جۇما, 29 ناۋرىز 2024
4342 0 پىكىر 27 ءساۋىر, 2018 ساعات 12:23

XV ەۋرازيا مەديا فورۋمىنا تىركەۋ باستالدى

2018  جىلدىڭ 22-24 مامىر كۇندەرى الماتى قالاسىنداعى The Ritz Carlton وتەلىندە ون بەسىنشى ەۋرازيالىق مەديا فورۋم وتەدى. فورۋم جىل سايىن 60-تان استام ەلدەن 500-دەن اسا دەلەگاتتار جينايدى، - دەپ حابارلايدى Abai.kz اقپاراتتىق پورتالى. 

ورتالىق ازياداعى تاۋەلسىز ديالوگ الاڭى رەتىندەگى ەۋرازيا مەديا فورۋمىنىڭ باستى ميسسياسى - ساراپشىلار، ساياساتكەرلەر، ەكونوميستەر، قوعامدىق پىكىر يەلەرىنىڭ قاتىسۋىمەن قازاقستاننىڭ، ەۋرازيانىڭ، ءتىپتى بۇكىل الەمدىك قاۋىمداستىقتىڭ ەكونوميكالىق، گەوساياسي، الەۋمەتتىك مادەني ماسەلەلەرىن تالقىلاۋ.

فورۋم ءوز تاريحىندا 6000 اسا شەتەلدىك قاتىسۋشىلاردى، ولاردىڭ قاتارىندا تانىمال جۋرناليستەر، بەلگىلى ساياساتكەرلەر، مىقتى ەكونوميستەر، نوبەل سىيلىعىنىڭ لاۋرەاتتارى، قوعام قايراتكەرلەرى، عالىمدار مەن كاسىپكەرلەردى قازاقستانعا جينادى.

ەمف سپيكەرلەرى قاتارىندا: يسلام رەسپۋبليكاسىنىڭ ەكس-پرەزيدەنتى يران موحامماد حاتامي، اۋعانستاننىڭ 12-ءشى پرەزيدەنتى حاميد كارزاي، امەريكاندىق ديپلوماتتار ريچارد حولبرۋك پەن ريچارد پەرل، اقش-تىڭ بۇرىنعى كونگرەسسمەنى حارولد فورد، ۇلىبريتانيانىڭ سىرتقى ىستەر ەكس-ءمينيسترى دجەك سترو، گرەتسيانىڭ تۋريزم ەكس-ءمينيسترى جانە پارلامەنت مۇشەسى  ولگا كەفالويانني، بريتاندىق فۋتۋرولوگ رەي حامموند، ۆلاديمير پوزنەر، ماكسيم شەۆچەنكو، ميحايل لەونتەۆ، پيتەر لاۆەل، پولا سليەر، ستيۆەن كوۋل، نيك گوۋينگ سىندى تانىمال جۋرناليستەر،  يتار-تاسس اقپاراتتىق اگەنتتىگىنىڭ جەتەكشىلەرى ۆيتالي يگناتەنكو مەن ميحايل گۋسمان، جازۋشى شىڭعىس ايتماتوۆ، رف ۇكىمەتىنىڭ بۇرىنعى باسشىسى ەۆگەني پريماكوۆ، ودكب باس حاتشىسى نيكولاي بورديۋجا، اقش-تىڭ ۇلتتىق قاۋىپسىزدىك بويىنشا بۇرىنعى كەڭەسشىسى زبيگنەۆ بجەزينسكي جانە ت.ب. بولدى.

ەۋرازيا مەديا فورۋمى 3 كۇن وتەدى. جيىندا 7 پلەنارلىق سەسسيا بولادى. الەمدىك ساراپشىلار شەبەرلىك دارىسىنە ءبىر كۇندى ارنايدى.

فورۋم قوناقتارىن  جاڭا پىكىرتالاس الاڭى،  قىزىقتى تاقىرىپتار، مازمۇندى اڭگىمە، سپيكەرلەردىڭ تانىمال شوعىرى كۇتەدى. بۇل جولعى فورۋم «ەۆوليۋتسيانىڭ 15 جىلى: الەم وزگەرىسى مەن ءبىزدى وزگەرتۋى».

بۇل رەتتە، فورۋم ۇيىمداستىرۋشىلارى قازاقستاننىڭ الەم الدىنداعى بەدەلىنىڭ كۇن ساناپ ارتىپ كەلە جاتقاندىعىن، فورۋمنىڭ مۇندا ءتيىمدى ءارى زاماناۋي قۇرال رەتىندە ءرولىن اتاپ وتپەكشى. فورۋم ءوزىنىڭ بەلسەندى جۇمىسىنىڭ ارقاسىندا بۇگىندە دۇنيە ءجۇزى بويىنشا بەدەلدى مەديا الاڭ اتانعان. ونىڭ دالەلى رەتىندە 1500 ايتۋلى باق: Euronews, CNN, BBC, Associated Press Television News, Reuters, Bloomberg, New York Times, Al Jazeera English, يتار-تاسس، ريا «نوۆوستي»، ربك، Russia Today, پەرۆىي كانال، يا «دجيحان» جانە ت.ب. قاتىسقاندىعى بولا الادى.

