سەنبى, 19 قىركۇيەك 2020
COVID-19 قازاقستاندا. جۇقتىرعاندار — 107199. جازىلعاندار — 101822. قايتىس بولعاندار — 1671
ءومىردىڭ ءوزى 3511 2 پىكىر 29 قاڭتار, 2018 ساعات 10:09

قاتىگەزدىكتىڭ قۇربانى

ءومىر دەگەنىڭ ادام ءتۇسىنىپ بولمايتىن جۇمباق دۇنيە عوي. ون ەكى مۇشەسى تۇگەل، تەپسە تەمىر ۇزەدى دەيتىندەي 59 جاسار جاقسىلىق بيدالين تاعدىرىنىڭ اياق استىنان كۇل-تالقان بولاتىنىن ءتىپتى سەزبەي دە قالدى. تالاي جىل بىرگە تۇرعان، ءتىپتى ءاي-ءشاي دەسپەگەن ايەلى مەن ۇلكەن ۇلى مۇنى ءبىر-اق كۇندە ۇيدە تاستاپ، وزدەرى بەلگىسىز جاققا تارتىپ وتىرىپتى. كورشىلەرىنىڭ ايتۋىنا قاراعاندا جاقسىلىق ىسىنە مىعىم، ەشكىمگە ارتىق اۋىز ءسوزى جوق، ىشىمدىك اتاۋلىعا دا پالەندەي جاقىن ەمەس. تەك اقاڭدى اندا-ساندا ءبىر-ەكى رەت جۇرت قاتارلى الىپ قوياتىنى بولماسا...

ءبىر كەم دۇنيە-اي.. ءسويتىپ اقساقال جاسىنا جاقىنداعاندا جەر ۇيدە سوپيىپ جالعىز قالدى. ءتىرى ادام تىرشىلىگىن ىستەيدى عوي. جاقسىلىق تا وزىنشە تىرشىلىك ەتىپ جاتتى. جالعىزدىق جانىنا باتتى ما، الدە سارىۋايىم جانىن جەگىدەي جەپ، ابدەن السىرەتتى مە، كىم ءبىلسىن، ءبىر كۇنى جاقسىلىق كەسكەن تەرەكتەي ءبىر-اق قۇلادى. اياق-قولىنان ءال كەتىپ، ينسۋلت الىپ ۇرىپ، ءبىرجولاتا سال بولىپ قالدى. ۇيدە جالعىز. قارايتىن ەشكىم جوق. تەك قانا اجال كۇتىپ تۇر. كۇنى كەشە عانا ەشكىمگە كۇنى تۇسپەي، ءوز بەتىنشە ءومىر تىرشىلىگىن تارتىپ جاتقان ساپ-ساۋ ادامنىڭ اياق استىنان مۇگەدەك بولىپ قالۋىن قۇدايىم ەشكىمنىڭ دە باسىنا بەرمەسىن. ونىڭ قاسىرەتىن تەك باسىنا تۇسكەن جان عانا بىلەدى. الدا نە كۇتىپ تۇر؟ وسىنى ويلاعاندا جاقسىلىقتىڭ جانى تۇرشىكتى. قاسىندا اۋزىنا سۋ تامىزاتىن جان تاعى دا جوق.

ءولىمنىڭ ىزعارلى لەبىن سەزىنگەن ول بويىنداعى بار كۇش-قايراتىن جيناپ، سۇيەمدەپ بولسا دا سۇيرەتىلىپ، ەسىككە قاراي جىلجي ءتۇستى. ءبىر ساعات ءوتتى مە، ون ساعات ءوتتى مە، ءوزى دە بىلمەيدى، ءبىر كەزدە تابالدىرىققا جەتىپ بارىپ، ەسىنەن تاندى. جاقسىلىقتىڭ ءالى دە بولسا كورەر جارىعى تاۋسىلماعان ەكەن. ابىروي بولعاندا ونى ءدال سول كەزدە كورشى ايەل كورىپ قالىپ، ۇيىنە سۇيرەپ اكەلىپ، باعىپ قاقتى. جاقىنى بولماسا دا جانى تازا، جۇرەگى ۇلكەن ايەل ەش قاباعىن شىتپاستان ونى ءبىر ايداي كۇتتى. وسى ۋاقىت ىشىندە نە ايەلى، نە بالاسى اماندىعىن بىلۋگە دە جارامادى. قالامىزداعى گازەت اتاۋلى وسى جايدى جازىپ، كوپشىلىكتەن كومەك سۇراپ جاتقاندا دا جاقسىلىقتىڭ ەت جاقىندارى ءتىپتى قىڭق ەتكەن دە جوق. ويپىراي، قاتەگەزدىكتىڭ وسىنداي دا ءتۇرى بولادى ەكەن-اۋ. قانشا دەگەنمەن ءبىر شاڭىراقتىڭ استىندا تۇردى. وزدەرىنشە باقىتتى ءومىر ءسۇردى. نارەستە ءسۇيىپ، ءبىراز عۇمىر كەشتى ەمەس پە. ەندى كەلىپ ءبىر حابارىن بىلسە نەتتى؟ ءتىپتى تانىمايتىن ادامدار دا جاناشىرلىق تانىتادى ەمەس پە؟

