جۇما, 1 شىلدە 2022
نە دەيدى؟! 27198 28 پىكىر 24 تامىز, 2017 ساعات 13:14

«دايش-تىڭ مۇناي ءمينيسترىنىڭ» بەكبولاتپەن قانداي بايلانىسى بار؟

جاقىندا عانا قر ءماجىلىس دەپۋتاتى بەكبولات تىلەۋحان مىرزانىڭ تۇركيا پرەزيدەنتى رەجەپ تايىپ ەردوعاننىڭ ۇلى ءبىلال ەردوعانمەن كەزدەسكەنى بەلگىلى بولدى. «كەزدەسكەن شىعار، وندا نە تۇر دەۋىڭىز» ابدەن مۇمكىن. دۇرىس ايتاسىز. ىسكەرلىك كەزدەسۋ بولعان شىعار-اق. تەك وقىرمان، ءبىلال ەردوعان جايلى نە بىلەدى؟  وسى سۇراقتىڭ جاۋابىنا كەلەيىك.

ء(ماجىلىس دەپۋتاتى بەكبولات تىلەۋحان)

جۇرت بىلەتىن بەكبولات تىلەۋحان

اۋەلى، بەكبولات قانايۇلى تىلەۋحانعا توقتالايىق. قازاق پارلامەنتىنىڭ ەڭ ىسكەر دەپۋتاتتارىنىڭ ءبىرى. ونەرپاز رەتىندە قالىڭ قازاقتىڭ سۇيىسپەنشىلىگىنە بولەنگەن بەكبولات قانايۇلى ماجىلىسكە قاتارىنان بىرنەشە رەت دەپۋتات بولدى. قازىر دە دەپۋتات. جەر داۋى، ءتىل ماسەلەسىندە ءۇنسىز قالعان ەمەس. بجعم-نىڭ بىلىققا تولى رەفورمالارىن سىناپ، شاماسى كەلسە، الىپپەنى مەكتەپ باعدارلاماسىنا قايتارۋ ماسەلەسىنە بەل شەشە كىرىسكەنىن بىلەمىز.

مۇنىڭ سىرتىندا بەكبولات تىلەۋحان مىرزا قر ۇلتتىق سپورت تۇرلەرى قاۋىمداستىعىن تىزگىندەپ وتىر. جىل سايىن وتەتىن «التىن تۇلپار» الامان بايگەسى دە بەكبولات قانايۇلىنىڭ باستاماسىمەن جۇزەگە اسىپ كەلەدى.

ايتپاقشى، بەكبولات مىرزا تۋرالى سوڭعى كەزدەرى الىپ-قاشپا اڭگىمەلەر كوپ ايتىلىپ ءجۇر. داستۇرىمىزگە جات، دۇمشە ءدىننىڭ (كەيبىر باق سالافيزممەن بايلانىسى بار دەپ ايىپتايدى) داعۋاتشىسى ەكەن دەگەندى دە ءجيى ەستيمىز. بەكبولات قانايۇلى بۇل تۋرالى ەفيرلەردەن سويلەپ، ءوزىنىڭ تۋرا جولدا ەكەنىن، ايتىلعانداردىڭ تەك وسەك ەكەنىن بىرنەشە مارتە ءمالىم ەتتى. بىراق، دەپۋتاتتىڭ ۋاجىنەن گورى، جۇرتتىڭ اۋزىنداعى ءسوز كۇشەيىپ بارادى.

مۇحامەدجان تازابەك سۇيىنشىلەگەن اقپارات

ءجا، اڭگىمە بەكبولات تىلەۋحاننىڭ «تۋرا جولىندا» ەمەس.

بەلگىلى ايتىسكەر، كەزىندە ەلدىڭ دە، ەرمانوۆتىڭ دا سۇيىكتىسى بولعان، ايتىستىڭ جاڭا ءسۇيىنبايى اتانعان مۇحامەدجان تازابەكوۆ. سۋرەتتى «ينستاگراممعا» سالعان وسى كىسى. «اسىل ارنانىڭ» ديرەكتورى، ءدىن ناسيحاتشىسى ت.ب. مۇحامەدجاننىڭ دا ءمازحابىنا قاتىستى مىڭ ءتۇرلى پىكىرلەر ايتىلىپ قالادى. اسىرەسە، سوڭعى ءبىر-ەكى كۇننىڭ ىشىندە «فەيسبۋكتە» «مۇحامەدجاندى اقتاۋ ناۋقانى» دەيتىن ناۋقان ءجۇرىپ جاتىر دەيدى جۇرت.

