الماتى اكىمى باۋىرجان بايبەك ورتالىق مادەنيەت جانە دەمالىس ساياباعىنداعى جوندەۋ جۇمىستارىنىڭ قارقىنىن تەكسەردى، - دەپ حابارلايدى اباي-اقپارات الماتى اكىمدىگىنىڭ سايتىنا سىلتەمە جاساپ.

الماتىدا جالپى قالانى رەكونسترۋكتسيالاۋعا بيلىك تاراپىنان قولداۋ كورسەتۋ اياسىندا ساياباقتىڭ باسقارۋشى كومپانياسى جاڭا سۋ بۇرقاقاتار مەن سپورت الاڭدارىن سالۋدا. جەكە قارجىدان بارلىعى 1,6 ملرد. تەڭگە ينۆەستيتسيا رەتىندە جۇمسالۋدا.

قازىرگى كەزدە ورتالىق مادەنيەت جانە دەمالىس ساياباعى اينالاسىنا جاڭادان 182 جارىق دىڭگەكتەرى ورناتىلعان، تروۋتارلارعا كەسپە تاستار توسەلىپ، جاسىل ايماق كەڭەيتىلگەن.

ساياباق اۋماعى بىرنەشە تاقىرىپتىق ايماقتارعا بولىنگەن. ساياباق ورتالىعىندا بۇرىن اۆتوكولىك تۇراعى بولعان ەدى، قازىر مۇندا سكەيتودروم مەن روللەردروم، ستريت-ۆوركاۋت، تەننيس كورتى، باسكەتبول جانە بالالار الاڭدارى جۇمىس جاسۋدا.

بۇرىنان بار فونتانداردى قالپىنا كەلتىرۋ جانە جاڭاسىن سالۋ جۇمىستارىنا ەرەكشە نازار اۋدارىلعان. مىسالى، 10 جىلدان استام بويى تەككە تۇرعان سۋ بۇرقاقتى قالپىنا كەلتىرۋ جۇمىستارى اياقتالىپ قالدى. جازعى ساحنانىڭ شىعىس جاعىنا ەۆروپالىق قوندىرعىلاردى قولدانا وتىرىپ قۇرعاق فونتان سالىنۋدا.

بارلىق نەگىزگى جۇمىستار بيىلعى جىلدىڭ قازان ايىنا دەيىن اياقتالادى. بۇلاردان وزگە، باسقارۋشى كومپانيا جاڭا جانە زامانۋي اتتراكتسيونداردى ساتىپ الادى.

ايتا كەتەرلىگى، الماتىدا قالانىڭ تاريحي ورتالىعىن رەكونسترۋكتسيالاۋ ودان ءارى جالعاسۋدا.

وتكەن جىلى قالا بيلىگى پانفيلوۆ، جىبەك جولى، گوگول، قابانباي باتىر، تولەباەۆ، بايسەيىتوۆا كوشەلەرى مەن «استانا» الاڭىن قايتا جاڭىعرتقان بولاتىن.

ال بيىل اباي، ابىلاي حان، دوستىق، نازارباەۆ، جەلتوقسان داڭعىلدارى، «الماتى 2» تەمىرجول ۆوكزالىنىڭ اينالاسى جانە رەسپۋبليكا سارايى الدىنداعى الاڭ جوندەلۋدە.

قالادا ۇزىندىعى 500 كم بولاتىن 524 كوشە جوندەلدى. بارلىعى 3787 الماتى اۋلالارىنىڭ 1400 ء–ى اباتتاندىرىلدى. 800 كم ينجەنەرلىك جەلىلەر جوندەلدى جانە سالىندى. قالادا 300 كم ارىق جەلىسى جاڭاردى. قالانىڭ بارلىق وتپەلى جولدارى تولىق جوندەۋدەن ءوتتى.

Abai.kz