سەنبى, 28 قاراشا 2020
COVID-19 قازاقستاندا. جۇقتىرعاندار — 130039. جازىلعاندار — 116044. قايتىس بولعاندار — 1990
ءوز ءسوزى 6203 149 پىكىر 29 ناۋرىز, 2018 ساعات 10:00

باقىتجان ساعىنتاەۆ: ورىس ءتىلى - قۇداي بەرگەن ءبىزدىڭ باقىتىمىز

پرەزيدەنت تاپسىرماسى بويىنشا ۇكىمەتباسى وڭتۇستىك جۇرتىنا ساپارلاپ قايتقان ەدى. كەشە.  

ۇكىمەتباسى ساپار بارىسىندا وڭتۇستىكتىڭ ستۋدەنت جاستارىمەن كەزدەسىپتى. كەزدەسۋ بارىسىندا ۇشتىلدىلىكتىڭ ماڭىزدىلىعى جايلى ءسوز بولعان.

شىمكەنتتە  ءوڭىر جاستارىمەن كەزدەسكەن پرەمەر-مينيستر تەxنولوگيا شارىقتاپ دامىعان زاماننىڭ ارتىقشىلىقتارىنا توقتالىپ، بۇگىندە كەز-كەلگەن اقپاراتتى عالامتور ارقىلى وڭاي الۋعا بولاتىنىن اتاپ ءوتتى. سونىمەن قاتار ەلباسىنىڭ ۇشتۇعىرلى ءتىل ساياساتىنىڭ ماڭىزدىلىعىن دا جەتكىزدى.

"ەلباسىنىڭ ايتىپ جۇرگەن ۇشتۇعىرلى ءتىلى - ەڭ باستى ماسەلە سول. تەك قانا ءبىر قازاق تىلىمەن قالامىز دەۋ - ول قاتە. قالاي تۇسىنسەڭىزدەر دە، بىراق بولاشاققا شىعامىن دەيتىن بولساڭىز، ءۇش ءتىل ءبىلۋ كەرەك.

قازاق ءتىلىن، ورىس ءتىلىن، اعىلشىن ءتىلىن. مەن ىلعي دا ايتامىن، ءبىزدىڭ ۇلكەن اعالارىمىز قاجەتى جوق دەيدى. ول بالالارىنىڭ بولاشاعىنا قارسى دەگەن ءسوز. بۇگىن مۇمكىن قاجەتى جوق، ەرتەڭ قاجەتى بولادى. ەرتەڭ ءسىز ماعان دارىگەر رەتىندە وقىپ شىعىپ مىسالى، جاڭا تەxنولوگياعا كەلگەن كەزدە، سونى پايدالاناتىن كەزدە ول جاقتا اعىلشىنشا عوي، قايدان الاسىز؟ كىمنىڭ ارتىن ىزدەپ جۇرەسىز؟ بولماسا ورىسشا جازىلادى. قايدان الاسىز؟

مەن ايتامىن، ورىس ءتىلى كەزىندە قۇدايدىڭ بەرگەن ءبىزدىڭ باقىتىمىز. قازىر ءبىز ءبارىمىز ورىسشا سويلەي الامىز. ەركىن، ەشكىمنىڭ ۇيرەتۋدىڭ قاجەتى جوق. ءبىز ەكى ءتىلدى بىلەمىز، ەندى ءۇشىنشى ءتىلدى مەڭگەرۋىمىز كەرەك. ەلباسىنىڭ ايتىپ وتىرعانى سول. ءۇش تۇعىرلى ءتىل! وسىنى ءبىزدىڭ جاستارىمىز ءبىلىپ، مەكتەپتەن باستاپ ۇيرەنەتىن بولسا، وندا ءبىزدىڭ بولاشاعىمىز زور. كەز-كەلگەن جەرگە بارىپ جۇمىس ىستەي الامىز",-دەدى باقىتجان ساعىنتاەۆ. بۇل ۇكىمەتباسىنىڭ ءسوزى. Nur.kz سايتى سولاي دەپ جازادى.

ودان وزگە پرەمەر-مينيستر بىلتىر امەريكا ەلىنە بارعان كەزىندە كۋا بولعان، قۋانىشتى ساتىمەن دە ءبولىستى.

ء"بىز ءبىر جىل بۇرىن امەريكادا بولدىق، سان-فرانتسيسكودا. قازاقتىڭ قىز-جىگىتتەرى جۇگىرىپ كەلدى. "قايدان جۇرسىڭدەر؟" دەسەم، "وسى جەردە جۇمىس جاسايمىز" دەيدى.

Google-دە ىستەپ ءجۇر، Facebook-تا ءجۇر. ماقتاناسىڭ با؟ ماقتاناسىڭ. ەگەر دە ول ەڭبەكتەنىپ، تالپىنىپ وقىماسا، قايدان بارادى ول جاققا؟", - دەپ جاستاردى بىرنەشە ءتىل ۇيرەنۋگە شاقىرعان ۇكىمەت باسشىسى كەزدەسۋ سوڭىندا جاس بۋىن وكىلدەرىنەن ء"تىلىمىز شورقاق، بيۋروكراتيالىق بولسا، كەشىرىم سۇرايمىز" دەپ كەزدەسۋدى قورىتىندىلادى.

Abai.kz

149 پىكىر