سول مۇحاڭ - مۇحامەدجان تازابەك بەكبولات پەن ءبىلالدىڭ بىرگە جۇرگەن سۋرەتىن جاريالادى.

(مۇحامەدجان تازابەكتىڭ "ينستاگراممدا جاريالاعان سۋرەتى")

ە، كەزدەسكەن شىعار. وندا نە تۇر؟! ءبىزدىڭ بەكبولات تىلەۋحاننىڭ دا، مۇحامەدجان تازابەكتىڭ دە جەكە باسىندا ەش شارۋامىز جوق. ءبىز ءبىلال ەردوعان تۋرالى ايتپاقپىز.

ءبىلال كىم؟ پرەزيدەنتتىڭ ۇلى جەمقور ما؟

تۇركيالىق باق رەجەپ تايىپ ەردوعان مەن ونىڭ ۇلى ءبىلال ەردوعان تۋرالى ءجيى جازادى. اسىرەسە، ءبىلال ەردوعاننىڭ ەسىم-سويى 2013 جىلعى جەمقورلىق رەيدى كەزىندە ءجيى اتالدى.

ول كەزدە پرەمەر، قازىر تۇركيانىڭ پرەزيدەنتى تايىپ ەردوعان: «ۇلكەن پارا» وپەراتسياسىنىڭ نەگىزگى نىسانى – مەنمىن»، - دەگەن ەدى. (http://www.panarmenian.net/rus/news/174445/ ).

(اكەلى-بالالى ەردوعاندار)

2013 جىلى انكارا مەن ىستامبۇلدا جۇرگىزىلگەن وپەراتسيا كەزىندە مينيسترلەر مەن ۇلكەن لاۋازىمدى شەنەۋنىكتەردىڭ بالالارى باستاعان 52 ادام تۇتقىندالعان. ونىڭ ىشىندە ءبىلال دا بار ەدى. كەيىن اكەسى ەردوعان انتيكوررۋپتسيالىق وپەراتسيانى جۇرگىزگەن 350 پوليتسەيدى قىزمەتىنەن قۋىپ جىبەردى.

ءتىپتى، تۇركيالىق باق-تا اكەلى-بالالى ەردوعانداردىڭ تەلەفون ارقىلى سويلەسكەن جازباسى جاريا بولدى. وندا تايىپ ەردوعان بىلالعا نۇسقاۋ بەرىپ، ۇيىندە تۇرعان 30 ميلليون ەۋرونىڭ كوزىن جويۋدى، انتيكوررۋپتسيالىق وپەراتسيانىڭ باستالعانىن جانە بىرنەشە ءمينيستردىڭ بالالارىنىڭ تۇتقىندالعانىن شۇعىل جەتكىزەدى (https://lenta.ru/news/2014/04/10/erdogan/).

ء(بىلال مەن رەجەپ تايىپ ەردوعاننىڭ تەلەفون ارقىلى سويلەسكەنى دە جاريا بولدى)

يتاليا پروۋكراتۋراسى ءبىلال ەدوعانعا قاتىستى قىلمىستىق ءىس قوزعاعان

بريتانيالىق «The Telegraph» اقپاراتىنا كوز جۇگىرتسەك، يتاليانىڭ بولونيا پروكۋراتۋراسى ءبىلال ەردوعاننىڭ ۇستىنەن قىلمىستىق ءىس قوزعاپ، ۇرلىقى اقشانى جۋىپ-شايدى دەگەن ايىپ تاققان بولاتىن (https://utro.ru/articles/2016/02/18/1271585.shtml).

