سارسەنبى, 28 قىركۇيەك 2022
جاڭالىقتار 6811 3 پىكىر 21 تامىز, 2017 ساعات 07:27

رەكتورلاردان «كوشى-قون تۋرالى» زاڭىنىڭ 33-بابىن قاتاڭ اتقارۋىن تالاپ ەتەمىز

«نۇر وتان» پارتياسىنا

 

قر ىشكى ىستەر ءمينيسترى،

پوليتسيا گەنەرال-لەيتەنانتى

ق. ن. قاسىموۆقا

 

قر ءبىلىم جانە عىلىم ءمينيسترى

ە.ك. ساعاديەۆكە

 

رەسپۋبليكاداعى جوو-نىڭ

رەكتورلارىنا

 

قۇرمەتتى «نۇر وتان» پارتياسى!

قۇرمەتتى قالمۇحانبەت نۇرمۇحانبەتۇلى!

قۇرمەتتى ەرلان كەنجەعاليۇلى!

قۇرمەتتى جوو-نىڭ رەكتورلارى!

ءسوزدى الدىمەن «نۇر وتان» پارتياسىنا، پارتيا توراعاسىنىڭ ءبىرىنشى ورىنباسارى مۇحتار ابرارۇلىنا راحمەت ايتۋدان باستاعاندى ءجون كوردىك.

وسىنىڭ الدىندا عانا «Abai.kz» اقپاراتتىق پورتالى ارقىلى «نۇر وتان» پارتياسى توراعاسىنىڭ ءبىرىنشى ورىنباسارى مۇحتار ابرارۇلىنىڭ اتىنا "وتانداس-ەل" وتانىمەن بىرگە!" (http://abai.kz/post/57467) دەگەن تاقىرىپتا حات جازىپ، كەزىندە جانە ۇستىمىزدەگى جىلى شەتەلدەن كوشىپ كەلىپ، الماتى وبلىسىنا قونىستانعان، اۋىلداردا بوس جەر تەلىمدەرى بولماعاندىقتان، شارۋاشىلىق قۇرۋعا، جۇمىس تابۋعا مۇمكىندىگى شەكتەلگەن، سول ءۇشىن  كوشىپ كەلۋشىلەر مەن قونىس اۋدارۋشىلاردى قونىستاندىرۋ ءۇشىن ۇكىمەت ايقىنداعان وڭىرلەرگە كوشىپ بارۋعا نيەت بىلدىرگەن 58 وتباسىنىڭ ءتىزىمىن ۇسىنعانبىز.

اتالعان حاتقا توراعانىڭ ءبىرىنشى ورىنباسارى نازار اۋدارىپ، تاپسىرما بەرسە كەرەك، الماتى وبلىسى، ەڭبەكشىقازاق اۋداندىق «نۇر وتان» پارتياسى توراعاسىنىڭ ءبىرىنشى ورىنباسارى قۋات بايعوجاەۆ مىرزا  «وتانداس-ەل» رقب-نىڭ باسشىلارىن شاقىرىپ، كەزدەسۋ وتكىزدى. سولتۇستىككە كوشۋگە نيەت بىلدىرگەن وتباسىلاردىڭ ءتىزىمىن الىپ، انىقتاۋعا كىرىستى. 2017 جىلعى 29 تامىز كۇنى سولتۇستىك قازاقستان، قوستاناي، پاۆلودار وبلىستارىنىڭ جۇمىسپەن قامتۋدى جانە الەۋمەتتىك باعدارلامالاردى ۇيلەستىرۋ باسقارمالارىنىڭ وكىلدەرى ەڭبەكشىقازاق اۋدانىنا كەلىپ، العاشقى كوشتى باستايتىن بولىپ كەلىستىك. اتالعان كوش الداعى كۇندەردە قۇتتى قونىسىنا ساتىمەن اتتانادى، قونىستانادى دەگەن بەرىك سەنىمدەمىز.

ۇسىنىسىمىزدىڭ ەلەنىپ-ەسكەرىلگەنىنە راحمەت ايتىپ، پارتيا باسشىلىعىنا قانداستارىمىزدىڭ جۇرەكجاردى قۋانىشى مەن ىستىق سالەمىن جەتكىزگىمىز كەلەدى!

ەندى كەلەسى ۇسىنىسىمىزدى ورتاعا سالايىق.

