جەكسەنبى, 1 قاراشا 2020
COVID-19 قازاقستاندا. جۇقتىرعاندار — 111953. جازىلعاندار — 106310. قايتىس بولعاندار — 1825
كۇبىرتكە 12616 30 پىكىر 19 ماۋسىم, 2018 ساعات 13:54

سايراگۇل ايىنا 8 كۇن حانزۋدىڭ ۇيىنە تۇنەۋگە مىندەتتەلگەن

قىتايدان بالالارى ءۇشىن شەكارا بۇزىپ، ەلگە جاسىرىن كەلگەن سايراگۇل ساۋىتبايدىڭ تەرگەۋى تالدىقورعان قالاسىندا جۇرگىزىلىپ جاتىر. بۇل تۋرالى تالدىقورعاننان ءتىلشىمىز نۇرگەلدى ابدىعاني حابارلادى.

بيىلعى جىلدىڭ ءساۋىر ايىنىڭ ورتاسىندا "مەنى ول جاقتا ءولىم كۇتىپ تۇرعان ەدى... و جاقتا دا ءبىر ءولىم، بۇ جاقتا دا ءبىر ءولىم ەكەن، ەندەشە قۇلىندارىما جەتىپ ءبىر-اق جىعىلايىن، بالاپاندارىمدى ءبىر يىسكەپ، قازاقستاندا ولسەم ارمانىم جوق..." دەپ شەكارانى بۇزىپ وتكەن باتىر انانى مامىردىڭ 22-ءسى كەشكە 09.00-09.30-دار شاماسىندا شەكارا قىزمەتكەرلەرى بالپىق بي اۋىلىنداعى ۇيىندە وتىرعان جەرىنەن ۇستاپ اكەتكەن.

بىزگە بۇل تۋرالى سايراگۇلدىڭ قاينىسى نۇربولات اسان حابارلاپ، باسىلىمداردان العاش بولىپ اتالعان تاقىرىپتى قوعام تالقىسىنا تاستاعان ەدىك.

سودان كەيىن جاركەنتتىڭ ۋاقىتشا تەرگەۋ يزولياتورىندا قاماۋدا بولعاندا ءتىلشىمىز قوعام بەلسەندىلەرىمەن بىرگە ارنايى بارىپ، سايراگۇلدىڭ قال-جايىن ءبىلىپ قايتقان-دى. ءبىر-ەكى اپتا بۇرىن سايراگۇل تالدىقورعانداعى ۋاقىتشا قاماۋ يزولياتورىنا اۋىستىرىلدى.  

بۇگىن سايراگۇلدىڭ جايىن تاعى قاۋزاماق بولىپ ءبىر توپ بەلسەندى تالدىقورعان قالاسىندا ءجۇر. ولاردىڭ اراسىنداعى ءتىلشىمىز بىزگە تومەندەگى جاعدايلاردى حابارلادى.

بۇگىنگى تەرگەۋ پروتسەسىنە ادۆوكات ابزال قۇسپان قاتىسىپ شىقتى.

ابزال قۇسپان، ادۆوكات:

- سايراگۇلدىڭ جاعدايى جامان دەي المايمىن. سايراگۇلمەن بىرگە دينا يسكاكوۆا دەگەن جۋرناليست وتىر ەكەن. سول كىسى ارقىلى بۇقارالىق اقپارات قۇرالدارىندا جاريالانىپ جاتقان ماقالالارمەن تانىسىپتى. ء"بارىن ءبىلىپ وتىرمىن. مەنىڭ تاعدىرىما الاڭداعان ەلگە، حالىققا ريزاشىلىعىمدى بىلدىرەمىن" دەدى. سونان سوڭ، سايراگۇلدى ءبىر عانا سۇراق مازالايتىنىن ايتتى. "قازاقستاندا قالا الامىن با؟، جوق پا؟". ءبىز الداعى ۋاقىتتا وسى سۇراققا جاۋاپ بەرۋ ءۇشىن ىزدەنەتىن بولامىز. سايراگۇلدىڭ قر قىلمىستىق كودەكسىنىڭ 392 بابىنىڭ 1 تارماعىن (قازاقستان شەكاراسىن زاڭسىز كەسىپ ءوتۋ) بۇزعانى راس. قىلمىس جاساۋدىڭ ءموتيۆى دەگەن نارسە بار. پايداكۇنەمدىك ماقساتىندا ما، جوق باسقا دا سەبەبى بار ما، سول زاڭ شەڭبەرىندە قارالۋى كەرەك. تەرگەۋشىلەر سايراگۇلدىڭ وتباسى ءۇشىن شەكارا بۇزىپ وتكەنىن باسا نازاردا ۇستاپ وتىر. تەرگەۋ قۇپيالىعىن جاريالاماۋ تۋرالى قولحات بەرگەنمىن. سوندىقتان مۇنان وزگە ەشتەڭە ايتا المايمىن. قازاقستاننىڭ تۇرمەسى قىتايدىڭ تۇرمەسى ەمەس قوي. بۇگىن، ەرتەڭ بالالارىمەن كەزدەسە الادى. وسىنىڭ ءوزى - ۇلكەن قۋانىش. 