2015 جىلى ەردوعان وتباسىمەن بولونياعا بارىپتى. بالاسى ءبىلال «جون حوپكينس» ۋنيۆەرسيتەتىندە حالىقارالىق قاتىناستار بويىنشا جوعارعى ديسسەرتاتسيا قورعاپ،  دارەجە الماققا كەلگەن ەكەن. ال «ريا نوۆوستي» (https://ria.ru/world/20160218/1376817257.html) مەن «كپ.رۋ» (https://www.kp.ru/daily/26495.4/3364035/)  ەردوعاننىڭ يتالياعا ساپارىن بولەك باعالاپتى. رەسەيىك باق-تىڭ جازۋىنشا، اقشانى زاڭداستىرۋ پروتسەسسىن ءدال وسى قالادا جۇزەگە اسىرعان. سونداي-اق، الدا-جالدا قۋعىندالىپ كەتەردەي بولىپ جاتسا، باس ساۋعالاۋ ءۇشىن ساياسي باسپانا ىزدەپ كەلگەن-ءمىس.

ءبىلال ەردوعان دايش-تىڭ مۇناي ءمينيسترى مە؟

بەيرەسمي ورتادا ءام شەتەلدىك باق-تا ءبىلالدى دايش-تىڭ «مۇناي ءمينيسترى» دەپ اتايدى. دايش قازاقستاندا جانە كوپتەگەن مەملەكەتتە تىيىم سالىنعان راديكالدى، ءدىني ءام تەرروريستىك قوزعالىس.

ء(بىلال ەردوعاننىڭ دايش سودىرلارىمەن تۇسكەن سۋرەتى. تۆيتتەر.)

 

ال پرەزيدەنت ەردوعاننىڭ «پاراقور» ۇلى دايش سودىرلارىمەن سۋرەتكە ءتۇسىپ، ونى اشىق جاريالادى. سيريانىڭ جارتى بولىگىن باسىپ العان سودىرلاردىڭ ۇرلىقى مۇنايىن تۇركيا بيلىگى ساتىپ الىپ وتىر دەگەن اقپارات 2015 جىلى پايدا بولعان.

ءبىلال ەردوعاننىڭ يەلىگىندە «BMZ» دەيتىن حالىقارالىق ترانسپورتتىق فيرما بار. مىنە، ءدال وسى فيرما، دايش مۇنايىن شەتەلگە تاسىمالداۋمەن تىكەلەي اينالىسادى ەكەن. بۇل تۋرالى سيريانىڭ اقپارات ءمينيسترى ومران ءاز-زاۋبي ايتتى (https://www.caravan.kz/news/handelsblatt-syna-ehrdogana-nazyvayut-quotneftyanym-ministrom-daishquot-360211/).

ول ول ما، ءبىلالدىڭ اپكەسى سۋمايا حانىم سيريا شەكاراسى ماڭىندا گوسپيتالعا قوجالىق ەتەدى ەكەن. بۇل دايش سودىرلارىن ەمدەيتىن ورىن دەيدى باق(http://inosmi.ru/politic/20151207/234711171.html).

تۇركيا پرەزيدەنتى رەجەپ تايىپ ەردوعان بولسا، بۇل اقپاراتتاردى تەرىسكە شىعارىپ، ەگەر دەرەك دالەلدەنىپ جاتسا، وتستاۆكاعا كەتۋگە ءازىر ەكەندىگىن جەتكىزدى.

نە كەرەك، تۇرىك، ورىس، نەمىس، بريتان جانە يتاليان باسىلىمدارى پرەزيدەنتتىڭ ۇلىن «پاراقور»، «دايش مۇنايىنىڭ ءمينيسترى» دەپ اتادى.

رەسەي مەن تۇركيا قارىم-قاتىناسى

رەسەي مەن تۇركيا اراسىنداعى ۇشاق داۋىنان كەيىن ەكى ەلدىڭ باسپاسوزىندە اقپاراتتىق سوعىس قارقىن الدى. رەسەي ۇشاعىن اتىپ تۇسىرگەن تۇركيا قارۋلى كۇشتەرى ەدى. تۇركيا پرەمەر-ءمينيسترى  احمەت داۋىتۇلى ءسوز سويلەپ، اۋە شەكاراسىن بۇزىپ كىرگەن رەسەي ۇشاعىن اتۋداعى باستى سەبەپ، سيريانىڭ شىعىسىنداعى تۇركىمەن اۋىلىن قورعاۋ بولعاندىعىن رەسمي مالىمدەگەن ەدى.

