استانادا وتكەن حالىقارالىق «ەكسپو-2017» كورمەسى الەم ەلدەرى الدىندا قازاقستاننىڭ مارتەبەسىن اسقاقتاتىپ قانا قويعان جوق، ەلىمىزدەگى كوپتەگەن سالانىڭ دامۋىنا سەرپىن بەرگەنى شىندىق. اسىرەسە، ەنەرگەتيكا سالاسىنداعىلار ءۇشىن بۇل كورمەنىڭ پايداسى ۇشان-تەڭىز بولدى. وسى ورايدا Abai.kz اقپاراتتىق پورتالىنىڭ شىعىس ازاقستان وبلىسىنداعى ءتىلشىسى ەنەرگەتيك مامانداردى دايىندايتىن بىردەن-ءبىر وقۋ ورنى - وسكەمەن پوليتەحنيكالىق كوللەدجىنىڭ ديرەكتورى يساتاي يسينمەن جولىعىپ، اڭگىمەلەسكەن ەدى.

- «ەكسپو» – قازاقستاننىڭ جوعارى دەڭگەيدە وتكىزگەن ەڭ جارقىن جوباسى بولدى. وسىناۋ اۋقىمى كەڭ جوبانى ابىرويمەن جۇزەگە اسىرۋى قازاقستاننىڭ تەك قانا ورتالىق ازيادا عانا ەمەس، الەمدىك كەڭىستىكتە دە وزىندىك ورنى بار مەملەكەت ەكەندىگىن كورسەتتى، - دەيدى وسكەمەن پوليتەحنيكالىق كوللەدجىنىڭ ديرەكتورى يساتاي ساليحۇلى.

باستاۋىن سوناۋ 1851 جىلدان الاتىن حالىقارالىق كورمەنى ەلىمىزدە وتكىزۋ قازاقستاندىقتارعا نە بەردى؟ يساتاي ساليحۇلىنىڭ ايتۋىنشا، كورمەنىڭ مەملەكەتىمىزگە دە، ءجاي قاراپايىم حالىققا دا بەرگەنى وتە كوپ. بۇل - ينۆەستيتسيا تارتۋدىڭ قۇرالى. بۇل - ەنەرگيانىڭ بالامالى كوزدەرىن ەنگىزۋدى جەمىستى جۇزەگە اسىرىپ وتىرعان الەمنىڭ جەتەكشى كومپانيالارىمەن ىنتىماقتاستىق. بۇل – ءتۋريزمدى دامىتۋ. جالپى، بۇل - ەلدىڭ جاعىمدى ءيميدجىن قالىپتاستىرۋ. سونىمەن قاتار ول حالىقارالىق كورمەنىڭ جاس ۇرپاققا، وقۋشىلار مەن ستۋدەنتتەرگە بەرگەنى دە ۇشان-تەڭىز ەكەنىن ايتادى. «ەكسپو-2017» حالىقارالىق كورمەسى قانشاما مىڭداعان جاس ۇرپاقتىڭ كەۋدەسىندەگى ءۇمىت وتىن ۇرلەدى، تانىم كوكجيەگىن كەڭەيتتى، الداعى ارماندارعا قۇلشىندىردى. ءيا، ونىڭ ناتيجەسى ازىرگە كوزگە ۇرىپ، كورىنىپ تۇرماعانىمەن، بولاشاقتا ول ءوز جەمىسىن مىندەتتى تۇردە بەرەتىنىنە سەنىم مول.

- ەڭ باستى ەنەرگيا ول – ادامنىڭ ءوزىنىڭ ەنەرگياسى، - دەيدى كوللەدج ديرەكتورى.