بۇگىنگى كۇنگە دەيىن Abai.kz اقپاراتتىق پورتالى سايراگۇل ساۋىتباي ىسىنە قاتىستى وننان اسا ماقالا جازدى. وسى ماقالالار ارقىلى ء"بىر ادامنىڭ تاعدىرى - ۇلتتىڭ تاعدىرى" ەكەنىن بۇقاراعا دالەلدەدىك دەپ ويلايمىز. 

قازىر سايراگۇلدىڭ جولداسى ءۋالي ءسىلام، ۇلى ۇلاعات، قىزى ۇكىلاي، قاينىسى نۇربولات، قوعام بەلسەندىلەرى ساۋلە ابدىلداحانقىزى، Cەرىكجان ءبىلاش، قىدىرالى ورازۇلى سەكىلدى ازاماتتار تالدىقورعاننان الماتىعا قايتادى. سولارمەن بولعان اڭگىمەدەن ءبىزدىڭ ءتىلشىمىز مىنانداي دەرەكتەردى ەستىگەنىن ايتتى.

سايراگۇل ساۋىتبايدىڭ قامالماي تۇرىپ ايتقان سوزدەرى

سايراگۇل ساۋىتباي قامالاردان بۇرىن...

"ادام قانشالىقتى سىرلى بولسا، قۇپياسىن ىشىندە ۇستاسا، سونىسىمەن قادىرلى، ءارى قاۋىپسىز بولادى. مەنىڭ قىتايدان تۇرمەگە قامالماي قاشىپ شىعۋىما وسى قاسيەتىم سەبەپكەر بولدى. مەن تاۋەكەلگە بەل بۋىپ قاشىپ ءوتتىم" .

"قىتايدا ساياسي ۇيرەنۋ مەكتەبىنە ادام اپاراتىن ەدىم. سول جەردە قىزمەت ىستەيتىن قىتاي قىزى "جاقىندا سەنى قامايدى" دەدى. قامالاتىنىم، انىق بولعان سوڭ، شەكارانى بۇزىپ وتۋگە ىشتەي دايىندالا باستادىم. ونىڭ ۇستىنە بويداق قازاق كەلىنشەكتەرىن قىتاي ۇيىنە ايىنا سەگىز مارتە قوندىرۋ ماسەلەسى مىندەتتەلدى. ماعان دا وسىنداي اۋىر مىندەت ارتىلدى. قۇداي وڭداپ، ماعان تانىس حانزۋدىڭ ءۇيى بۇيىردى. وعان كۇنىنە 20 يۋان اقشا بەرىپ، "قوندى" دەپ قول قويعىزىپ الىپ ءجۇردىم. كەش باتا حانزۋدىڭ ۇيىنە كىرەمىن دە شارباعىنان سەكىرىپ شىعىپ، اۋىلدىڭ شەتىمەن ءوز ءۇيى بارامىن. ءوز ۇيىمە دە باقشا ارقىلى كىرىپ، جارىق جاقپاي تۇنەيتىنمىن. وسىنداي ساياساتتى كورگەن مەندە شەكارا بۇزۋدان باسقا امال قالعان جوق", - دەگەن ەكەن.

ءتۇيىن

قوش! ءبىر عانا سايراگۇلدىڭ جايى - بۇكىل قىتايداعى قازاقتىڭ تاعدىرىن كوز الدىمىزعا كەلتىرەدى. سوندىقتان دا، ءبىزدىڭ قۇزىرەتتى ورگاندار سايراگۇل ساۋىتبايعا كەشىرىممەن قاراپ، بوستاندىققا شىعارۋعا ءتيىس. سايراگۇل سەكىلدى ازاماتتاردىڭ بارىنە ازاماتتىقتى جىلدام جاساپ، ءوز قازاعىمىزعا قورعان بولا الساق، ۇرپاق الدىنداعى مىندەتىمىزدىڭ ورىندالعانى...

قانات بىرلىكۇلى

نۇرگەلدى ابدىعاني

Abai.kz

 

30 پىكىر