قازاقستاندىق گەننادي گولوۆكين مەكسيكالىق ساۋل "كانەلو" الۆارەسپەن تەڭ ءتۇستى، جانە بارلىق تيتۋلىن ساقتاپ قالدى، - دەپ حابارلايدى Vesti.kz.

لاس-ۆەگاستىڭ 20 مىڭ ادامعا ارنالعان T-Mobile ارەناسىندا وتكەن جەكپە-جەكتە GGG باسىنان-اق جيناقى ارەكەت ەتە باستادى، ال "كانەلو" قورعانىستان باستادى. ەكى بوكسشى دا ەكى راۋندتا ءبىر-بىرىنە بەلسەندى تۇردە ءدال سوققى جاسادى. ايتا كەتەيىك، ءاربىر سوققى سايىن تريبۋنادا وتىرعانداردىڭ ايعايى ەستىلىپ تۇردى.

ءۇشىنشى راۋندتىڭ باسىندا گولوۆكين بار كۇشىن سالىپ، مەكسيكالىقتى تىعىرىققا تىرەي باستادى. كەيىن قازاقستاندىق بوكسشى باسەڭدەدى، دەگەنمەن گولوۆكين ءبىرىنشى نومىردە ويىن كورسەتىپ وتىردى. "كانەلو" دا قالىسپاي ءدال سوققىلارمەن جاۋاپ بەردى. ال كەلەسى ءتورتىنشى راۋندتا الۆارەس بەلسەندىرەك ارەكەت ەتە باستادى، بىراق GGG ونى قىسىپ الىپ، جاقسى شابۋىل جاسادى. بۇل راۋندتا دا جەڭىمپاز انىقتالمادى.

بەسىنشى راۋندتا گولوۆكين "كانەلوعا" قىسىم جاساۋىن جالعاستىرا بەردى، بىراق مەكسيكالىق تا وعان جاقسى سوققىلارمەن جاۋاپ بەرىپ وتىردى. وسى ساتتە ەكى بوكسشى دا ءبىر مينۋت بويى "مەن سەنىڭ سوققىلارىڭنان قورىقپايمىن" دەپ ايتىپ تۇرعانداي بولدى. ال التىنشى راۋند بولسا، الدىڭعى راۋندتارعا ۇقساس بولدى: گولوۆكين سوققىلار جاسادى، ال "كانەلو" وعان تەك جاۋاپ بەرىپ ءجۇردى.

جەتىنشى جانە سەگىزىنشى راۋندتاردا گولوۆكين مەن الۆارەس تەڭ دارەجەدە جۇدىرىقتاستى. راۋندتار اراسىنداعى ۇزىلىستە ماكسيم گولوۆكين باۋىرىنا "بارلىعى ەندى باستالادى" دەپ ايتىپ جاتتى.

وسىعان دەيىن گولوۆكين مەن الۆارەس رەسمي سالماق ولشەۋ راسىمىنەن وتكەن بولاتىن. ونىڭ قورىتىندىسى بويىنشا گولوۆكيننىڭ سالماعى - 160 فۋنت. مۇنداي كورسەتكىشتى "كانەلو" دا كورسەتتى. وسىلايشا، ەكى بوكسشى دا ورتا سالماقتىڭ ەرەجەسى بويىنشا بەلگىلەنگەن 160 فۋنتتى (72,5 كەلى) كورسەتتى.

ايتا كەتەيىك، گولوۆكين - "كانەلو" جەكپە-جەگى لاس-ۆەگاستاعى (اقش، نەۆادا) T-Mobile Arena ارەناسىندا ءوتتى. بوكس كەشى استانا ۋاقىتى بويىنشا تاڭعى 06:00-دەن باستاپ Qazaqstan جانە QazSport تەلەارنالارىنان تىكەلەي ەفيردەن كورسەتىلدى. اقش-تا بۇل جەكپە-جەك (PPV) اقىلى جۇيە ارقىلى كورسەتىلدى. ءبىر تەلەۆيزوردان كورۋ قۇنى 75 دوللار بولدى.

Abai.kz