جەكسەنبى, 31 مامىر 2020
COVID-19 قازاقستاندا. جۇقتىرعاندار — 10858. جازىلعاندار — 5220. قايتىس بولعاندار — 40
«سوقىر» فەميدا 3925 23 پىكىر 23 قازان, 2017 ساعات 09:54

رۋزا بەيسەنبايتەگىنىڭ ورنىنا مەنى سوتتاڭىزدار!

 

قر پرەزيدەنتى ن.نازارباەۆقا

قر پارلامەنتى سەناتىنىڭ توراعاسى ق.توقاەۆقا

قر ۇكىمەتىنىڭ پرەمەر-ءمينيسترى ب.ساعىنتاەۆقا

اشىق حات

...ەرتەدە ازىرەيىل بۇگىنگىدەي ەمەس، ادام جانىن الاردا الدىمەن ەسكەرتەدى ەكەن. سول  ادەتىمەن ول ون ءۇش جاسار ءبىر بالاعا دا كەلىپ: "ەرتەڭ وسى ۋاقىتتا جانىڭدى الامىن" دەپتى. بالا اكە-شەشەسىمەن، بىرگە تۋعان باۋىرلارىمەن، دوستارىمەن تەگىس قوشتاسىپتى. ەرتەسىنە ازىرەيىل كەلگەندە بالانىڭ ءبىر دوسى ازىرەيىلگە: "بۇل بالا مەنىڭ دوسىم. مەن ودان ءبىر جاس ۇلكەنمىن. مەن ءومىردىڭ قىزىعىن ءبىر جىل بولسا دا ودان كوبىرەك كوردىم. دوسىمنىڭ ورنىنا مەنىڭ جانىمدى ال" دەپتى. وعان دەيىن ءبىر دە ءبىر ادام ازىرەيىلگە ونداي ءوتىنىش ايتپاعان ەكەن. نە ىستەرىن بىلمەگەن ول ۇشىپ اللاعا بارىپتى. اللا-تاعالا ەكەۋىنىڭ دە جانىن وزدەرىنە قالدىر دەپتى...

رەسمي حاتتا اڭىزدى نەگە جازىپ وتىر دەمەڭىزدەر. ءبىزدىڭ بيلىكتەگى مىرزالاردان ءبارىن كۇتۋگە بولاتىنىن ءبارىمىز بىلەمىز، الىسقا بارماي-اق قازاقتىڭ جەرىن شەتەلدىكتەرگە ساتۋدان قورعاعان اتىراۋلىق ەكى پاتريوت ازاماتتىڭ ەشقانداي  قيسىنعا كەلمەيتىن ايىپتار نەگىزىندە سوتتالىپ كەتكەنىن ەسكە الساق تا جەتەدى. ال، بۇگىن ءدال سول سەكىلدى قازاقتىڭ تاعى ءبىر پاتريوتى پاۆلودارلىق رۋزا بەيسەنبايتەگىن قازاق ءتىلىنىڭ مەملەكەتتىك ءتىل مارتەبەسىنە ساي بولۋىن تالاپ ەتكەنى ءۇشىن سوتتاۋعا دايىندىق قاتتى ءجۇرىپ جاتىر.

مەن رۋزادان ءبىراز جاس ۇلكەنمىن. ەگەر رۋزانى سوتتاي قالسا، ونىڭ ورنىنا مەنى اپارىپ قاماۋلارىڭىزدى الدىن-الا وتىنەمىن. ول ءوتىنىشىم ىسكە اسۋى ءۇشىن سىزدەردەن زاڭ تۇرىندە نەمەسە جارلىق تۇرىندە بولسا دا ەلىمىزدىڭ كەز كەلگەن ازاماتى وزگە ءبىر ازاماتتىڭ كىناسىزدىگىنە سەنگەن جاعدايدا ءوز ەركىمەن الگى ادامنىڭ ايىبىن موينىن الۋعا بولاتىنىن جەدەلدەتە زاڭداستىرىپ بەرۋلەرىڭىزدى سۇرايمىن. جەمقورلاردى دا قازىنادان جىمقىرعانىن قايتارسا، سوتتامايتىن ەتىپ قويعان جوقپىز با؟ سوندىقتان مەنىڭ ادىلەتسىزدىكتىڭ الدىن-الۋعا باعىتتالعان بۇل ءوتىنىشىمدى ورىنداۋ اسا ءبىر ۇلكەن قيىندىق تۋدىرا قويادى دەپ ويلايمىن. ەسەسىنە كىناسىز ادال جانداردى جازىقسىز زارداپ شەگۋدەن قۇتقارۋ ءادىسى تابىلادى.

قۇرمەتپەن، ومىرزاق اقجىگىت

Abai.kz

23 پىكىر