قازاق ۇكىمەتىنىڭ شەت ەلدەردە تۇراتىن ەتنيكالىق قازاق جاستارىنىڭ اتاجۇرتقا ورالىپ، ءبىلىم الۋىنا جاساعان قامقورلىعى ۇشان تەڭىز!

قازاقستان رەسپۋبليكاسىنىڭ 2007 جىلعى 27 شىلدەدەگى №319  «ءبىلىم تۋرالى» زاڭىنىڭ 66-بابىندا «شەت ەلدەگى قازاق دياسپوراسىنىڭ ءبىلىم الۋ قاجەتتىلىكتەرىن قاناعاتتاندىرۋ» ماسەلەسى تولىق شەشىلگەن.

2012 جىلعى 28 اقپاننان بەرى قازاقستان رەسپۋبليكاسى ۇكىمەتىنىڭ №264 قاۋلىسىنا ساي، قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامدار ءۇشىن – 2 پايىز وقۋعا ءتۇسۋ كەزىندە قابىلداۋ كۆوتاسى ءبولىنىپ كەلدى. ەلباسىمىزدىڭ تىكەلەي تاپسىرماسىمەن بيىلدان باستاپ بۇل كورسەتكىش ەكى ەسەگە كوبەيتىلدى.

ارىسىن ايتپاعاندا، بيىلدىڭ وزىندە 16 ماماندىق بويىنشا 514 شەتەلدەن ورالعان قانداس ۇل-قىزىمىز مەملەكەتتىك گرانتقا قول جەتكىزىپ، جوو-نىڭ ستۋدەنتى اتاندى.

مۇنىڭ ءبارى ەلباسىمىز نۇرسۇلتان نازارباەۆتىڭ الىستا جۇرگەن اعايىنعا، ونىڭ جاستارىنىڭ بولاشاعى ءۇشىن جاسالعان ۇلى ەڭبەكتەرى، باعا جەتپەس قامقورلىعى دەپ بىلەمىز!

مەملەكەتتىك گرانتپەن وقۋعا قابىلدانعان وسى ستۋدەنتتەردىڭ ءوزى تۇسكەن جوو-نىڭ جاتاقحاناسىنا الىمەن ۋاقىتشا, ارى قاراي تۇراقتى تىركەۋگە تۇرىپ، وقۋىن بىتىرگەنشە جەڭىلدەتىلگەن تارتىپپەن قازاقستان رەسپۋبليكاسىنىڭ ازاماتتىعىن الۋعا قۇقىعى بار.

بۇل تۋرالى «حالىقتىڭ كوشى-قونى تۋرالى» قازاقستان رەسپۋبليكاسىنىڭ 2011 جىلعى 22 شىلدەدەگى №477-IV زاڭىنىڭ «ءبىلىم الۋ ماقساتىندا كەلەتىن كوشىپ كەلۋشىلەردىڭ نەگىزگى قۇقىقتارى مەن مىندەتتەرى» دەگەن 33-بابىندا اشىق جازىلعان (زاڭنىڭ اتالعان بابى قوسىمشا بەرىلدى). 

ەلباسىنىڭ قولى قويىلعان زاڭنىڭ ءار تارماعى قاتاڭ، مۇلتىكسىز اتقارىلۋى كەرەك قوي! وكىنىشكە وراي، جوعارى وقۋ ورىندارىنىڭ باسشىلارى ورالمان ستۋدەنتتەردىڭ وسى قۇقىعىن شەكتەپ، ولاردىڭ قازاقستان رەسپۋبليكاسىنىڭ ازاماتتىعىنا قابىلداۋ تۋرالى ءوتىنىشحات بەرۋىنە مۇمكىندىك بەرمەي كەلەدى. قانداس ستۋدەنتتەر تۇراقتى تىركەۋگە تۇرۋ ءۇشىن باسقا جەردەن پاتەر جالداۋعا ءماجبۇر.

ال، باسقا جەردەن پاتەر تاۋىپ، تۇراقتى تىركەۋگە تۇرىپ، ازاماتتىققا قۇجات وتكىزگەن ستۋدەنت سول پاتەردە تۇرۋى شارت. تۇرماسا، «قر اكىمشىلىك قۇقىق بۇزۋشىلىق تۋرالى» زاڭنامانى بۇزعان بولىپ ەسەپتەلىپ، جاۋاپقا تارتىلادى.

