ماۋسىم ايىنىڭ 16-سى مەن 29-ى ارالىعىندا استانادا دۇنيەجۇزىلىك تەاتر فەستيۆالى وتەدى. بۇل تۋرالى مادەنيەت جانە سپورت مينيسترلىگىندە وتكەن باس قوسۋدا  «قازاقكونتسەرت» مكۇ ديرەكتورى جەڭىس سەيدوللاۇلى مالىمدەدى بىلتىر العاش وتكىزىلگەن فەستيۆال بەلگىلى تەاتر جانە كينو اكتەرى ءاسانالى ءاشىموۆتىڭ 80 جىلدىق مەرەيتويىمەن بايلانىستىرىلسا، بيىلعى فەستيۆال ەلوردانىڭ 20 جىلدىعىنا ارنالماق.

بيىل ەكىنشى رەت وتكىزىلگەلى وتىرعان فەستيۆالگە ۇزدىك قويىلىمدارىن قازاقستاندىق ونەر ۇجىمدارىمەن بىرگە  الەمدىك تەاتر ۇجىمدارى ۇسىنباق. قازاقستان تەاترلارى اسسوتسياتسياسىنىڭ پرەزيدەنتى ءاسانالى ءاشىموۆ «استانا» تەاتر فەستيۆالى حالىقارالىق دارەجەدەگى  ىرى مادەني ءىس-شارا ەكەندىگىن جانە فەستيۆالگە قاتىساتىن تەاتر سىنشىلارى جونىندە بايانداي كەلە، وتاندىق تەاتر سىنشىلارى مەن ونەر تاقىرىبىن قاۋزايتىن جۋرناليستەرگە كوڭىلى تولمايتىنىن ايتىپ قالدى. سونىمەن قاتار ونەر مايتالمانى كورەرمەن دەڭگەيىنىڭ ءالى دە لايىقتى دارەجەگە كوتەرىلمەي وتىرعانى قىنجىلتاتىنىن باسا ايتتى.

م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى اسحات ماەميروۆ ونەر قايراتكەرىنىڭ ءسوزىن جالعاپ، تەاتر ونەرىندەگى كاسىبي شىعارماشىلىق ىنتىماقتاستىقتى جەتىلدىرۋ ماقساتىندا فەستيۆالگە رەسەيدەن، ليتۆا، فرانتسيا، جاپونيا، ۇلىبريتانيا، باسقا دا مەملەكەتتەردىڭ بەلگىلى تەاتر سىنشىلارى مەن دراماتۋرگتەرى قازاقستاندىق جاستارعا شەبەرلىك سىنىپتارىن وتكىزەتىنىنە توقتالدى.

سونىمەن بىرگە فەستيۆال شەڭبەرىندە بەلگىلى فرانتسۋزدىق كينو جانە تەاتر اكتريساسى، وسكار سىيلىعىنىڭ، كانن كينوفەستيۆالىنىڭ «التىن پالما بۇتاعى» جۇلدەسىنىڭ، بەرلين، ۆەنەتسيا كينوفەستيۆالدەرى سىيلىعىنىڭ يەگەرى جيۋلەت بينوشتىڭ ونەرىن تاماشالاۋ ءساتى تۇسپەك.

 «قۇرمەت» جانە «پاراسات» وردەندەرىنىڭ يەگەرى، تەاتر جانە كينو اكتريساسى مەرۋەرت وتەكەشەۆا مۇنداي تەاتر فەستيۆالدەرىنىڭ وتكىزىلۋى –  جاستار ءۇشىن ماڭىزدى ءۇردىس، سەبەبى ءبىزدىڭ جاستار وزگە ەلدىڭ تەاتر ۇجىمدارىنىڭ ونەرىن تاماشالاپ قانا قويماي، مول تاجىريبە الماسادى. وسىنداي حالىقارالىق تاجىريبە وتاندىق رەجيسسەرلەر، تەاترتانۋشىلار مەن اكتەرلەر ءۇشىن وتە ماڭىزدى ەكەنىن ايتتى.

ءىى دۇنيەجۇزىلىك تەاتر فەستيۆالىنىڭ شىمىلدىعى 16 ماۋسىم كۇنى «قازاقستان» ورتالىق كونتسەرت زالىندا اشىلادى.

Abai.kz

.