بەيسەنبى, 28 ناۋرىز 2024
الاڭ 7001 45 پىكىر 22 جەلتوقسان, 2017 ساعات 11:41

اقش بانكى قازاقستان ۇلتتىق قورىنىڭ 22 ميلليارد دوللارىن بۇعاتتادى

"ماسساعان بەزگەلدەك" دەگەننىڭ كوكەسى مىنە بولدى. اقش-تىڭ "New York Mellon" (BK.N) بانكى قازاقستاننىڭ ۇلتتىق قورىنا تيەسىلى 22 ميلليارد اقش دوللارى كولەمىندەگى اكتيۆىن بۇعاتتاعانىن حابارلادى. بۇل شەشىم قازاقستان ۇكىمەتى مەن مولدوۆالىق ينۆەستوردىڭ اراسىنداعى داۋ ورشىگەن كەزدە قابىلدانعان. بۇل اقپارات "regnum.ru" سايتىنان الىندى. سونداي-اق، "ربك"-نىڭ ۋكراين قىزمەتى دە بۇل اقپاراتتى راستاپ وتىر. "رەيتەرس" اگەنتتىگى دە اتالعان اقپاراتقا شولۋ جاساپتى.

مولدوۆالىق كاسىپكەر اناتول (اناتولي) ستاتي مەن وعان تيەسىلى بىرنەشە كومپانيا قازاقستان ۇكىمەتىن وزدەرىن شىعىنعا ۇشىراتتى دەگەن ارىز بويىنشا بۇعان دەيىنگى ءبىر سوتتا جەڭىپ شىققان. بانكتەگى دەرەك كوزىنىڭ ايتۋىنشا، ەندى ارىزدانۋشى شىعىنىن وتەۋ تۋرالى شاعىم ءتۇسىرىپ، قازاقستاننىڭ مۇناي تابىسىنان قۇرالعان ۇلتتىق قورىنىڭ 40 پايىزىن بۇعاتتاۋعا قول جەتكىزگەن. بۇل 500 ميلليون دوللاردىڭ ءىسى.

نيدەرلاندى-بريتانيا-اقش-شۆەتسيا-ستوكگولم

بۇل جانجالدىڭ تۋىنا قازاقستان ۇكىمەتى مەن مولدوۆالىق اكەلى-بالالى كاسىپكەرلەر اناتول جانە گابريەل ستاتيلەردىڭ اراسىنداعى بىرنەشە جىلعا سوزىلعان سوت پروتسەسى سەبەپ بولعان.

كاسىپكەرلەر قازاقستاننىڭ مۇناي مەن گاز سالاسىنا ينۆەستيتسيا سالعان سوڭ مەملەكەتتىڭ وزدەرىنە ۇلەستەرىن ارزانعا سات دەپ قىسىم جاساعانىن مالىمدەگەن.

قازاقستان بيلىگى بۇل ايىپتاۋدى تەرىسكە شىعارادى. بىراق اناتول مەن گابريەل ستاتيلەر جانە Ascom Group S.A. مەن Terra Raf Trans Traiding Ltd. اتتى تاعى ەكى كومپانيا قازاقستان ۇكىمەتىن حالىقارالىق سوتقا بەرىپ، جەڭىپ شىققان. سوت استانانى 500 ميلليون وتەماقى تولەۋگە مىندەتتەگەن.

ۇلتتىق بانك ءدال وسى مولدوۆالىق كاسىپكەرلەرگە قاتىستى 500 ميلليون دوللاردىڭ ءىسىن قايتا قاراۋعا بريتان سوتىنا ءوتىنىش جازىپ، شاعىمدانعان ەكەن.

اقش-تاعى سوت پروتسەسسىندە حالىقارالىق تريبۋنال قازاقستاننىڭ ۇلتتىق بانكىنە قارسى شەشىم شىعارعان بولاتىن.

