جاڭادان قۇرىلعان تۇركىستان وبلىسى بيىلعى استانا كۇنىنە ەلدەن ەرەك ءھام قوراش سىيلىق جاسادى. وڭتۇستىكتە ءبىر-اق كۇندە 26 كوشەنىڭ اتاۋى استانا دەپ وزگەرىتىلىپ شىعا كەلگەنىن ەستىپ، نە كۇلەرىمىزدى، نە جىلارىمىزدى بىلمەي قالدىق. بۇل نە، جاعىمپازدانۋ ما، جوق الدە شىنىمەن استاناعا دەگەن ماحاببات پا؟

راس. استانا - ەلىمىزدىڭ ورداسى. مەملەكەتىمىزدىڭ تۋ تىككەن - التىن قازىعى.

باس قالامىز سولتۇستىككە كوشكەندە اقمولا اتاۋى كوپ ادامعا ۇناماعانى بەلگىلى. سول تۇستا بۇ قالاعا لايىقتى اتاۋ بەرۋ دە قيىن بولدى. "ار تارت، بەرى تارتپەن" ءجۇرىپ قالانى "استانا" دەپ اتاي سالدىق. مۇنىڭ ءوزى ايتەۋىر ءبىر اۋىساتىن اتاۋ ەكەنىن قازىر بار قازاق بىلەدى.

ءتىپتى دۇركىن-دۇركىن "ەلوردانىڭ اتىن نۇرسۇلتان قالاسى دەپ اتايىق" دەگەن ماسەلە كوتەرىلىپ كەلەدى.

ەلباسى بۇل باستامانى قولداماسا، تاريحي بوزاق اتاۋى قويىلار. قىپشاق حاندىعىنىڭ استاناسى بولعان بوزاق كونە اتاۋ دەيتىندەر بولسا، "قاراوتكەل" دەگەن تاريحي اتاۋى تاعى بار. ءتىپتى، تاريحي اتاۋ قالپىنا ءتۇسىپ، باياعى ءبىز قاشقان "مولا" ءسوزى قايتا ورالىپ، "اقمولا" اتاۋىن قايتا الار.

ايتەۋىر، ءبىر اقيقات بار. بۇ قالانىڭ اتاۋى وتە جاقىن مەرزىمدە وزگەرەدى. سول وزگەرەتىن قالانىڭ اتاۋىنا ءبىر ەمەس، ەكى ەمەس، 26 كوشەنىڭ اتىن ءبىر-اق كۇندە بەرە سالۋ قانشالىقتى قيسىندى؟ بۇل كوشەلەردىڭ بۇرىنعى اتاۋلارى قانداي ەدى؟

ءبىزدىڭ قازاقتا داراقىلىق باسىم. تۇيمەباەۆ بيىل 26 كوشەنى استانا دەپ اتاسا، ودان اسىپ تۇسكىسى كەلەتىندەر كەلەر جىلى اشىق الامانعا ءتۇسىپ كەتۋى مۇمكىن.

سوسىن ون شاقتى جىلدان كەيىن قازاقستانداعى مىڭداعان استانا كوشەلەرىنەن قۇتىلا الماي دال بولۋىمىز ابدەن مۇمكىن.

بۇل ءبىزدىڭ بۇگىنگى تاريح دەيتىن شىعارمىز. دەسە دە كەشە عانا "لەنين", "كالينين", "كوممۋنيزم", ت.ب جۇزدەگەن اتتان ارەڭ-ارەڭ قۇتىلىپ كەلە جاتقان ەل رەتىندە ءسال ويلانعانۋعا بولماس پا ەدى؟

ءشارىپحان قايسار

Abai.kz