نۇرسۇلتان نازارباەۆ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆتى قابىلدادى. بۇل تۋرالى "Abai.kz" اقپاراتتىق پورتالى حابارلايدى.

كەزدەسۋ بارىسىندا ەلباسىعا اگەنتتىكتىڭ مەملەكەتتىك قىزمەت سالاسىنداعى اتقارعان جۇمىستارى مەن سىبايلاس جەمقورلىققا قارسى ءىس-قيمىل بويىنشا  قولدانعان شارالارى جونىندە ەسەپ بەرىلدى.

نۇرسۇلتان نازارباەۆقا فاكتورلى-باللدىق تولەم جۇيەسىنىڭ مەملەكەتتىك قىزمەتكە ەنگىزىلۋى جونىندەگى پيلوتتىق جوبانىڭ ىسكە اسىرىلۋ بارىسى تۋرالى دا باياندالدى.

قازاقستان پرەزيدەنتى جەمقورلىققا قارسى كۇرەستىڭ تيىمدىلىگىن ارتتىرۋدىڭ ماڭىزدىلىعىنا ەرەكشە نازار اۋدارىپ، ءتيىستى الدىن الۋ شارالارىن جۇرگىزۋ قاجەتتىگىن ايتتى.

– بارلىق سالادا جەمقورلىققا قارسى كۇرەس كۇشەيتىلۋگە ءتيىس. بىرىنشىدەن، ءتيىستى مونيتورينگ جۇرگىزىپ، مەملەكەتتىك قىزمەت كورسەتۋدى تسيفرلىق فورماتقا كوشىرۋ جۇمىستارىن جالعاستىرۋ قاجەت. ەكىنشىدەن، مەملەكەتتىك قىزمەتشىلەردىڭ جالاقىسى جونىندەگى ماسەلەنى شەشۋ كەرەك. ۇشىنشىدەن، باسشىلىقتىڭ جاۋاپكەرشىلىگىن ارتتىرۋ ماڭىزدى، – دەدى مەملەكەت  باسشىسى.

كەزدەسۋ بارىسىندا اليك شپەكباەۆ جەمقورلىققا قارسى ساياساتتى جۇزەگە اسىرۋ جولىندا قولدانىلىپ جاتقان شارالار مەن ونى حالىقارالىق ساراپشىلار قوعامداستىعىنىڭ باعالاۋ ناتيجەلەرى تۋرالى مالىمەت بەردى.

كەزدەسۋ قورىتىندىسى بويىنشا نۇرسۇلتان نازارباەۆ بىرقاتار ناقتى تاپسىرما بەردى.

Abai.kz