جەكسەنبى, 26 ماۋسىم 2022
4042 0 پىكىر 29 جەلتوقسان, 2017 ساعات 08:57

تاجىكستاندا تۇڭعىش پرەزيدەنتتىڭ ايەلى ورتتەن قازا تاپتى

تاجىكستان بيلىگى ەلدىڭ تۇڭعىش پرەزيدەنتى راحمون نابيەۆتىڭ ايەلى مايرام نابيەۆانىڭ ءولىمىنىڭ سەبەبىن جان-جاقتى تەكسەرمەكشى. 28 جەلتوقساندا حۋدجاند قالاسىندا 80 جاستاعى مايرام نابيەۆانىڭ ۇيىندە ءورت شىعىپ، قازا تاپقان. ونىڭ دەنەسى مەديتسينالىق تەكسەرۋگە جىبەرىلگەن.

ازاتتىقتىڭ تاجىك قىزمەتىنىڭ ءتىلشىسى ماسۋمي مۋحاممادرادجاب بەيسەنبى كۇنى كەشكىسىن مايرام نابيەۆانىڭ تۇرعان ۇيىنە بارعان.

ونىڭ سوزدەرىنشە، بۇرىنعى مەملەكەت باسشىسى ايەلىنىڭ ءۇيى ۇلكەن تاسجول بويىندا ورنالاسقان. ۇيىنە مارقۇمنىڭ تۋىستارى مەن كورشىلەرى جينالعان. استانادان بارعان مارقۇمنىڭ قىزى مۋناۆۆارا نابيەۆا سۇحبات بەرۋدەن باس تارتقان.

ءتىلشىنىڭ حابارلاۋىنشا، ءۇيدىڭ ىشىندە تەرگەۋشىلەر مەن ءورت ءسوندىرۋ قىزمەتى جۇمىس ىستەپ جاتىر. مايرام نابيەۆانىڭ تۋىستارىنىڭ ءبىرى ءورت تۇستەن كەيىن ورىن العانىن ايتادى. «مايرام-اپا ۇيىندە جالعىز بولعان. ول جانعان ازىق-تۇلىكتىڭ يىسىنەن ۋلانىپ قالعان»، - دەيدى ول.

مايرام نابيەۆا 1937 جىلى تۋعان. سوڭعى جىلدارى بىردە دۋشانبەدە، بىردە حۋدجاندتا تۇرىپ كەلگەن. ونىڭ جۇبايى – راحمون نابيەۆ 1993 جىلدىڭ 11 ساۋىرىندە حۋدجاندتاعى ۇيىندە قايتىس بولعان. رەسمي بولجام بويىنشا، جۇرەك تالماسىنان كوز جۇمعان.

راحمون نابيەۆ تاجىك سسر مينيسترلەر كەڭەسىنىڭ توراعاسى، تاجىكستان كومپارتياسى ورتالىق كوميتەتىنىڭ ءبىرىنشى حاتشىسى بولعان. 1991 جىلى 24 قاراشادا تاجىك سسر-دا پرەزيدەنتتىك سايلاۋ ءوتىپ، راحمون نابيەۆ 56,92 پايىزبەن جەڭىسكە جەتكەن. 1992 جىلدىڭ 7 قىركۇيەگىندە دۋشانبە اۋەجايىندا راحمون نابيەۆتى وپپوزيتسيالىق توپ قورشاۋعا العان. سول كۇنى ول وتستاۆكاعا كەتەتىنىن مالىمدەگەن.

Abai.kz

0 پىكىر