ماسكەۋدە ساياسي قۋعىن-سۇرگىن قۇرباندارىن ەسكە الۋ اكتسياسى ءوتتى
29 قازاندا ماسكەۋدە "ەسىمدەردىڭ قايتا ورالۋى" اتتى ساياسي قۋعىن-سۇرگىن قۇرباندارىن ەسكە الۋ اكتسياسى ءوتتى. لۋبيانا الاڭىندا تاڭعى ساعات 10-نان كەشكى ساعات 10-عا دەيىن ستاليندىك تەررور كەزىندە قازا تاپقانداردىڭ ەسىمدەرى وقىلدى.
اكتسياعا مىڭنان استام ادام قاتىستى. ولاردىڭ اراسىندا قوعام جانە ساياسات قايراتكەرلەرى، اتاپ ايتقاندا رەسەي ادام قۇقىعىن قورعاۋ جونىندەگى ۋاكىل تاتيانا موسكالكوۆا، "يابلوكو" پارتياسىنىڭ جەتەكشىسى گريگوري ياۆلينسكي، فەدەراتسيا كەڭەسىنىڭ مۇشەسى ۆلاديمير لۋكين جانە تەلەجۇرگىزۋشى، 2018 جىلعى پرەزيدەنتتىك سايلاۋعا قاتىسقىسى كەلەتىن كسەنيا سوبچاك بار. اكتسيانى "مەموريال" ادام قۇقىعىن قورعاۋ ۇيىمى وتكىزدى.
"ەسىمدەردىڭ قايتا ورالۋى" اكتسياسى 2007 جىلدان بەرى ءوتىپ كەلەدى. وعان كەز كەلگەن ادام قاتىسا الادى. 30 قازاندا رەسەي ساياسي قۋعىن-سۇرگىن قۇرباندارىن ەسكە الۋ كۇنىن اتاپ وتەدى.
Abai.kz