وسىدان كەيىن رەسەيلىك اقپارات قۇرالدارى زەرتتەۋ جاساپ، ءبىلالدىڭ تەرروريستەرمەن بايلانىسى تۋرالى اقپاراتتاردى جاريا ەتتى.

سونىمەن، ۇققانىمىز – ءبىلال ەردوعاننىڭ تەڭىز جولىمەن دە دايش مۇنايىن تاسىمالداپ وتىرعانى بەلگىلى بولدى. ءبىلالدىڭ قوجالىعىندا ليۆانداعى بەيرۋت پەن تۇركياداعى جەيحان پورتىندا جەكە تۇراق بار. سول ارقىلى تەڭىزدە تانكەرلەر ارقىلى مۇناي تاسىمالداپ وتىر دەگەن اقپاراتتى «ۆەستي» تاراتتى (http://www.vesti.ru/doc.html?id=2691179#/video/https%3A%2F%2Fplayer.vgtrk.com%2Fiframe%2Fvideo%2Fid%2F1453249%2Fstart_zoom%2Ftrue%2FshowZoomBtn%2Ffalse%2Fsid%2Fvesti%2FisPlay%2Ftrue%2F%3Facc_video_id%3D663649).

ءبىلالدىڭ سودىرلارمەن بايلانىسى تۋرالى اقپارات كەڭ تاراعان سوڭ، ەكى تاراپ كەلىسىمگە كەلگەن بولۋى ابدەن مۇمكىن دەگەن بولجام دا بار.

ءبىلال مەن بەكبولاتتىڭ دوستىعى

ءسويتىپ، مۇحامەدجان تازابەك جاريالاعان سۋرەتتەن نە ۇقتىق؟ ءبىلال ەردوعان ارنايى شاقىرتۋمەن كەلگەن. 15-تامىز كۇنى. شاقىرعان – قازاقستان ۇلتتىق سپورت تۇرلەرى قاۋىمداستىعى ەكەن. ەلورداداعى «جامبى اتۋدان» حالىقارالىق تۋرنيرگە كەلىپتى. مۇحامەدجان مىرزا سولاي دەپ جازدى.

(مۇحامەدجان تازابەكتىڭ "ينستاگراممداعى جازباسى")

قازاقستان پارلامەنتى ءماجىلىسىنىڭ دەپۋتاتى بەكبولات تىلەۋحان مەن ءبىلال ەردوعاننىڭ كەزدەسۋى قانشالىقتى دۇرىس؟ نەمەسە مۇحامەدجان تازابەكتىڭ بۇل سۋرەتتى جاريالاۋىنا نە سەبەپ بولدى؟ بۇنداي سۇراق قويۋىمىزدىڭ سەبەبى: ءبىلالدىڭ بيوگرافياسى كىسى قىزىعارلىق ەمەس ەكەنى انىق.

تۇركيا پرەزيدەنتىنىڭ ۇلى ءبىلال دە ۇلتتىق سپورت فەدەراتسياسىنا باسشىلىق ەتەتىنىن ەسكەرسەك، ەكەۋارا اڭگىمە ءدال وسى باعىتتا ءوربۋى مۇمكىن.

ءبىلال بايدىڭ بالاسى، باي بالا. اقشاسى كوپ. بالكىم، بەكبولات قانايۇلى «سيريا مۇنايىنىڭ» اقشاسىنان سپونسورلىق سۇراعان بولار...

ارينە، ۇلتتىق سپورتقا ينۆەستيتسيا تارتۋ قۇپتارلىق قارەكەت.  بالكىم، بەكبولات قانايۇلى ءبىلالدىڭ سودىرلارمەن بايلانىسى تۋرالى بىلمەۋى مۇمكىن. بەك قۇرمەتتى بەكەڭنىڭ «مەنەدجەرلەرى» ءبىلالدىڭ رەسمي، بەيرەسمي ومىرىنە اناليز جاساماۋى دا ىقتيمال. جوعارىدا ايتقانىمىزداي، دەپۋتات بەكبولات تىلەۋحانعا وشتتىگىمىز جوق. قۇرمەتتەيمىز، سىيلايمىز. بىزدىكى ەسكەرتۋ عانا.

نۇرگەلدى ابدىعانيۇلى

Abai.kz

28 پىكىر

ۇزدىك ماتەريالدار