سارسەنبى, 1 اقپان 2023
46 - ءسوز 8802 1 پىكىر 2 ءساۋىر, 2018 ساعات 10:14

دەگەن ەكەن...

***
باۋىرجان مومىشۇلىنا ءبىر جازۋشى:
– باۋكە، موسكۆا ماڭىنداعى شايقاستار تۋرالى كىتاپ جازىپ ەدىم، ۇستىنەن قاراپ شىقپاس پا ەكەنسىز. سونان سوڭ ەكەۋمىز سواۆتور بولساق، – دەپ تىلەك ءبىلدىرىپتى.
– دۋراك! – دەپتى باۋكەڭ شارت شىتىناپ. – ىشىندە ءبىر سويلەمىم جوق مەن قالايشا سواۆتور بولماقپىن. وناندا العى ءسوز جازىپ بەر دەمەيسىڭ بە؟! – دەگەن ەكەن.

***
ايگىلى حالىق اقىنى جامبىل جاباەۆكە بىردە:
– جاكە، وسى اۋزىمەن قۇس تىستەگەن قالمامبەتتى جەڭدىم دەيسىز، قالاي جەڭدىڭىز ؟! – دەپ سۇراپتى بىرەۋ.
سوندا جامبىل:
– ونى مەن جەڭگەنىم جوق، اتامىز قاراساي مەن ءسۇيىنبايدىڭ ارۋاعى عوي جەڭدىرگەن! –دەپ جاۋاپ بەرىپتى. وسى اڭگىمەنى ەستىگەن باۋىرجان مومىشۇلى تەبىرەنە تاڭدانىپ:
– قانداي تەرەڭ جاۋاپ! ەگەر ماعان بىرەۋلەر: «ۇلى وتان سوعىسىندا جاۋدى قالاي جەڭدىڭىزدەر؟» دەپ سۇراق قويسا، جاكەڭە ۇقساپ: «جاۋدى ءبىز جەڭگەن جوقپىز، ونى جەڭدىرگەن اتا-بابامىزدىڭ ارۋاعى عوي!» دەپ جاۋاپ بەرەر ەدىم! – دەگەن ەكەن.

***
بىردە، باۋىرجان مومىشۇلى پويىزبەن جول ءجۇرىپ كەلە جاتىپ، ەڭبەك ەرى جۇلدىزىن ومىراۋىنا تاققان ءبىر كىسىمەن ساپارلاس بولىپتى. پويىز قوزعالىپ، ۇزاق جولعا بەت العان كەزدە باۋكەڭ:
– ال، ەندى تانىسپايمىز با، ءبىر ۇيگە تىرەۋ بولعانداي بوي-سويىڭىز بار ەكەن، كىم بولاسىز؟ – دەپتى.
باۋكەڭنىڭ سوزىنە بەيتانىس قازاق ىڭىرانا جاۋاپ بەرىپ:
– كىم ەكەنىمدى كورمەي وتىرسىڭ با، گەروي بولامىن! – دەيدى.
بۇل جاۋاپ باۋكەڭە ۇنامايدى دا، قاتقىلداۋ ۇنمەن:
– بۇل باتىر اتاعىن نە ءۇشىن الدىڭىز؟ – دەپ سۇرايدى.
– ءجۇز بيەدەن ءجۇز قۇلىن العانىم ءۇشىن! – دەپتى بەيتانىس قازاق.
سوندا باۋكەڭ:
– ايعىر شاپتى، بايتال تاپتى، وعان سەنىڭ قانداي قاتىسىڭ بار. گەروي اتاعىن ساعان ەمەس، ءجۇز بيەگە ءجۇز قۇلىن تاپتىرعان ايعىرعا بەرۋ كەرەك ەدى. تەككە ماقتانىپ وتىرسىڭ. ال، مىنا مەن موسكۆا تۇبىندە – ۆولوكالامسك تاس جولىندا قالىڭ جاۋدى جايراتسام دا، ومىراۋىما ءبىر دە مەدال تاققانىم جوق. بىراق، حالىق قويعان باتىر اتاعىم بار! – دەگەن ەكەن.
وسى ءسوزدى ەستىگەندە، بەيتانىس قازاق قورباڭداپ ورنىنان اتىپ تۇرىپ:
– اح، باۋكەڭ ەكەنسىز عوي، اعاسى مەنەن ءبىر ابەستىك كەتتى، كەشىرىڭىز! – دەپ، باۋكەڭنىڭ قولىن العان ەكەن دەيدى.

ەل اۋزىنان جيناپ العان اقسەلەۋ سەيدىمبەك

Abai.kz

1 پىكىر

ۇزدىك ماتەريالدار