اتالعان زاڭدى اتقارۋ – ورالمان جاستاردىڭ تۇراقتى تىركەۋگە تۇرىپ ازاماتتىق الۋ ماسەلەسىن شەشىپ قانا قويماي، ولاردىڭ ۇكىمەتتىڭ جاساپ جاتقان قامقورلىعى مەن كومەگىن ءتىپتى دە تەرەڭ تۇسىنۋىنە، وتانشىلدىق رۋحىن اسقاقتاتا تۇسۋدە دە ەرەكشە رول اتقارارى حاق!

سول ءۇشىن سىزدەردەن بيىلدان باستاپ بارلىق جوعارى وقۋ ورىندارىنىڭ باسشىلارىنا «حالىقتىڭ كوشى-قونى تۋرالى» زاڭىنىڭ 33-بابىن قاتاڭ اتقارۋدى جانە ونى شەتتەن كەلگەن ۇلتى قازاق ستۋدەنتتەرگە ءتۇسىندىرۋ جۇمىسىن ءوز دەڭگەيىندە الىپ بارۋدى تاپسىرۋلارىڭىزدى سۇرايمىز.

 «وتانداس-ەل» رەسپۋبيليكالىق قوعامدىق بىرلەستىگى

قوسىمشا:

«حالىقتىڭ كوشى-قونى تۋرالى» قازاقستان رەسپۋبليكاسىنىڭ 2011 جىلعى 22 شىلدەدەگى №477-IV زاڭى

 33-باپ. ءبىلىم الۋ ماقساتىندا كەلەتىن كوشىپ كەلۋشىلەردىڭ نەگىزگى قۇقىقتارى مەن مىندەتتەرى

1. شەتەلدىكتەردىڭ نەمەسە ازاماتتىعى جوق ادامداردىڭ مەملەكەتتىك ءبىلىم بەرۋ تاپسىرىسىنا سايكەس كونكۋرستىق نەگىزدە تەحنيكالىق جانە كاسىپتىك، ورتادان كەيىنگى، جوعارى جانە جوعارى وقۋ ورنىنان كەيىنگى تەگىن ءبىلىم الۋ قۇقىعى قازاقستان رەسپۋبليكاسى راتيفيكاتسيالاعان حالىقارالىق شارتتاردا ايقىندالادى.

قازاقستان رەسپۋبليكاسىنا ءبىلىم الۋ ماقساتىمەن كەلگەن ەتنيكالىق قازاقتار وقۋعا تۇسكەننەن كەيىن:

1) تەحنيكالىق جانە كاسىپتىك، ورتا بىلىمنەن كەيىنگى، جوعارى جانە جوعارى وقۋ ورنىنان كەيىنگى ءبىلىم بەرۋ مەكەمەلەرىنىڭ جاتاقحانالارىندا ۋاقىتشا تىركەلۋگە;

2) تۇراقتى تۇرۋعا جانە جەڭىلدەتىلگەن تارتىپپەن (تىركەۋ تارتىبىمەن) قازاقستان رەسپۋبليكاسىنىڭ ازاماتتىعىنا قابىلداۋ تۋرالى ءوتىنىشحات بەرۋگە قۇقىعى بار.

2. ءبىلىم الۋ ماقساتىندا كەلەتىن كوشىپ كەلۋشىلەر:

1) قازاقستان رەسپۋبليكاسىنىڭ اۋماعىندا بولاتىن كوشىپ كەلۋشىلەرگە قاتىستى قازاقستان رەسپۋبليكاسىنىڭ زاڭدارىندا كوزدەلگەن مىندەتتەردى اتقارادى;

2) وقۋدىڭ جانە (نەمەسە) كاسىپتىك دايارلىقتىڭ تولىق كۋرسىن اياقتاعاننان كەيىن، ەگەر ودان ءارى بولۋ ءۇشىن زاڭدى نەگىزدەرى بولماسا، قازاقستان رەسپۋبليكاسىنان كەتىپ قالۋعا مىندەتتى.

قازاقستان رەسپۋبليكاسىنىڭ پرەزيدەنتى                ن. نازارباەۆ

http://adilet.zan.kz/kaz/docs/Z1100000477  

 

 Abai.kz

 

3 پىكىر