سارسەنبى, 27 قاڭتار 2021
2287 1 پىكىر 5 قازان, 2017 ساعات 09:25

قۇلاعان ۇشاقتىڭ "قارا جاشىگى" ماسكەۋگە جىبەرىلەدى

سەيسەنبىنىڭ كەشىندە الماتىدان وتىز شاقىرىمداي جەردە اپاتقا ۇشىراعان ان-28 ۇشاعىنىڭ وقيعا ورنىنان تابىلعان اقپارات قۇرىلعىلارىنا ساراپتاما ماسكەۋ قالاسىندا جاسالادى. بۇل تۋرالى اپات سەبەبىن انىقتاۋ جونىندە قۇرىلعان ارنايى كوميسسيانىڭ جەتەكشىسى، قازاقستاننىڭ ينۆەستيتسيا جانە دامۋ ءمينيسترىنىڭ ورىنباسارى رومان سكليار حابارلادى.

"اپات ورنىنان تابىلعان وبەكتيۆتى اقپارات قۇرالدارى تمد ەلدەرىنىڭ مەملەكەتارالىق اۆياتسيا كوميتەتىنىڭ (ماسكەۋدەگى - رەد.) زەرتحاناسىنا جولدانادى", - دەدى سكليار.

رەسمي مالىمەت بويىنشا، 3 قازاندا الماتىدان شىمكەنتكە ۇشىپ شىققان ان-28 ۇشاعى ساعات 18:47 كەزىندە راداردان جوعالىپ كەتكەن. كەيىن ۇشاق الماتىدان 28 كيلومەتر جەردە، ىلە اۋدانىنداعى مەجدۋرەچينسك اۋىلىنىڭ ماڭىنان جانىپ جاتقان كۇيى تابىلعان. ۇشاق ەلەكتر باعاندارىنىڭ سىمدارىن ءۇزىپ بارىپ قۇلاعان.

ۇشاقتا ەكيپاج كاپيتانى گەننادي تسوي، ەكىنشى ۇشقىش ەۆگەني كۋتافين جانە اۆياتەحنيك بەيشيبەك احماتباەۆپەن بىرگە شىمكەنتكە اۋىر ناۋقاسقا مەديتسينالىق كومەك كورسەتۋگە بارا جاتقان ماماندار – اكۋشەرلىك ءىسى عىلىمي ورتالىعىنىڭ اكۋشەر-گينەكولوگى، پروفەسسور تالعات پاتساەۆ پەن كارديولوگيا جانە ىشكى اۋرۋلار عىلىمي زەرتتەۋ ينستيتۋتىنىڭ رەانيماتولوگى، پروفەسسور جانىبەك ارتىقباەۆ بولعان. ۇشاق اپاتىنان بەسەۋى دە قازا تاپقان.

Abai.kz

1 پىكىر