بەيسەنبى, 28 ناۋرىز 2024
قۇيىلسىن كوشىڭ 6104 3 پىكىر 6 تامىز, 2018 ساعات 17:34

Abai.kz قوزعاعان ماسەلە شەشىمىن تاپتى

كەزەكتى ەڭبەك دەمالىسىنان ورالسام، قۇزىرلى ورگاندارعا جازعان ءبىراز حاتتاردىڭ جاۋابى كەلىپ ۇلگەرىپتى. سونىڭ ءبىرى «استانا قالالىق كوشى-قون پوليتسياسى قۇجات قابىلداۋدىڭ ەش جەردە جوق «ۇلگىسىن» جاساپ الىپتى» اتتى ماقالامىزعا وراي كەلگەن جاۋاپ ەكەن.

ەستەرىڭىزدە بولسا، وسىدان ءبىراز ۋاقىت بۇرىن استانا قالالىق كوشى-قون پوليتسياسى قىزمەتى باسقارماسىنىڭ تۇراقتى تىركەۋگە تۇرۋعا جانە ازاماتتىق الۋعا ءوتىنىش بىلدىرگەن قانداستارىمىزدان قۇجات قابىلداعاندا قانداستارىمىزدىڭ ءوتىنىشىن، ءومىربايانىن توتە جازۋمەن (احمەت بايتۇرسىنۇلى الىپبيىمەن) جازدىرتىپ جانە ساۋالناما-ءوتىنىشىن توتە جازۋمەن (احمەت بايتۇرسىنۇلى الىپبيىمەن) تولتىرتىپ، ونى اۋدارما ورتالىقتارىنا ءبىزدىڭ قازىرگى قولدانىستاعى كيريلليتسا الىپبيىنە اۋدارتىپ، ول اۋدارمانى نوتاريۋسپەن بەكىتتىرىپ بارىپ قابىلداپ جاتقانى تۋرالى «Abai.kz» اقپاراتتىق پورتالىنا جازعان بولاتىنبىز. ماقالا جازىپ قانا قويماي، ول ماقالانى «اقەدىل» جاستار شىعارماشىلىعى قولداۋ قوعامدىق قورىنىڭ ديرەكتورى گۇلىسحان دومالايدىڭ اتىنان «نۇر وتان» پارتياسىنا تىركەتىپ، استانا قالاسىنىڭ پروكۋراتۋراسىنا جىبەرگەنبىز. قالالىق پروكۋراتۋرا ول حاتتى استانا قالاسى بويىنشا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمال دەپارتامەنتىنە انىقتاۋعا جولداپتى.

مىنە، سول قالالىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمال دەپارتامەنتى وتىنىشتە تىركەلگەن ماسەلە نەگىزىندە 16-30 مامىر ارالىعىندا استانا قالالىق ىشكى ىستەر دەپارتامەنتىنىڭ كوشى-قون قىزمەتى دەپارتامەنتىنە كەزەكتەن تىس تەكسەرۋ جۇرگىزىپ، قىزمەت ءتۇرى بويىنشا ارحيۆتەردى اقتارىپ، جاۋاپتى قىزمەتكەرلەردەن تۇسىنىكتەمە الىپتى.

