سەيسەنبى, 24 قاراشا 2020
COVID-19 قازاقستاندا. جۇقتىرعاندار — 126860. جازىلعاندار — 113646. قايتىس بولعاندار — 1945
انىق 3671 3 پىكىر 23 قاڭتار, 2018 ساعات 11:15

ميرزياەۆ كاريموۆ بيلىگىنىڭ قاتەلىگىن مويىندادى

تاۋەلسىز وزبەكستاننىڭ ەكىنشى پرەزيدەنتى شاۆكات ميرزياەۆ سۇرحاندارياعا ساپارى كەزىندە اقتوبەدەگى قايعىلى وقيعادان قازا تاپقان وتانداستارىنا قۇران باعىشتاپ، مارقۇمداردىڭ جاقىندارىنا كوڭىل ايتتى.

تاۋەلسىزدىك العان جىلداردان باستاپ، جابىق ساياسات جۇرگىزىپ كەلگەن وزبەكستان بيلىگىنىڭ بۇگىنگى قاسىرەتى كاريموۆ ساياساتىنىڭ سالدارى ەكەنىن پرەزيدەنت ميرزياەۆ مويىندادى. ولاي دەيتىنىمىز، جابىق جاعدايدا ءومىر سۇرگەن وزبەك ازاماتتارى كۇن كورىس ءۇشىن ەل-ەلدى ارالاپ، ارزان جۇمىسشى كۇشىنە اينالدى. كۇنى كەشە عانا اقتوبە ماڭىندا ورتەنگەن اۆتوبۋستاعى 52 وزبەك ازاماتى دا رەسەيگە جۇمىس ىزدەپ جول تارتقان ەدى.

قايعىلى وقيعاعا قاتىستى پىكىر بىلدىرگەن وزبەكستان پرەزيدەنتى شاۆكات ميرزياەۆ وسى ماسەلەگە دە توقتالدى. ميرزياەۆتىڭ پىكىرىنشە، قايعىلى وقيعا ەلدە جۇمىستىڭ جوقتىعىن كورسەتتى.

"قايعىلى وقيعا كوپ نارسەنىڭ بەتىن اشىپ بەردى، سونىڭ ىشىندە ءبىزدىڭ حالىق الدىندا بورىشىمىزدىڭ كوپتىگىن كورسەتتى. ءبىز حالىققا جاعداي جاساي الماعاندىقتان، ادامدار جۇمىستى باسقا ەلدەردەن ىزدەۋگە ءماجبۇر", - دەپ مالىمدەدى پرەزيدەنت.

ەسكە سالايىق، 18 قاڭتاردا جولاۋشى اۆتوبۋسى قازاقستاننىڭ اقتوبە وبلىسى ىرعىز اۋدانى قالىباي اۋىلىنا 10 شاقىرىم جەردە، سامارا - شىمكەنت تاس جولىندا ورتەندى. قازاق بيلىگىنىڭ مالىمەتى بويىنشا، اۆتوبۋستاعى 57 ادامنىڭ 52-ءسى قازا تاپتى. بارلىعى - وزبەكستان ازاماتى. ءتىرى قالعان بەسەۋدىڭ ۇشەۋى - قازاقستان، قالعان ەكەۋى - وزبەكستان ازاماتى.

قازاقستان مەن وزبەكستان ۇكىمەتتەرى ارنايى كوميسسيا قۇردى. ورتەنگەن اۆتوبۋستا قازا تاپقان ازاماتتاردىڭ بارلىعى وزبەكستاننىڭ نامانعان وبلىسىنان ەكەنى بەلگىلى بولدى. ولاردىڭ ەڭ ۇلكەنى - 41, ال ەڭ جاسى - 19 جاستا بولعان.

وزبەكستان ءسىم مالىمەتى بويىنشا، 20 قاڭتاردا تۇندە وزبەك ازاماتتارىن ارنايى ۇشاقپەن تاشكەنتكە جەتكىزدى.

20 قاڭتاردا وزبەك ەڭبەك ميگرانتتارى مەن بەلسەندىلەر رەسەيدىڭ وزبەكستانداعى ەلشىلىگى الدىنا گۇل قويدى.

ء"بىزدىڭ وتانداستار ايازدا تۇردى. ولار 20 قاڭتاردى قازاقستاندا قازا تاپقانداردى ازا تۇتۋ كۇنى دەپ جاريالادى. دەگەنمەن وزبەك ەلشىلىگىنەن ەشكىم شىقپادى. ونىڭ ۇستىنە، وزبەك ەلشىلىگىندەگى تۋ تۇسىرىلمەگەن. 52 ادامنىڭ ءومىرى ەلشى ءۇشىن تۇككە تۇرعىسىز بولعانى ما؟ ولاي بولسا، ەلشى، ساعان ماسقارا!" - دەپ مالىمدەدى "ۆاتاندوشلار" ۇيىمىنىڭ پرەزيدەنتى ۋسمانحان باراتوۆ.

قازاقستان ىشكى ىستەر ءمينيسترىنىڭ ورىنباسارى ەرلان تۇرعىمباەۆتىڭ ايتۋىنشا، ورتەنگەن دەنەلەردىڭ كىمدىكى ەكەنىن انىقتاۋ ءۇشىن وزبەكستاندا گەنومدى ساراپتاما جاسالادى.

Abai.kz

3 پىكىر