قىرعىزستان مەشىتتەرىندە جول قاۋىپسىزدىگى جونىندە ۋاعىز ايتىلا باستادى
قىرعىزستان مەشىتتەرىندە يمامدار مەن ءدىني ليدەرلەر جول قاۋىپسىزدىگى جونىندە ۋاعىز ايتا باستادى. قىرعىزستان مۇسىلماندارى ءدىني باسقارماسىنىڭ حابارلاۋىنشا، مۇنداي بۇيرىقتى 23 قاراشادا باس ءمۇفتي ماقسات قاجى توكتومۋشەۆ شىعارعان.
بۇل قۇجاتقا سايكەس، ءدىني قىزمەتكەرلەر مەشىتكە ناماز وقۋعا كەلگەن ادامدارعا جول قاۋىپسىزدىگى جونىندە، ادام ءومىرىنىڭ بارىنەن قىمبات ەكەنى جونىندە ءتۇسىندىرۋ جۇمىستارىن جۇرگىزۋ قاجەت.
رەسمي مالىمەتكە قاراعاندا، قىرعىز رەسپۋبليكاسىندا جىل باسىنان بەرى بەس مىڭ جول اپاتى ورىن العان. ودان 700 ادام قازا تاپقان. ال زارداپ شەككەندەر سانى 8 مىڭعا جۋىق.
10 قاراشادا پرەمەر-مينيستر ساپار يساكوۆ جول قاۋىپسىزدىگىن قامتاماسىز ەتۋ جونىندە باس باسقارما قۇردى. 13 قاراشادا ۇكىمەت وتىرىسى كەزىندە ول جول قاۋىپسىزدىگى رەفورماسى وتە باياۋ ءجۇرىپ جاتقانىن سىنعا العان.
Abai.kz
