جۇما, 17 قىركۇيەك 2021
2498 6 پىكىر 4 جەلتوقسان, 2017 ساعات 10:09

كيەۆتە پرەزيدەنت پوروشەنكوعا "يمپيچمەنت مارشى" ءوتتى

گرۋزيانىڭ بۇرىنعى پرەزيدەنتى، "جاڭا كۇشتەر رۋحى" ليدەرى ميحايل سااكاشۆيلي كەزەكتى رەت جاقتاستارىن كوشەگە شىعارىپ، ۋكراينا استاناسىندا مارش وتكىزدى. پرەزيدەنت پەتر پوروشەنكونىڭ وتستاۆكاسىن تالاپ ەتكەن "حالىقتىق يمپيچمەنت" اكتسياسىنا ءۇش مىڭنان بەس مىڭعا دەيىن دەمونسترانت قاتىسقان.

قاتىسۋشىلار رەۆوليۋتسياعا ءتورت جىل وتسە دە، ەلدە ەشنارسە وزگەرمەدى دەيدى.

ەكى اي بويى پارلامەنت عيماراتى الدىندا شاتىر تىگىپ، دەپۋتاتتىڭ دەربەس قۇقىقتىلىعىن الىپ تاستاۋدى، كوررۋپتسياعا قارسى سوت جانە جاڭا سايلاۋ جۇيەسىن قۇرۋدى تالاپ ەتىپ جاتقان بەلسەندىلەر تاعى ءبىر تالاپتى قوستى. ول - "ۋكراينا پرەزيدەنتى پەتر پوروشەنكونىڭ يمپيچمەنتى جونىندە" زاڭ قابىلداۋ.

سااكاشۆيلي پوروشەنكو باس پروكۋراتۋراعا جانە ۇلتتىق قاۋىپسىزدىك كوميتەتىنە ءوزىن ۇستاۋ جونىندە تاپسىرما بەرىلگەنىن ايتادى. 30 قاراشادا ۋكراينانىڭ مەملەكەتتىك ميگراتسيا قىزمەتى سااكاشۆيليگە ەلدە بولۋعا 2018 جىلدىڭ 1 ناۋرىزىنا دەيىن رۇقسات بەرگەن. بىراق ول كەز كەلگەن ۋاقىتتا ءوزىن گرۋزياعا نەمەسە پولشاعا دەپورتاتسيالاۋ مۇمكىن ەكەنىن جوققا شىعارمايدى.

Abai.kz

6 پىكىر