تانىمايتىن ادام دەمەكشى، وسى جاعدايدى ەستىگەن قالامىزداعى «يگى ىستەر بيۋروسى» قوعامىنىڭ مۇشەلەرى كومەككە كەلىپ، جاعداي وڭعارىلعانداي بولدى. ونىڭ باسشىسى يرينا مەلتسەردىڭ جاقسىلىققا اراشا ىزدەپ بارماعان جەرى، اشپاعان ەسىگى، قاقپاعان كابينەتى قالمادى. ماقساتى - وسىناۋ دالادا قالعان جاندى قايتكەندە دە اۋرۋحاناعا ورنالاستىرىپ، ەم-دوم قابىلداۋعا كومەكتەسۋ. ونىسى دا وڭايلىققا تۇسپەدى. ەندى كەدەرگى قاعازباستىلىق بولدى. سويتسە جاقسىلىقتىڭ قۇجاتتارىنىڭ ءبارى تۇگەل بولماي شىقتى.  وسى جاعداي بۇكىل قالاعا داۋ بولىپ جاتقاندا جاقسىلىقتىڭ ايەلى مەن بالاسى وسىندا كەلىپ، قول ۇشىن بەرۋگە دە جارامادى. بەينە ءبىر دالاعا تاستاعان، كەرەگى جوق زات سەكىلدى. تانىمايتىن ايەل زىر جۇگىرىپ، بار كۇش-قايراتىن جۇمساپ، اقىرى اركىمگە جالىنىپ-جالپايىپ ءجۇرىپ اۋرۋحاناعا ورنالاستىرىپ تىندى. يرينا حانىم ەندى جاقسلىقىتىڭ باسىنا مرت جاساۋ جانە دە باسقا اقىلى ەمدىك شارالارىن وتكىزۋگە قاجەتتى قاراجات ىزدەپ، بارلىق ءباسپاسوزدىڭ ەسىگىن قاقتى، قالتالىلارعا دا ءسوز سالدى. ءتىپتى كەيدە پامپەرستىڭ دە تابىلماي قالعان ۋاقىتتارى بولدى. بۇل كەزدە جاقسىلىقتىڭ ەت جاقىندارى تاعى دا ءۇنسىز ەدى.

يرينا سەكىلدى بىرەۋگە قول ۇشىن بەرۋگە دايىن تۇراتىن، ادال جۇرەكتى جاننىڭ ارقاسىندا جاقسىلىقتىڭ بەتى بەرى قاراپ، ادام بولىپ قالدى. ول اسىرەسە يرينا اۋرۋحاناعا كەلگەندە بالاشا قۋانىپ، ءبىر جاساپ قالاتىن. جۇزىنە قان جۇگىرىپ، ءوزىن جاس جىگىتتەي سەزىنەتىن. ال ول كەشىككەندە اۋىر مۇڭعا باتىپ، كۇنى بويى باسىن توسەكتەن كوتەرمەيتىن. مىنەكەي، جات جاندى تۋىسىڭنان دا جاقىن ەتىپ جىبەرەتىن وسىنداي وقيعالار دا كەزدەسىپ تۇرادى.

جازۋعا قولىمىز بارماسا دا، اڭگىمەمىزدىڭ سوڭى قايعىلى جاعدايمەن اياقتالدى. ەت جاقىندارىن ساعىنىپ، تاعدىردان مۇلدەم كۇدەر ءۇزدى مە، الدە بۇل ومىردەن مۇلدەم ءتۇڭىلدى مە، كىم ءبىلسىن جاقسىلىق بيدالين 59 جاسىندا توسەكتە جاتىپ ءبىر قاس-قاعىم ساتتە ومىردەن وزىپ جۇرە بەردى.

مۇنىڭ ءوزى بارىمىزگە دە وي سالارلىق دۇنيە-اۋ، ءوزى. شىنىمىزدى ايتايىقشى، تۋعان-تۋىستارىمىزدى ءجيى ەسكە الىپ، جانىنا بارىپ ماڭدايىنان سيپاۋعا ۇنەمى ۋاقىت تابا بەرەمىز بە؟ بۇعان ۇلكەن كۇمانىم بار. كەش قالىپ، وكىنىشتە قالىپ جۇرمەلىك. كۇنانىڭ ۇلكەنى سول بولار.

جايبەرگەن بولاتوۆ، قوستاناي

Abai.kz

2 پىكىر