قازاقستانعا رەسمي ساپارمەن بۇۇ-نىڭ دۇنيەجۇزىلىك تۋريستىك ۇيىمنىڭ باس حاتشىسى (UNWTO) زۋراب پولوليكاشۆيلي كەلدى.

ساپار اياسىندا قر مادەنيەت جانە سپورت ءمينيسترى ا. مۇحامەديۇلىمەن كەزدەسۋ ءوتتى. كەزدەسۋ بارىسىندا دۇنيەجۇزىلىك تۋريستىك ۇيىم UNWTO-مەن قازاقستان رەسپۋبليكاسى اراسىنداعى ءتۋريزمدى دامىتۋعا بايلانىستى كەڭ كولەمدى ماسەلەلەر تالقىلاندى.

«زۋرابا پولوليكاشۆيلي مىرزانىڭ دۇنيەجۇزىلىك تۋريستىك ۇيىمنىڭ باس حاتشىلىعى قىزمەتىنە ورنالاسقانداعى العاشقى رەسمي ساپارىندا قازاقستانعا كەلۋى ەلىمىزگە دەگەن ەرەكشە ىقىلاستى بىلدىرەدى، بۇل تۋريزم ۇيىمى (UNWTO) قازاقستانداعى ءتۋريزمدى دامىتۋعا جاردەمدەسەدى» - دەپ سەنىم ءبىلدىردى قر مادەنيەت جانە سپورت ءمينيسترى ارىستانبەك مۇحامەديۇلى.

زۋرابا پولوليكاشۆيليدىڭ ايتۋىنشا سوڭعى ۋاقىتتا قازاقستان جەر-جەرلەردە ءتۋريزمدى دامىتۋعا ارنالعان گلوبالدىق رەفورمالار جانە قۇرىلىس شارتتارىن جاساۋ جونىندە ۇلكەن جۇمىس اتقاردى: «قازاقستاننىڭ بولاشاعى - بۇل تۋريزم. بۇگىن ءبىز كورىپ وتىرمىز، بۇل باعىتتا مەمەلەكەت قارقىندى جۇمىستار اتقارىپ جاتىر. ونىڭ ايعاعى رەتىندە بىلتىر عانا قر ۇكىمەتىنىڭ قولداۋىمەن «Kazakh Tourism» ۇلتتىق تۋريستتىك ءوفيسى قۇرىلدى».

ساپاردىڭ قورىتىندىسى بويىنشا، دۇنيەجۇزىلىك تۋريستىك ۇيىم UNWTO باس حاتشىسى زۋراب پولوليكاشۆيلي قازاقستاننىڭ ءتۋريزمدى دامىتۋدىڭ جاڭا باستامالارىن ىسكە اسىرۋدا، اتاپ ايتقاندا، تۋريزم سالاسىنداعى حالىقارالىق ينۆەستيتسيالىق فورۋمدى وتكىزۋگە قولداۋ كورسەتۋگە دايىن ەكەندىگىن ءبىلدىردى، ول شەتەلدىك ينۆەستورلاردىڭ قازاقستاننىڭ تۋريستىك جوبالارىنا نازارىن اۋدارۋعا جانە جىل سايىنعى «ITB EURASIA» حالىقارالىق تۋريستىك جارمەڭكەلەردى، «ۇلى جىبەك جولى» حالىقارالىق تۋريزم مينيسترلەرىنىڭ كەزەكتى كەزدەسۋلەرىن ۇيىمداستىرۋعا مۇمكىندىك بەرۋگە اتسالىساتىنىن جەتكىزدى.

سونىمەن قاتار، قازاقستاندىق ءتۋريزمنىڭ كۇن تارتىبىنە دۇنيەجۇزىلىك تۋريستىك ۇيىم UNWTO-نىڭ الماتىداعى ءبولىمىنىڭ قولداۋىمەن ورتالىق ازيا ەلدەرى ءۇشىن ەكسكۋرسوۆودتار مەن تۋروپەراتورلارعا ارنالعان وقۋ ورتالىعىن قۇرۋ ماسەلەسى دە كىرەدى.

قازاقستان تاراپى قازاقستاننىڭ تۋريستىك سالاسىن دامىتۋدىڭ جاڭا كەزەڭىندە دۇنيەجۇزىلىك تۋريستىك ۇيىم UNWTO-مەن ودان ءارى ىنتىماقتاستىققا ۇلكەن ءۇمىت ارتادى.

Abai.kz