«ەكسپو» حالىقارالىق كورمەسىنە وسكەمەن پوليتەحنيكالىق كوللەدجىنەن 150 ستۋدەنت بارىپتى. ونىڭ ىشىندە 75 ستۋدەنت كورمەنى تەگىن تاماشالاۋ باقىتىنا يە بولعان. كوللەدج ديرەكتورى يساتاي ساليحۇلىنىڭ ءوزى دە حالىقارالىق كورمەگە ەكى رەت ارنايى بارعان. ويتكەنى، كورمە تاقىرىبى ول ءۇشىن وتە وزەكتى. ول باسقارىپ وتىرعان وسكەمەن پوليتەحنيكالىق كوللەدجى 65 جىلدان استام ۋاقىت بويى ءوڭىرىمىزدىڭ ەنەرگەتيكا سالاسى ءۇشىن ماماندار دايارلاۋدى جۇزەگە اسىرىپ كەلە جاتىر. جىل سايىن اتالعان كوللەدجدى 280-300-گە جۋىق تۇلەك ءبىتىرىپ، جاڭا ومىرگە قانات قاعادى.

- وزدەرىڭىز بىلەسىزدەر، ءبىزدىڭ وبلىسىمىزدا ەنەرگەتيكالىق سالا وتە جاقسى دامىعان. وڭىرىمىزدە ءۇش بىردەي گەس، ەكى ۇلكەن جەس بار. ونداعى مامانداردىڭ نەگىزگى بولىگىن ءبىزدىڭ كوللەدجدىڭ تۇلەكتەرى قۇرايدى. وسكەمەن گەس-ىمەن قويان-قولتىق جۇمىس ىستەيمىز. كاسىپورىنمەن ارادا ءدۋالدى وقىتۋ بويىنشا ارنايى مەموراندۋمعا قول قويىلعان. بولاشاق تەحنيك ەلەكتريك ماماندارىمىز ءبىرىنشى كۋرستان باستاپ-اق وسى كاسىپورىندا تاجىريبەدەن وتەدى. سىناق كەزىندە دە كوميسسيا قۇرامىندا گەس ماماندارى بولادى. الداعى ۋاقىتتا وقۋ ورنىندا گيبريدتى ەنەرگەتيكا بويىنشا جاڭا ءبىر ماماندىققا ليتسەنزيا الۋدى ويلاستىرىپ وتىرمىز، - دەيدى ول.

يساتاي ساليحۇلى ونىڭ سەبەبىن دە ءتۇسىندىرىپ بەردى. ويتكەنى، قازىرگى كۇنى الەمدە ءداستۇرلى ەمەس ەنەرگيا كوزدەرىن پايدالانۋ ۇلكەن ماڭىزعا يە بولىپ وتىر. اسىرەسە، كۇن، جەل ەنەرگياسىن وندىرۋگە دەگەن قىزىعۋشىلىق باسىم. ويتكەنى، بۇل ەنەرگيا كوزدەرى شىعىنى از ءارى ەكولوگيالىق تازا بولۋىمەن تارتىمدى. ولاي بولسا، ءبىز دە كوشتەن قالماۋىمىز كەرەك. راس، قازىرگى كۇنى ەلىمىزدە ەنەرگيا تاپشىلىعى ايتارلىقتاي ءبىلىنىپ وتىرعان جوق. ويتكەنى، جەرىمىزدىڭ قويناۋى قازبا بايلىقتارعا وتە باي. بىراق سارقىلمايتىن بايلىق بولمايدى. سول كەزدە سان سوعىپ قالماۋ ءۇشىن بالامالى ەنەرگيا كوزدەرىن پايدالانۋدى قولعا الۋ قاجەت.

- الداعى ۋاقىتتا ستۋدەنتتەرگە بەرىلەتىن كۋرستىق جانە ديپلومدىق جۇمىستاردىڭ مازمۇنىن قايتا قاراۋدى ويلاستىرىپ وتىرمىز. وعان قانداي دا ءبىر ەنەرگيانىڭ بالامالى كوزدەرى تۋرالى جۇمىستاردى ەنگىزۋ دە ويىمىزدا بار،  -دەيدى ديرەكتور.

سەرىك سەكمان

وسكەمەن

Abai.kz