دەپارتامەنت باسشىسى جانە ادەپ جونىندەگى كەڭەس توراعاسى س.تاسكيننىڭ قولى قويىلعان جاۋاپ حاتتا «تەكسەرىس بارىسىندا، قر ازاماتتىعىن الۋدى تىركەۋ مەملەكەتتىك قىزمەتىنە قاتىستى نورماتيۆتىك قۇقىقتىق اكتىلەر نورماسىنا ساي كەلمەيتىن تالاپتار انىقتالدى. كوشى-قون باسقارماسىنىڭ قىزمەتكەرلەرى مەن مەملەكەتتىك قىزمەت كورسەتۋ كەزىندە قىزمەتالۋشىلاردان ءوتىنىشتى، ساۋالنامانى جانە ءومىرباياندى مەملەكەتتىك نەمەسە رەسمي تىلدە بەرۋ مۇمكىندىگى جوق قىزمەتالۋشىلاردان كورسەتىلگەن قۇجاتتاردى ءوز قولىمەن تولتىرىپ، مەملەكەتتىك نەمەسە رەسمي تىلگە اۋدارۋدى جانە ونى نوتاريۋسپەن كۋالاندىرۋ تالاپتارى قويىلعان.  ياعني، ءسىزدىڭ وتىنىشىڭىزدە كەلتىرىلگەن فاكتىلەر راستالدى جانە تەكسەرىس بارىسىندا جويىلدى، سونداي-اق استانا قالالىق ىشكى ىستەر دەپارتامەنتىنىڭ باسشىلارىنا ءتيىستى ۇسىنىمدار جولداندى» دەلىنگەن.

ءسويتىپ، قانداستارىمىزدىڭ قۇجاتتانۋىنا قارجىلىق زيان جانە كەدەرگى كەلتىرتەتىن «بۇيرەكتەن شىعارىلعان» ءبىر سيراق كەسىلدى.

ايتپاقشى، ءبىز كوتەرگەننەن دەيىن بۇل كەلەڭسىزدىكتىڭ بەلەڭ العانىنا ءبىرشاما ۋاقىت بولعان. وكىنىشكە وراي، ءبىزدىڭ قويدان قوڭىر، قوزىدان مومىن قانداستارىمىز «ايتساق، بالە بولادى!» دەپ، ايتقانعا كونىپ، ايداعانعا جۇرە بەرگەن عوي.

ەستەرىڭىزدە بولسىن، زاڭدار مەن نورماتيۆتىك قۇجاتتاردا  تۇراقتى تىركەۋگە تۇرعاندا نەمەسە ازاماتتىققا قۇجات تاپسىرعاندا بارلىق قۇجات قولمەن جازىلسىن دەگەن تالاپ جوق، كومپيۋتەرمەن تەرىپ اكەلسە دە بولا بەردى. بۇل – ءبىر.

ەكىنشىدەن، «ايتساق، بالە بولاتىن!» تۇگى دە جوق، ايتۋ كەرەك، جازۋ كەرەك. قانداستارىمىز سەرگەك قيمىلداپ، زاڭ تالاپتارىن ساقتاۋ تۋرالى كوشى-قون قىزمەتكەرلەرىنە تالاپ قويا ءبىلۋى ءتيىس! ەگەر، قولدا بار زاڭنىڭ مۇمكىندىگىن پايدالانا الماساق، سورلاعانىمىز – سورلاعان! ەلباسىنىڭ قولى قويىلعان زاڭدى دۇرىس اتقارۋ جانە اتقارتۋ بارىمىزگە پارىز!

اتالعان كەلەڭسىزدىك تۋرالى الماتىدان ىرىسبەك توقتاسىنۇلى باۋىرىمىز تەلەفون شالىپ، ونىڭ جيەنى كومەكتەسىپ ءجۇرىپ، توتە جازۋعا اۋدارىلىپ، نوتاريۋستالعان قۇجاتتىڭ كوشىرمەسىن ءبىر اعايىننان زورعا الىپ، بۇل ماسەلەنى ءبىزدىڭ كوتەرۋىمىزگە مۇمكىندىك تۋدى. ايتپەگەندە، بۇگىن استانادا باستالعان بۇل زاڭسىزدىق ەرتەڭ اقمولادا، ارعى كۇنى قوستانايدا... جالعاسىپ، بۇكىل رەسپۋبليكا كولەمىندە قانات قاعار ما ەدى، كىم بىلەدى؟!

سول ءۇشىن، استانا قالاسى بويىنشا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمال دەپارتامەنتىنە زور العىس ايتامىن!

اۋىت مۇقيبەك

06.08.2018

استانا

Abai.kz

 

3 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3524