم جانە تامىز ايلارىندا وتكىزىپ، بارىندە جەڭىسكە جەتتى. العاشقى جەكپە-جەگى اقش ەلىندە، سوڭعى ەكەۋى ۇلىبريتانيا جەرىندە ءوتتى.

كاسىپقوي بوكستا ونەر كورسەتىپ جۇرگەن قازاقستاندىق بوكسشىلار از ەمەس. الايدا، جانكۇيەرلەر ءالى دە گەننادي گولوۆكيننىڭ ورنىن باساتىن بىلعارى قولعاپ شەبەرىن بايقاي العان جوق. قانات يسلامنان كۇدەر ۇزگەن كوپشىلىك جاڭا ەسىم ىزدەي باستادى. كاسىپقوي بوكستاعى جولىن جاڭا باستاپ جاتقان جاستاردى ايتپاعاندا، اۋەسقوي بوكستا ءتاپ-ءتاۋىر جەتىستىككە جەتكەن جانىبەك ءالىمحانۇلى مەن ءدال قازىر ءبىز ءسوز ەتىپ وتىرعان دانيار ەلەۋسىنوۆتان قازاق جانكۇيەرلەرى ۇلكەن ءۇمىت كۇتەدى.

ەستەرىڭىزگە سالا كەتەيىك، دانيار ەلەۋسىنوۆ ءوزىنىڭ سوڭعى جەكپە-جەگىن 4 تامىزدا كارديففتە وتكىزگەن بولاتىن. سول جەكپە-جەكتە ۆەنگريالىق گابور گوربيچتى تورەشىلەر شەشىمىمەن جەڭدى.

Abai.kz