ال شۆەدتسياداعى اپپەلياتسيالىق پروتسەسس مولدوۆالىق كاسىپكەر ستاتيلەرگە قارسى شاعىمدى قاراماعان. بۇل تۋرالى 26-قازاندا قر ادىلەت مينيسترلىگى مالىمدەگەن ەدى. ال 9-جەلتوقساندا "سۆەا" اپپەلياتسياسى اربيتراجدى شەشىمدى كۇشىندە قالدىردى.

بۇدان كەيىن قازاقستان تارابى ستوكگولم سوتىنا قايتا شاعىمداناتىنىن مالىمدەدى.

ال جاڭاعى ستاتي ىسىنەن كەيىن قازاقستان ۇلتتىق قورىنىڭ 40 پايىز اكتيۆى بۇعاتتالدى. وسىعان دەيىن ەۋروپادا قازاقستاندىق كومپانيالاردىڭ اكتيۆتەرى بۇعاتتالعانى ءمالىم بولعان.

اسىرەسە، امستەردام سوتى قر ۇلتتىق قوردىڭ قارجىسىنا شەكتەۋ قويعان.

لوندونداعى Legal & General Investment Management كومپانياسنىڭ ينۆەستيتسيا بويىنشا ساراپشىسى سايمون كۋيدجانو-ەۆانس بۇل شەكتەۋ شاراسىن بۇرىن-سوڭدى بولماعان وقيعا دەپ سانايدى.

- ەگەر ۇلتتىق قوردىڭ 40 پايىزى بۇعاتتالىپ قالسا، ونى اشۋدىڭ جولى تابىلماسا، ساياساتكەرلەر الاڭدايتىن تىقىر تاياندى دەگەن ءسوز، - دەدى ساراپشى "رەيتەرسكە".

بۇل حابار جاريالانا سالا قازاقستانداعى دوللار باعامى السىرەپ، تەڭگە 0,6 پايىزعا كۇشەيگەن.

- تەوريا بويىنشا بۇل قور - مەملەكەتتىك ينستيتۋت، سول سەبەپتى ەلدىڭ ورتالىق بانكتەرى مەن ءال-اۋقات قورلارى قايتا ويلانۋعا ءماجبۇر بولۋى ءتيىس. ويتكەنى بۇعان دەيىن بۇل اكتيۆتەرگە سالىستىرمالى تۇردە قاۋىپ جوق ەكەنىنە سەنىپ كەلگەن، - دەدى كۋيدجانو-ەۆانس.

نازارباەۆ شەتەلدەگى اقشانى ەلگە قايتارۋدى ەسكەرتكەن

ءبىر اپتا بۇرىن قازاقستان پرەزيدەنتى نۇرسۇلتان نازارباەۆ ۇكىمەت مۇشەلەرىنەن ءىرى مەملەكەتتىك كومپانيالاردىڭ شەتتەگى كاپيتالىن ەلگە قايتارۋدى تالاپ ەتىپ، قاتقىل سويلەگەن. مۇنايعا باي ەلدىڭ باسشىسى دەرەك كوزىن ايتپاي كەلتىرگەن مالىمەتكە سايكەس، "وتاندىق 18 كومپانيا 12,5 ميلليارد دوللار قارجىسىن شەتەلدە ۇستاپ وتىر.

قازاقستان پرەزيدەنتى ناقتى قانداي اقشا تۋرالى ايتىپ وتىرعانىن اتاپ كورسەتپەدى. بىراق ول: "ەركەلەگەندەرىڭىز جەتەدى. ياحتا ساتىپ الدىڭىزدار، باسقا ەلدەردە ءۇي، كوتتەدجدەرىڭىز بار. ءبىز ءالى ەشكىمدى تەكسەرگەن جوقپىز، اقشا تاۋىپ السىن دەپ مۇمكىندىك بەرگىمىز كەلدى. بىراق مۇنىڭ بارلىعىن سىزدەرگە مەملەكەت بەرگەنىن ۇمىتپاڭىزدار. ەگەر پرەمەر-مينيستر اينالىسا الماسا، ءوزىم اينالىسامىن" دەپ قاتتى سويلەگەن.

نۇرزات توعجان

Abai.kz

45 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3523