جۇما, 29 ناۋرىز 2024
ساڭلاق 4138 0 پىكىر 3 قىركۇيەك, 2018 ساعات 16:24

استانا تورىندە تاريحي ءتۋرنيردىڭ تۇساۋى كەسىلەدى

6 قىركۇيەك استانا تورىندە تاريحي ءتۋرنيردىڭ تۇساۋى كەسىلمەك. ەۋروپا فۋتبول قاۋىمداستىعىنىڭ جاڭا جوباسى «ۇلتتار ليگاسى» ءتۋرنيرىنىڭ تۇڭعىش ماتچى قازاقستان مەن گرۋزيا قۇرامالارىنىڭ اراسىندا وتەدى.

بوروديۋك سىندى بىلىكسىز باپكەردىڭ باستاۋىندا جەڭىلىستەن كوز اشپاعان قازاقستان ۇلتتىق قۇراماسى 2018 جىلدىڭ تابالدىرىعىن ءساتتى اتتادى. قۇراما تىزگىنىن بولگاريالىق مامان ستانيمير ستويلوۆ ۇستاعالى جانكۇيەر جۇرەگىنە ءۇمىت ۇشقىنى ۇيالاعان. الايدا، ماقتاۋلى مامان دا ءالى ۇلكەن سىناقتىڭ تەزىنەن وتكەن جوق. بار بولعانى شاكىرتتەرى ءۇش جولداستىق كەزدەسۋدە ءساتتى ونەر كورسەتتى. كوكتەمدە ۆەنگريانى جەڭىپ (3:2), بولگاريادان جەڭىلگەن (1:2) قازاقستان قۇراماسى جازدا ءازىربايجان فۋتبولشىلارىن قارسىلاس قۇرلى كورگەن جوق (3:0). بۇل ناتيجەلەر ءبىزدىڭ كوڭىلىمىزدەن شىعىپ، شاتتىققا بولەگەنىمەن قۋانۋعا ءالى ەرتە ەكەنىن ەسكەرتكىمىز كەلەدى. انىق سىن الدا!

«ۇلتتار ليگاسى» UEFA-نىڭ جاڭا تۋىندىسى ەكەنىن ايتتىق. بۇل تۋرنير بۇرىنعى جولداستىق كەزدەسۋلەردىڭ ورنىن باسپاق. بىراق، جولداستىق كەزدەسۋدەن ارتىقشىلىعى رەسمي تۋرنيرگە ءبىر تابان جاقىن. ونىڭ ۇستىنە ەۋروپا چەمپيوناتىنا جول اشاتىن مۇمكىندىگى تاعى بار. قارت قۇرلىقتىڭ بارلىق قۇراماسى ءتورت ديۆيزيونعا بولىنگەن. قۇرامانىڭ قارىم-قابىلەتىنە قاراي. ءبىزدىڭ قۇراما ارينە ەڭ تومەنگى، ءتورتىنشى ديۆيزيونعا ورنالاسقان. «D» ليگاسى دەپ اتالادى. بۇنىڭ ءوزى ىشتەي ءتورت توپقا بولىنەدى.

بۇل ليگادا UEFA رەيتينگىسىندەگى سوڭعى 16 قۇراما جينالعان – ءازىربايجان، ماكەدونيا، بەلارۋس، گرۋزيا، ارمەنيا، لاتۆيا، فارەر ارالدارى، ليۋكسەمبۋرگ، قازاقستان، مولدوۆا، ليحتەنشتەين، مالتا، اندوررا، كوسوۆو، سان-مارينو، گيبرالتار. ءبىزدىڭ فۋتبولشىلار ءبىرىنشى توپتا باق سىنايدى. قارسىلاستارى — گرۋزيا، اندوررا، لاتۆيا. الدىمەن ءوز توبىمىزدا ءبىرىنشى ورىن الساق، سوسىن وزگە ءۇش توپتىڭ جەڭىمپازىمەن ەۋروپا چەمپيوناتىنا بەرىلەر ءبىر جولداماعا تالاسامىز.

