سەنبى, 30 مامىر 2020
COVID-19 قازاقستاندا. جۇقتىرعاندار — 10382. جازىلعاندار — 5057. قايتىس بولعاندار — 37
ءجون-اق 1538 0 پىكىر 26 قازان, 2017 ساعات 13:39

مەملەكەتتىك ءتىل مەملەكەتتىك قىزمەتتەگى ورنىن ەش ءبىر تىلگە بەرمەۋى كەرەك

 

اتازاڭىمىزدا مارتەبەسى «مەملەكەتتىلىك» دەپ بەلگىلەنگەن قازاق ءتىلى  7-باپتىڭ 2. تارماعى بويىنشا كوپ رەتتە ءوزىنىڭ رەسمي ءرولىن ورىستىلىنە بەرىپ قويادى. قاراڭىز: 2. مەملەكەتتىك ۇيىمداردا جانە جەرگىلىكتى ءوزىن-ءوزى باسقارۋ ورگاندارىندا ورىس ءتىلى رەسمي تۇردە قازاق تىلىمەن تەڭ قولدانىلادى. الايدا، بۇل تارماق قازاق تىلىنە كولەڭكە تۇسىرمەۋى كەرەك. وكىنىشكە قاراي، مەملەكەتتىك ۇيىمداردا بولسىن، جەرگىلىكتى ءوزىن-ءوزى باسقارۋ ورگاندارىندا بولسىن ورىس ءتىلى رەسمي تۇردە قازاق ءتىلىنىڭ ورىنىن يەلەنىپ كەتىپ جاتىر. ءبىز بۇنداي كەراعارلىققا قۇقىتىق مەملەكەت رەتىندە جول بەرمەۋىمىز كەرەك. سونىڭ ءبىر جولى مەملەكەتتىك قىزمەتتە مەملەكەتتىك ءتىلدىڭ ءورىسىن كەڭەيتىپ، پارمەنىن كۇشەيتۋ. مىنە، وسى ماقساتتا تاراز قالاسىندا وتكەن رەسپۋبليكالىق «مەملەكەتتىك ءتىل مەملەكەتتىك قىزمەتتە» اتتى بايقاۋدى اتاۋعا بولادى. مەملەكەتتىك قىزمەتتە قازاق ءتىلىنىڭ قولدانىس اياسىن كەڭەيتىپ، مەملەكەتتىك ءتىلدىڭ مارتەبەسىن كوتەرۋ ماقساتىندا ۇيىمداستىرىلعان شاراعا قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى مۇرىندىق بولدى.

مەملەكەتتىك قىزمەتشىلەردىڭ قازاق تىلىنە دەگەن وڭ كوزقاراسىن قالىپتاستىرىپ، قۇجات ءتىلىنىڭ مەملەكەتتىك تىلگە كوشۋىنە، قىزمەتتەردىڭ قازاق تىلىندە كورسەتىلۋىنە جاعداي جاسايتىن بايقاۋعا ەل اۋماعىنان 13 كوماندا قاتىستى. ولار بايقاۋ شارتىنا ساي 4 كەزەڭ بويىنشا بىلىمدەرى مەن بىلىكتىلىكتەرىن كورسەتتى.

ايماقتىق ىرىكتەۋدەن وتكەن كوماندالارعا قوعام قايراتكەرى، ساياسي عىلىمدار دوكتورى ابدىجالەل باكىر (توراعا), تاراز يننوۆاتسيالىق-گۋمانيتارلىق ۋنيۆەرسيتەتىنىڭ «تۇركىتانۋ» عىلىمي-زەرتتەۋ ورتالىعىنىڭ باس مامانى، فيلولوگيا عىلىمدارىنىڭ دوكتورى، پروفەسسور قاسيەت كاكەنۇلى، قازاق ۇلتتىق سالت-داستۇرلەرى اكادەمياسىنىڭ پروفەسسورى، كومپوزيتور كەنتاۋ قۋانتايۇلى، قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ اعا وقىتۋشىسى ءلاززات پەرنەبەكقىزى، مەملەكەتتىك ءتىلدى دامىتۋ ينستيتۋتىنىڭ اتقارۋشى ديرەكتورى، فيلولوگيا عىلىمدارىنىڭ كانديداتى بيجومارت سەيسەنبەكۇلى قازىلىق ەتتى.

سايىس قورىتىندىسى بويىنشا الماتى قالاسىنىڭ قۇراماسى "الاتاۋ" جەڭىمپاز اتاندى. جۇلدەلى 1-ورىن جامبىل وبلىسىنىڭ "پراگماتيكتەر" كومانداسىنا بۇيىردى. ال 2-ورىندى قر ءدىن ىستەرى جانە ازاماتتىق قوعام مينيسترلىگىنىڭ ء"ۇش باقىتىم" كومانداسى ەنشىلەسە، 3-ورىندى "ەكسپو" (الماتى وبلىسى), "15-ءشى ءوڭىر" (سقو) كوماندالارى ءوزارا ءبولىستى. جەڭىمپاز بەن جۇلدەگەر كوماندالارعا ارنايى ديپلوم مەن قوماقتى قارجىلاي سىيلىق تابىستالدى.

ارينە، بۇل شارا يگى باستاما. بىراق، مەملەكەتتىك قىزمەتتەگى مەملەكەتتىك ءتىل ماسەلەسى بايقاۋلار مەن جيىنداردىڭ ورامىندا قالماۋى كەرەك.

Abai.kz

0 پىكىر