بۇگىن نۇرلان نىعماتۋليننىڭ توراعالىعىمەن وتكەن جالپى وتىرىستا بيۋدجەت زاڭناماسىن جەتىلدىرۋگە باعىتتالعان تۇزەتۋلەر ءبىرىنشى وقىلىمدا ماقۇلداندى.

تالقىلاۋدى قورىتىندىلاي كەلە، ءماجىلىس سپيكەرى زاڭ جوباسىنىڭ بيۋدجەت شىعىستارىنىڭ تيىمدىلىگىن تۇبەگەيلى ارتتىرۋعا جانە بيۋدجەتتىك راسىمدەردى وڭايلاتۋعا باعىتتالعانىن العا تارتا كەلىپ:

-بىزگە ناقتى ناتيجە كەرەك. ول تۇرعىن ۇيلەر، مەكتەپتەر، بالا-باقشالار، اۋرۋحانالار سالۋ. سوندا عانا ەلباسىنىڭ بولىنگەن قارجىلار ەكونوميكانى دامىتۋعا، ازاماتتاردى جۇمىسپەن قامتۋعا جانە حالىقتىڭ ءال-اۋقاتىن ارتتىرۋعا جۇمىس ىستەۋ كەرەكتىگى جونىندەگى تاپسىرماسىن جۇزەگە اسىرامىز،-دەدى ن. نىعماتۋلين.

زاڭ جوباسىندا بيۋدجەتتىك باعدارلامالاردى ىسكە اسىرۋدى وڭايلاتۋ جانە مەملەكەتتىك ورگانداردىڭ دەربەستىلىگىن ارتتىرۋ،   ەسەپكە جازۋ ادىسىمەن بيۋدجەتتەۋدى بىرتىندەپ ەنگىزۋ، مەملەكەتتىك جانە مەملەكەت كەپىلدىك بەرگەن بورىشتى رەتتەۋدى كۇشەيتۋ، ءىت-جوبالارىن، مەملەكەتتىك ورگانداردىڭ اقپاراتتىق جۇيەلەرىن  قۇرۋ، دامىتۋ ءۇشىن قاجەتتى قۇجاتتامانى دايىنداۋ راسىمدەرىن وڭايلاتۋ باعىتتارى بويىنشا تۇزەتۋلەر قامتىلىپ وتىر.

Abai.kz