بەيسەنبى, 28 ناۋرىز 2024
جانايقاي 6318 1 پىكىر 26 قازان, 2017 ساعات 18:23

ەلباسىنىڭ "ەگىزى" وتباسىمەن دالادا قالماقشى...

 

مەملەكەت باسشىسى ن. نازارباەۆقا سىرت كەلبەتى ەگىزدىڭ سىڭارىنداي ۇقساس ازامات - باۋىرجان توقپانوۆتىڭ وتباسى جاقىن كۇندەرى دالادا قالۋى مۇمكىن.  57 جاستاعى باۋىرجان توقپانوۆ 1996 جىلدان بەرى استانادا تۇرادى. ونىڭ ەلباسىعا ۇقسايتىنىن كورگەن ادام بىردەن مويىندايدى. كوپ ادام ونىمەن بىرگە سۋرەتكە ءتۇسىپ الۋدى دا ءجون كورەدى، دەپ حابارلايدى يا «NewTimes.kz» سايتى. 

 

ول 2003 جىلى كوشىپ كەلگەن پاتەرىنەن وتباسىن قۋىپ جاتقانىن ايتادى.

«2003 جىلى مامىر ايىندا جالعىز ءۇيىمدى ساتىپ، «اكمولاسۆيازستروي» اق قۇرىلىسىمەن كەلىسىم ارقىلى 25 مىڭ دوللارعا ءۇيدى ساتىپ الدىق. اقشاسىن تولەپ، قۇجاتىن راسەمدەپ كوشىپ كەلدىك. ەندى 14 جىلدان سوڭ ۇيدەن شىعۋىمىزدى تالاپ ەتۋدە. 2003 جىلعى كەلىسىم جارامسىز بولىپ شىققان»، – دەيدى توقپانوۆ.

توقپانوۆتىڭ ايتۋىنشا، 2011 جىلى «اكمولاسۆيازستروي»  اتتى بۇرىنعى كومپانيا مەن جاڭا كومپانيا اراسىندا داۋ تۋىپ، سوڭى قىلمىستىق ىسكە دەيىن بارعان. بۇرىنعى ديرەكتورى ءىستى بولعان. ول پاتەردى ساتۋعا قول قويعان.

«بۇرىنعى ديرەكتور پاتەرگە تولەگەن اقشانى ءوزى يەمدەنىپ وتىرىپتى. ءبىزدىڭ پاتەرىمىزگە قاتىستى قانداي دا ءبىر ماسەلە بولىپ جاتقانىن بىلگەن جوقپىز. بۇل جايلى ەشكىم ەشتەڭە ايتقان ەمەس»، – دەيدى ول.

سوت شەشىمىنشە، «اكمولاسۆيازسترويدىڭ» بۇرىنعى باسشىسى شىعىن كەلتىرگەنى دالەلدەنىپ، توقپانوۆتار وتباسىنىڭ پاتەرگە اقشا تولەگەنى، اقشانى وزگەنىڭ يەمدەنگەنى جايلى بىلمەگەنى راستالعان.

«بيىلعى جىلى 2012 جىلى ءىستى بولعان باسقارۋشى ءبىزدىڭ پاتەرگە قاتىستى ارىز جازدى. سوت ءبىزدىڭ پاتەرگە قاتىستى كەلىسىمدى جارامسىز دەپ تانىدى. ەگەر سوت تورەشىلەرى جوق قىلىپ وتىراتىن بولسا، زاڭ نە ءۇشىن كەرەك؟ ازاماتتىق كودەكسكە سايكەس، زاڭدى تۇلعا ءوز ارەكەتى مەن ورىنداۋشىنىڭ ارەكەتى ءۇشىن ءوزى جاۋاپ بەرەدى. ەگەر ولاردىڭ باسشىسى زيان كەلتىگەن بولسا، مۇنى وزدەرى شەشۋ كەرەك. ءبىز زاڭ بۇزعان جوقپىز. باسشىلارى ءبىرىن ءبىرى تونايدى. سوڭىندا مەن كىنالى بولىپ شىعامىن»، – دەيدى باۋىرجان توقپانوۆ.

 

«سوت ورىنداۋشىسى  14 قىركۇيەك كۇنى كەلىپ ءبىزدى ۇيدەن شىعارماق بولدى. ءبىز قالادا بولماعاندىقتان عانا شىعارا المادى. مەن قايدا بارارىمدى بىلمەيمىن. دالادا تۇنەيمىز بە؟ باسقا باسپانامىز جوق. ءبىز قىلمىسكەر ەمەس، ساتىپ الۋشىمىز. بىزدە ءبىر عانا امال بار. ول – الاڭدا سوت شەشىمىنىڭ ادىلەتسىزدىگىن ايتىپ ءوزىمىزدى ورتەۋ. مەن الاياقتىڭ قۇربانى بولىپ وتىرمىن. بىراق مەنىڭ كىنامدى ەشكىم ماعان تۇسىندىرگەن جوق»، – دەيدى ول.

باۋىرجان توقپانوۆ جوعارعى سوت كەڭەسىنە حات جازعان. ودان بولەك باس پروكۋرور جاقىپ اسانوۆتان كومەك تە  سۇراعان.

«مەن 57 جاسىمدا قايىرشى بولىپ قالدىم. كەشە سوت ورىنداۋشىسى كەلىپ، ۇيدەن شىعۋىمىزدى تالاپ ەتتى. 6 ادام دالاداعى قۇبىرلاردا تۇنەيمىز بە؟ قازاقستاندى سىعان توبىرىنا اينالدىرايىق وسىلاي. كىمگە بارىپ جاعدايىمدى ايتارىمدى بىلمەيمىن. ءۇيدى جارىپ جىبەرەيىن دەسەم، كورشىلەرىم بار. ولاردىڭ كىناسى جوق قوي. ال، مەنىڭ ەشتەڭە جوعالتپاستان ءولىپ كەتۋىمە بولادى»، – دەيدى اشىنعان ازامات.

1 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3513