ەلىمىزدەگى بىرقاتار ۇكىمەتتىك ەمەس ۇيىم وكىلدەرى لاتىن قارپىنە كوشۋدى قولدايتىنىن ايتىپ، مالىمدەمە جاسادى. حالىقارالىق «جاناشىر» قورىنىڭ پرەزيدەنتى جاڭىل اپەتوۆا لاتىن جازۋىنا كوشۋ ءبىزدى الەمنىڭ ءار تۇكپىرىندەگى 5 ميلليونعا جۋىق قازاقتارمەن جاقىنداستىرا تۇسەدى دەگەن پىكىر ءبىلدىردى.

قور باسشىسىنىڭ ايتۋىنشا، بۇگىنگى تاڭدا كيريلل جازۋىن الەمنىڭ 12 مەملەكەتى عانا پايدالانادى. ال قالعاندارىنىڭ كوپشىلىگى لاتىن ءالىپبيىن قولدانادى. دەمەك، بۇل كەڭ تارالعان جازۋ. «قازىر الەمنىڭ تۇكپىر-تۇكپىرىندە 5 ميلليونعا جۋىق قازاق تۇرادى. ولاردىڭ 80 پايىزى لاتىن ءالىپبيىن پايدالانادى. ياعني، ءبىز بولاشاقتا لاتىن الىپبيىنە كوشسەك، سول قانداستارىمىزبەن جاقىنداسا تۇسەمىز. بۇل – سىرتتاعى اعايىننىڭ كوپتەن كۇتكەن ارمانى. ءبىز، قازاقستاندىقتار كوپشىلىك بولىپ لاتىن قارپىنە  كوشۋگە دايىن ەكەنىمىزدى كورسەتىپ، وسىنداي ماڭىزدى قادامعا بارۋعا اۋىزبىرشىلىك تانىتقانىمىز ءجون بولادى»،- دەيدى ول.

سونىمەن قاتار، «جاناشىر» قورىنىڭ پرەزيدەنتى لاتىن الىپبيىنە كوشۋگە قاتىستى حالىققا جۇرگىزىلگەن ساۋالناما قورىتىندىلارىن دا جاريا ەتتى. ءدىن ىستەرى جانە ازاماتتىق قوعام مينيسترلىگىنىڭ قولداۋىمەن «ازاماتتىق باستامالاردى قولداۋ ورتالىعى» كوممەرتسيالىق ەمەس مەكەمەسىنىڭ گرانتتىق باعدارلاماسى اياسىندا «حالىقتىڭ ۇلتتىق مادەني-بىرلىگىن ساقتاۋداعى زيالىلاردىڭ ءرولى» دەپ اتالاتىن جوبا بويىنشا كونفەرەنتسيالار مەن دوڭگەلەك ۇستەلدەر، مەكتەپ جانە كوللەدج وقۋشىلارىمەن كەزدەسۋلەر وتكىزىلگەن. وسى باسقوسۋلاردا لاتىن قارپىنە كوشۋ تۋرالى ساۋالناما جۇرگىزىلگەن. سايىپ كەلگەندە، سۇراۋ سالىنعانداردىڭ 80-90 پايىزى لاتىن جازۋىنا كوشۋدى ءبىراۋىزدان قولدايتىندارىن ايتىپتى.

ەلباسىنىڭ باستاماسىن اۋعان سوعىسى ارداگەرلەرى ۇيىمدارىنىڭ «قازاقستان ارداگەرلەرى» قاۋىمداستىعى دا تولىعىمەن قولدايتىنىن مالىمدەدى. قاۋىمداستىق توراعاسى باقىتبەك سماعۇلدىڭ ايتۋىنشا، لاتىن قارپى ارقىلى ەلىمىز قازىرگى زامانعى تەحنولوگيالىق ورتاعا، كوممۋنيكاتسياعا، سونداي-اق، عىلىمي جانە ءبىلىم بەرۋ ۇدەرىسىنە تەرەڭىرەك كىرىگە تۇسەدى.

«مەملەكەت بۇل ىسكە بارىنشا بايىپتىلىقپەن، دايەكتىلىكپەن جانە دايىندىقپەن كىرىسۋدە. قازاقتىڭ جاڭا جازۋىنىڭ سىنشىسى دا، تىلەكشىسى دە، تورەشىسى دە حالىق بولماق. دەمەك، ءالىپبيدىڭ سوڭعى نۇسقاسىنىڭ قانداي بولاتىنى دا بارشا قازاقستاندىقتارعا بولۋعا ءتيىس. بۇل باستاما ءبولىنىپ-جارىلۋعا ەمەس، ەسكىدەن ارىلۋعا، سانانىڭ جاڭعىرۋىنا، مەملەكەتتىك ءتىلدىڭ جاڭاشا دامۋىنا باستايدى. تاۋەلسىز قازاق ەلىنىڭ ازاماتتارىنا الدەنەنى سىرتتان تاڭۋعا ەشكىمنىڭ حاقىسى جوق. بۇل – ءبىزدىڭ، تاۋەلسىز قازاقستاننىڭ وركەنيەتتىك تاڭداۋى. بۇل تاڭداۋدا دا بارشا قازاقستاندىقتاردىڭ كەزەكتى رەت ىرىس پەن ىزگىلىككە ۇشتاسار بىراۋىزدىلىق تانىتارىنا سەنىم بىلدىرەمىز»،- دەيدى باقىتبەك سماعۇل.

Abai.kz