ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ءساۋىر ايىنىڭ 7 كۇنى ساعات:11.00 ۋ.شەكسپير «وتەللو» قويىلىمىنىڭ باق وكىلدەرىنە ارنالعان الدىن الا كورسەتىلىمىن وتكىزەدى.

قاللەكي تەاترى استانا قالاسىنىڭ 20 جىلدىعىنا وراي قازاقستاننىڭ حالىق ءارتيسى، پروفەسسور تالعات تەمەنوۆتىڭ رەجيسسەرلىگىمەن ساحنالانعان «وتەللو» تراگەدياسىنىڭ پرەمەراسىن ۇسىنادى.

«وتەللو» – دراماتۋرگيانىڭ كورولى ۋيليام شەكسپيردىڭ شوقتىعى بيىك شىعارمالارىنىڭ ءبىرى.

سپەكتاكلدىڭ قويۋشى سۋرەتشىسى – قازاقستاننىڭ مادەنيەت قايراتكەرى قانات ماقسۇتوۆ.

قويىلىمنىڭ ساحنا سايىسىن رەسەيدەن ارنايى شاقىرتىلعان مامان، ساحنا سايىسىنىڭ شەبەرى ميحايل ۆيشنەۆسكي قويدى.

بۇل تراگەديا الەمنىڭ بارلىق تەاترلارىندا وينالعان جانە رەپەرتۋارلىق قوردان ەشقاشان تۇسكەن ەمەس. قازاق تەاتر ساحناسىندا ەلۋباي ومىرزاقوۆ، قاپان بادىروۆ، شاكەن ايمانوۆتار كەسكىندەگەن وتەللو بەينەسىن بۇگىندە تەاترىمىزدىڭ بەلدى اكتەرلەرى، قازاقستاننىڭ ەڭبەك سىڭىرگەن قايراتكەرلەرى قۋاندىق قىستىقباەۆ پەن سىرىم قاشقاباەۆ سومدايدى.

ءبىر ادامنىڭ تاعدىرى ارقىلى كۇللى ادامزاتتىڭ جان دۇنيەسىن تانىتۋ، جۇرەك پەن سەزىم اراسىنداعى قايشىلىق ءومىر مەن ءولىم اراسىنداعى تايتالاسقا قالاي ۇرىنعانىن شەكسپيردەن ارتىق كىم سۋرەتتەيدى. كۇنشىلدىك پەن قىزعانىش – ادام ناسىلىنە ءتان سۇمدىق كەساپات.

قويىلىمعا قاللەكي تەاترىنىڭ ۇزدىك اكتەرلەرى مەن كاسىبي ماماندارى تارتىلعان. سان الۋان تەگەۋرىندى ينتەرپرەتاتسياعا سۇرانىپ تۇراتىن كۇردەلى ءھام كەسەك قاھارمانداردى سومداۋ تەاتر ءۇشىن دە، كورەرمەن قاۋىم ءۇشىن دە رۋحاني مەرەكەگە اينالارىنا ەش تالاس جوق.

وتەتىن ورنى: ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ءبىزدىڭ مەكەن-جايىمىز: ج.ومارۇلى كوشەسى، 47 ب

Abai.kz