سونىمەن بۇگىنگى كۇننىڭ باستى جاڭالىعى مۇحتار اۋەزوۆ اتىنداعى اكادەميالىق دراما تەاترىنىڭ ديرەكتورى ەرلان ءبىلال پارامەن ۇستالدى.

ەرلان ءبىلال مىرزا 1,5 ميلليون تەڭگە كولەمىندە پارا العان كورىنەدى. اۋەلى الەۋمەتتىك جەلىدە اكتەردىڭ پارامەن ۇستالعان كەيىپتەگى فوتوسى تارادى.

كەيىننەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى نۇرلان جاحين مالىمدەمە جاساپ، قازاقستاننىڭ ەڭبەك سىڭىرگەن قايراتكەرى ەرلان ءبىلالدىڭ پارامەن ۇستالعانىن راستادى.

"مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى الماتىدا جاڭا جىل كەزىندە بالالار قويىلىم قويۋ ماقساتىندا تەاتردان ورىن بەرۋ ءۇشىن زاڭدى تۇلعادان 1,5 ميلليون تەڭگە پارا الدى دەگەن كۇدىككە ءىلىندى. كىناسىن تولىق مويىنداۋىنا بايلانىستى ول قاماۋعا الىنعان جوق. سوتقا دەيىنگى تەرگەۋ شارالارى ءجۇرىپ جاتىر", - دەدى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى نۇرلان جاحين.

ءبىز ماسەلەنىڭ انىق-قانىعىن بىلمەك بولىپ، تەاتردىڭ ءباسپاسوز قىزمەتىنە حابارلاسقان ەدىك، تۇششىمدى جاۋاپ الا المادىق.

تەاتردىڭ ۆاحتاسىنا حابارلاسىپ، ءباسپاسوز قىزمەتىنە بايلانىستىرۋدى سۇراپ ەدىك: ء"باسپاسوز بولىمىنەن ەشكىم جوق قوي قازىر. تەاتر 9-نا دەيىن دەمالىستا. ونىڭ ءۇستى قازىر ءتۇستىڭ كەزى. قازىر ەشكىم جوق", - دەگەن جاۋاپ الدىق.

Abai.kz