بيىلعى فورۋم تاقىرىپتارى: «حالىقارالىق قارىم-قاتىناستاعى ەۆوليۋتسيا»، «ەۋروپالىق وداق ەۆوليۋتسياسى»، «قورشاعان ورتا ەۆوليۋتسياسى»، «اقپاراتتىق تەحنولوگيالار: ناقتى دەرەك پەن فەيك جاڭالىقتار»، «بلوگسفەرانىڭ كۇشەيۋى: پروگرەسس پە، الدە قاۋىپ پە؟» جانە تاعى باسقا.

ال، ناقتى بيىلعى فورۋمنىڭ قاتىسۋشىلارى قاتارىندا – مەملەكەتتىك قايراتكەر، ەكس-پرەمەر-مينيستر، يتاليا پارلامەنتىنىڭ سەناتورى ماتتەو رەنتسي، باق بوستاندىعى بويىنشا ەقىۇ (وبسە) وكىلى ارلەم دەزير، امەريكالىق پوليتتەحنولوگ، باراك وباما پرەزيدەنتتىگى كامپانياسىنىڭ ەكەۋىندە دە كەڭەسشى بولعان رودجەر فيسك، ۇلىبريتانيا سىرتقى ىستەر مينيسترلىگىنىڭ ءباسپاسوز حاتشىسى سايمون ماكدجي، گرۋزيانىڭ ەكس ءبىلىم ءمينيسترى حاتيا دەكانويدزە، ۆۆس تەلەارناسىنىڭ جاڭالىقتار ءبولىمىنىڭ رەداكتورى گەۆين حيۋيتت، حالىقارالىق ساياسات بويىنشا فرانتسۋز ساراپشىسى، Le Figaro گازەتىنىڭ شولۋشىسى رەنو جيرار، جاپونيانىڭ تۇراقتى ەنەرگەتيكانى دامىتۋ ينستيتۋتىنىڭ ديرەكتورى تەتسۋناري يدا، رەسەي ءجۋرناليستى، پروديۋسەر، ءارى تەلەجۇرگىزۋشى سوفيكو شەۆاردنادزە، سەناتور، اقش-تىڭ قىتاي حالىق رەسپۋبليكاسىنداعى ەلشىسى ماكس باۋكاس، بۇۇ حالىقارالىق «بۇۇ – ايەلدەر» ءبولىمىنىڭ ورتالىق ازيا بويىنشا باسشىسى يلەين كونكيەۆيچ.

سونىمەن قاتار، مەرەيتويلىق فورۋمنىڭ باعدارلاماسىندا بىرنەشە اۆتورلىق ماستەر-كلاسستار ۇيىمداستىرىلىپ وتىر. وندا شۋبەرت مەديا كونسۋلتانتى تايرا شۋبەرت، تانىمال جۋرناليست شاحيدا ياكۋب، Hashtag Our Stories جوباسىنىڭ نەگىزىن قالاۋشىلاردىڭ ءبىرى يۋسۋف ومار، ساياساتكەر بارتوش رىدلينسكي، CEO Select Communication Group باسشىسى ۆيكتور ەليسەەۆتەر بار.

«ەۋرازيالىق مەديا فورۋمنىڭ بيىلعى كونتەنتى ءداستۇرلى تۇردە زاماناۋي وزەكتى بىرقاتار ماسەلەلەردى تالقىلايتىن بولادى. ولاردىڭ قاتارىندا، اقپاراتتىق تەحنولوگيالاردىڭ قارقىندى ءوسۋى، تۇراقتى دامۋدىڭ بىردەن-ءبىر شارتى رەتىندە «جاسىل ەكونوميكا» تۇجىرىمداماسى، تاعى باسقا كوپتەگەن ماسەلەلەر كوتەرىلەدى. بۇل رەتتە، مەرەيتويلىق فورۋمنىڭ حالىقارالىق ارەنادا ەلىمىزدىڭ بەدەلىن ارتتىرۋعا قوسقان ۇلەسىنىڭ وراسان ەكەندىگىن كورسەتە الاتىندىعىمىزعا سەنىمىم مول»، دەپ اتاپ ءوتتى ەۋرازيالىق مەديا فورۋم باس ديرەكتورى رۋسلان جەمكوۆ.

ءىس-شارانىڭ باس سەرىكتەسى «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامى.

XV ەۋرازيالىق مەديا فورۋمعا تىركەلۋ بۇگىننەن باستاپ 16-مامىرعا دەيىن جالعاسادى. تىركەۋ ءۇشىن http://eamedia.org/ru/ سىلتەمەسىنە وتۋگە بولادى. ورىن ساناۋلى.

فورۋمعا مىندەتتى تۇردە تىركەلۋ كەرەك.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1581
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3610