وزبەكستان ءتول مەسسەندجەرىن ىسكە قوسادى
"وزبەكتەلەكوم" جۋىردا Uzphone دەپ اتالاتىن ءتول مەسسەندجەرىن ىسكە قوسۋدى جوسپارلاپ وتىر، ول Telegram, Skype, Viber جانە WhatsApp مەسسەندجەرلەرىنىڭ انالوگى بولادى.
قازىر بۇل مەسسەندجەر الفا-سىناقتان ءوتىپ جاتىر، ول ارقىلى حابارلاما جولداپ، تەلەفون سوعۋعا بولادى، دەپ حابارلادى جەرگىلىكتى اقپارات قۇرالدارى.
"ول ازىرگە جاپپاي قولدانىسقا شىققان جوق. ەكى ايدىڭ كولەمىندە بەتا-سىناق دەڭگەيىنە وتەمىز. كەلەسى جىلى ونى رەسمي تۇردە كوپشىلىككە تانىستىرامىز", – دەدى "وزبەكتەلەكوم" كومپانياسى فيليالىنىڭ ديرەكتورى مارات فاتتاحوۆ.
بولاشاقتا، شامامەن ءبىر جىلدان سوڭ قوسىمشانى سمارت-تەلەۆيزورلارمەن جانە باقىلاۋ كامەرالارىمەن بايلانىسقا شىعا الاتىنداي ەتىپ جەتىلدىرىلەدى. كومپانيا ءبىر ۋاقىتتا 1 ملن قولدانۋشىعا قىزمەت كورسەتۋگە ءازىر.
بۇعان دەيىن رەسپۋبليكادا الەۋمەتتىك جەلىلەردىڭ "ودنوكلاسسنيكي" جانە Facebook انالوگتارى جاسالعان، بىراق ولار وزبەكستاندىقتار اراسىندا اسا تانىمال بولا قويعان جوق.
Abai.kz
