بۇگىن قوعامدىق كەڭەس الاڭىندا قالالىق بەلسەندىلەردىڭ، ۇكىمەتتىك ەمەس ۇيىمدار مەن قالا تۇرعىندارىنىڭ قاتىسۋىمەن الماتى قالاسىندا قوعامدىق قاۋىپسىزدىكتى قامتاماسىز ەتۋ بويىنشا وتكەن تىڭدالىمدا قوعامدىق كەڭەس توراعاسى راحمان الشانوۆ:

"جۇرتشىلىق تاراپىنان ءارتۇرلى قاۋىپسىزدىك جۇمىستارىنا قاتىستى كوپتەگەن ۇسىنىستار كەلىپ ءتۇستى. مىسالى، 102 كولل-ورتالىعىنىڭ جۇمىسىن جاقسارتۋ قاجەت. بۇل ورتالىق قىزمەتكەرلەرىنىڭ سانىن كوبەيتۋ قاجەت، سەبەبى، كوپ جاعدايدا ادامدار قوڭىراۋ شالىپ، حابارلاسا الماي جاتادى. سونىمەن قاتار، تۇرعىندار امنيستيا جانە پروباتسيا جۇيەسى ارقىلى بوساتىلعان سوتتالعان ازاماتتاردى بەيىمدەۋ مەن وڭالتۋعا قاتىستى جاعدايعا الاڭداۋشىلىق ءبىلدىردى. قالالىق ىشكى ىستەر دەپارتامەنتى مەن اۋداندىق پوليتسيا بولىمشەلەرىنىڭ باسشىلارىنا KPI ەنگىزۋ قاجەتتىگى تۋرالى ماسەلە بەلسەندى تالقىلاندى. سونداي-اق، جالاقى تۋرالى، كاسىبي كادرلاردى ىرىكتەۋ ماسەلەلەرى دە بار", - دەدى.

ءوز كەزەگىندە قوعامدىق كەڭەستىڭ مۇشەسى مارات شيبۋتوۆ ازاماتتار مەن پوليتسيانىڭ ۇساق قۇقىق بۇزۋشىلىقتارعا توزىمسىزدىك ماسەلەسىن كوتەردى.

"الەۋمەتتىك جەلىلەردە تۇرعىندار ۇساق قۇقىق بۇزۋشىلىقتاردىڭ كوپ جاعدايدا اياقسىز قالاتىنىن جازادى. سول سەبەپتى ادامداردىڭ پوليتسياعا دەگەن سەنىمى جوعالادى. ەگەر جوعالعان كارىز ليۋگى نەمەسە تەلەفوندى ۋاقىتىلى تابا الماسا، وندا ولاردىڭ ەلەۋلى ۇرلىق نەمەسە قاراقشىلىققا قاتىستى ءىستى اشا الاتىنىنا سەنۋ قيىن. سوندىقتان پوليتسيا بۇل ماسەلەگە نازار اۋدارۋى كەرەك", - دەگەن پىكىرىمەن ءبولىستى مارات شيبۋتوۆ.

بۇگىنگى وتكەن تىڭدالىمنىڭ قورىتىندىسى بويىنشا ايتىلعان بارلىق ۇسىنىستاردى قوعامدىق كەڭەس زاڭدى تۇرعىدان قازاقستان رەسپۋبليكاسىنىڭ ۇكىمەتى مەن پارلامەنتىنە جولدايتىن بولادى.

جالپى ايتىپ وتەر بولساق، جۇرتشىلىق قۇقىق قورعاۋ ورگاندارىنىڭ باسشىلىعىنان اتالعان ۇسىنىستار بويىنشا ناقسى ءىس-ارەكەتتەر كۇتەدى.

Abai.kz