قىرعىزستان مەن وزبەكستان شەكاراسى اشىلعان سوڭ، قۇرىلىس جانە اۋىل شارۋاشىلىعى سالالارىندا جۇمىس ىزدەپ كەلگەن وزبەكستاندىقتار كوبەيگەن. بىشكەكتەگى، شەكاراعا جاقىن وش، باتكەن جانە جالال-اباد وبلىستارىنداعى جۇمىس بەرۋشىلەر جۇمىسى تياناقتى، اقىسى ارزان وزبەك ميگرانتتارىن جوعارى باعالايدى.

قازىر جالال-اباد وبلىسىنىڭ ماقتا القابتارىندا وزبەكستاننان كەلگەن جاس كەلىنشەكتەر جۇمىس ىستەپ ءجۇر. ءبىر كۇن جۇمىسقا جەرگىلىكتى تۇرعىندار ولارعا 250-300 سوم (3,5–4,5 دوللار) تولەيدى. ميگرانتتار جۇمىس بەرۋشىنىڭ ۇيلەرىندە تۇرادى.

وش، جالال-اباد جانە باتكەن وبلىستارىندا وزبەكستاننان كەلگەن قۇرىلىسشىلاردى وڭاي تابۋعا بولادى. قازىر ولاردى كوپ قاباتتى تۇرعىن ۇيلەردىڭ قۇرىلىسىندا ءجيى كەزىكتىرەسىڭ.

نووكات اۋدانىنىڭ تۇرعىنى سايدۋللا كەريموۆ سارايىن تۇرعىزۋ ءۇشىن وزبەكستاننان بىرنەشە جۇمىسشى جالداعان. ونىڭ ايتۋىنشا، وزبەك جۇمىس كۇشى الدەقايدا ارزانىراق. ء"بىز ولاردىڭ ەسەپكە تۇراتىنىن بىلەتىنبىز، بىراق رۇقسات قۇجاتتار الۋ كەرەكتىگىن بىلمەپپىز. مەملەكەت بۇل جاعىن ءتۇسىندىرۋى كەرەك", - دەدى ول.

زاڭعا سايكەس، وزبەكستان ازاماتى قىرعىزستانعا كىرگەن بەسىنشى كۇنى تىركەلۋى كەرەك، ايتپەسە وعان 10 مىڭ سوم (شامامەن 150 دوللار) ايىپپۇل سالىنادى. زاڭ بۇزۋشىلىق قايتالانسا، وزبەكستان ازاماتىن دەپورتاتسيالايدى.

شەتەل ازاماتىنا رۇقسات قۇجاتتار بۇل ورىنعا قىرعىزستان ازاماتى تالاسپاعان جاعدايدا عانا بەرىلەدى. رۇقساتسىز جۇمىس ءۇشىن 10 مىڭ سوم (شامامەن 150 دوللار) ايىپپۇل سالىنادى. قىرعىزستانداعى جۇمىس بەرۋشىگە قاتىستى قىلمىستىق جاۋاپكەرشىلىك قاراستىرىلعان.

Abai.kz اقپاراتتىق پورتالىندا جاريالانعان ماقالاعا پىكىر ايتىپ، ويىڭىزدى بىلدىرگىڭىز كەلسە،مىنا پاراقشاعا جازىپ قالدىرىڭىز!

Abai.kz