قىرعىزستاندا بيلىك باسىنداعى پارتيانى اتامباەۆ باسقارماق
قىرعىزستاننىڭ سوتسيال-دەموكراتيالىق پارتياسى (قسدپ) 2018 جىلدىڭ قاڭتار ايىندا سەزد وتكىزىپ، پارتيا ليدەرىن سايلاماقشى.
قسدپ توراعا ورىنباسارى، پرەزيدەنت اكىمشىلىگىنىڭ جەتەكشىسى فاريد نيازوۆتىڭ حابارلاۋىنشا، ازىرگە تەك ءبىر عانا كانديداتۋرا – ەكس-پرەزيدەنت المازبەك اتامباەۆتى ۇسىنۋ قاراستىرىلىپ جاتىر.
"قسدپ-دا باسقا ۇمىتكەر جوق. ءوزىن ۇسىنام دەۋشىلەرگە شەكتەۋ جوق. بىراق پارتيا ءبىر اۋىزدان المازبەك اتامباەۆتى قولداپ وتىر", - دەدى ول.
قسدپ – قىرعىزستانداعى بيلىك پارتياسى. المازبەك اتامباەۆ پرەزيدەنت بولىپ تۇرعاندا، پارتيانى جوگوركۋ كەڭەشتىڭ بۇرىنعى توراعاسى چىنىباي تۋرسۋنبەكوۆ پەن فاريد نيازوۆ باسقارعان. بىراق ولاردىڭ ءبىرى دە پارتيانىڭ ليدەرى ەمەس.
المازبەك اتامباەۆتىڭ ەل پرەزيدەنتى رەتىندەگى وكىلەتتىگى بيىل 24 قاراشادا اياقتالعان.
Abai.kz