ويىن ەرەجەسى وسىنداي. ەندى تۋرنير باستالادى. ءبىزدىڭ توپتا گرۋزيا قۇراماسىنىڭ ءباسى ءسال جوعارى. ەۋروپادا دوپ تەبەتىن ويىنشىلارى كوپ. بىزگە ارمان بولعان ءىرى ليگالاردا گرۋزين فۋتبولشىلارى ءورىپ ءجۇر. يتاليا، يسپانيا، بەلگيا، شۆەيتساريا چەمپيوناتتارىندا گرۋزيالىق ويىنشىلار ونەر كورسەتەدى. ءتىپتى، بىزگە الىنباس قامالداي بولعان رەسەي پرەمەر ليگاسى بۇلار ءۇشىن قاتارداعى قاراپايىم چەمپيونات عانا. ال قازاقستاندىق فۋتبولشىلاردىڭ ءوز ەلىمىزدەن ۇزاپ شىعا الماي، اۋىل ءۇيدىڭ اراسىن اينالسوقتاپ جۇرگەنى تاعى بار.

بۇل ءسوزدى اقپارات قۇرالدارى مەن جانكۇيەرلەر اراسىندا ءبىزدىڭ توپتىڭ ءفاۆوريتى قازاقستان قۇراماسى دەگەن قاتە تۇسىنىك قالىپتاسپاس ءۇشىن ايتىپ وتىرمىز. ايتپەسە، كوز الداعى الدامشى ناتيجەنى مالدانىپ ءجۇرىپ، ناعىز سىن ساعاتتا سان سوققان ءساتىمىز از ەمەس. مىسال ءۇشىن ايتا كەتەيىك، «قايرات» فۋتبول كلۋبى ەۋروپا ليگاسىندا ەكى جىل قاتارىنان وزىنەن ءالسىز سانالاتىن كوماندالاردان وتە الماي قالدى. وتكەن جىلى جەرەبەدە البانيالىق «سكەندەربە́ۋ»، بيىل چەحيالىق «سيگما» تۇسكەندە جانكۇيەرلەر مەن كەيبىر باق الماتىلىقتاردى كەلەسى كەزەڭگە الدىن-الا وتكىزىپ تاستاعان ەدى. ال ناتيجەسى نە بولعانى بارىمىزگە بەلگىلى.

ءسوز سوڭىندا ۇلتتىق قۇراماعا شاقىرتۋ العان فۋتبولشىلاردىڭ ءتىزىمىن نازارلارىڭىزعا ۇسىنىپ وتىرمىز. پرەمەر ليگادا تۇراقتى ونەر كورسەتەتىن ءوزى از عانا قازاقستاندىق فۋتبولشىلاردىڭ ۇلتتىق قۇرامادا نەگىزگى قۇرامعا جارايتىنى ساۋساقپەن سانارلىق دەۋگە بولادى. ەل چەمپيوناتىنداعى كوماندالار كوبىنە لەگيونەرلەرگە يەك ارتادى. شىنىن ايتقاندا، وسى جولى ۇلتتىق قۇراماعا شاقىرتىلعان ويىنشىلاردىڭ تەڭ جارتىسى ءوز كومانداسىنىڭ قوسالقى قۇرام ورىندىعىن توزدىرىپ جۇرگەندەر.

قاقپاشىلار: نەناد ەريچ («استانا»), ۆلاديمير پلوتنيكوۆ («قايرات»), دميترو نەپوگودوۆ («توبىل»);

قورعاۋشىلار: سەرگەي مالىي، ەۆگەني پوستنيكوۆ، دميتري شومكو، ابزال بەيسەبەكوۆ، يۋري لوگۆينەنكو (بارلىعى - «استانا»), عافۋرجان سۇيىمباەۆ، ايبول ابىكەن (ەكەۋى دە - «قايرات»), دميتري ميروشنيچەنكو («توبىل»);

جارتىلاي قورعاۋشىلار: دۋمان نارزىلداەۆ («قايسار»), يسلامبەك قۋات، باۋىرجان يسلامحان، يان ۆوروگوۆسكي، گەورگي جۋكوۆ (بارلىعى - «قايرات»), باكتيەر زاينۋتدينوۆ، سەرىكجان مۋجيكوۆ (ەكەۋى دە - «استانا»);

شابۋىلشىلار: ەركەبۇلان تۇڭعىشباەۆ («ورداباسى»), الەكسەي ششەتكين، رومان مۋرتازاەۆ (ەكەۋى دە - «استانا»), باۋىرجان تۇرىسبەك («توبىل»), ەركەبۋلان سەيداحمەت («ۋفا»، رەسەي).

قۋانىش قاپپاس

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3563