بۇگىن تالدىقورعان قالاسىندا تۇرعىن ءۇي كەزەگىندە تۇرعاندار مەن «تۇرعىنۇيجيناقبانكى» اق-نىڭ سالىمشىلارىنا جاڭا كوپقاباتتى ۇيلەردىڭ 168 پاتەرى بەرىلدى. مەملەكەتتىك «نۇرلى جول» باعدارلاماسىمەن سالىنعان نەسيەلىك تۇرعىن ۇيلەردىڭ كىلتىن وبلىس اكىمى اماندىق باتالوۆ پەن «قازاقستاننىڭ تۇرعىنۇيجيناقبانكى» اق باسقارما ءتورايىمى ءلاززات يبراگيموۆا تابىستادى.

قونىس يەلەرىن قۇتتىقتاعان وبلىس اكىمى ا. باتالوۆ تالدىقورعان قالاسىن دامىتۋدىڭ جوسپارىنا، سونىڭ ىشىندە 7-شاعىن اۋداندا سالىناتىن قۇرىلىس نىساندارىنا قىسقاشا توقتالىپ، جاڭا باسپانالارىنا قۇتتى بولسىن ايتتى.

- حالىقتى تۇرعىن ۇيمەن قامتاماسىز ەتۋ تۋرالى ەلباسىنىڭ تاپسىرماسىنا سايكەس وبلىستا اۋقىمدى جۇمىستار اتقارىلىپ جاتىر. تالدىقورعان قالاسى دا كۇننەن كۇنگە كوركەيىپ كەلەدى. سونىڭ ءبىر ايعاعى – بۇگىن جاڭا پاتەرلەرگە قول جەتكىزىپ وتىرسىزدار. وبلىس ورتالىعىنداعى جاڭا باسپانالارىڭىز قۇتتى بولسىن. شاڭىراقتارىڭىز شاتتىق پەن قۋانىشقا، وتباسىلارىڭىز باقىت پەن ىرىسقا تولسىن! – دەدى ا. باتالوۆ. «قازاقستاننىڭ تۇرعىنۇيجيناقبانكى» اق باسقارما ءتورايىمى ءلاززات يبراگيموۆا دا كوپشىلىككە ىزگى تىلەگىن جەتكىزىپ، قۋانىشتارىنا ورتاقتاستى. جاڭا قونىس يەلەرى دە وڭدى مەملەكەتتىك ساياساتتىڭ ناتيجەسىندە باسپانالى بولۋ باقىتىنا يە بولىپ وتىرعاندارىن ايتىپ، پرەزيدەنتتىڭ اتىنا ريزاشىلىقتارىن جەتكىزدى.

كىلت تاپسىرۋ سالتاناتىنىڭ الدىندا  وبلىس اكىمى ا. باتالوۆ پەن «قازاقستاننىڭ تۇرعىنۇيجيناقبانكى» اق باسقارما ءتورايىمى ءلاززات يبراگيموۆا جەكە تۇرعىن ءۇي قۇرىلىسىن دامىتۋ تۋرالى ءوزارا ىنتىماقتاستىق مەموراندۋمىنا قول قويدى.

ل. يبراگيموۆانىڭ ايتۋىنشا، «نۇرلى جەر» باعدارلاماسى شەڭبەرىندە قوس تاراپ كەلىسىمى بويىنشا جىل سوڭىنا دەيىن تالدىقورعاندا بانكتىڭ قاتىسۋىمەن كوتتەدجدى قالاشىقتا 48 جەر ءۇي سالىنىپ، پايدالانۋعا بەرىلەدى دەپ جوسپارلانىپ وتىر. ال مۇنان كەيىنگى ەكى جىل ىشىندە وسىنداي جەكە تۇرعىن ۇيلەر سانىن 600-گە جەتكىزۋ مەجەلەنگەن.

«نۇرلى جەر» باعدارلاماسى نەگىزىندە جەكە تۇرعىن ۇيلەر سالىناتىن جەر الاڭدارىنىڭ ينجەنەرلىك ينفراقۇرىلىمىن جاساۋعا تولىق قولداۋ كورسەتەمىز. ەڭ باستىسى ونىڭ ناتيجەسىن حالىق كورەدى»، - دەدى اماندىق عابباسۇلى.

اتالمىش بانكتىڭ الماتى وبلىسىندا 43 مىڭنان استام سالىمشىسى بار، ياعني وبلىس رەسپۋبليكا كولەمىندە سالىمشىلارىنىڭ سانى جاعىنان الدىڭعى قاتاردا. بۇل - الماتى وبلىسىنىڭ ورتالىق قالاسىندا عانا ەمەس، قاسكەلەڭ، تالعار سياقتى شاعىن قالالارىندا دا ينفراقۇرىلىمنىڭ جاقسى دامىعانىنىڭ ناتيجەسى. «تۇرعىنۇيجيناقبانكى» اق وڭىرلەردى دامىتۋدىڭ 2020 جىلعا دەيىنگى باعدارلاماسى شەڭبەرىندە وبلىستا 74,1 مىڭ شارشى مەتر تۇرعىن ءۇي سالعان. سونىڭ ىشىندە «تۇرعىنداردىڭ بارلىق ساناتىنا ارنالعان تۇرعىن ءۇي» باعىتى بويىنشا 41,1 مىڭ شارشى مەترلىك 12 ءۇي نەمەسە 609 پاتەر سالىنسا، «جاس وتباسىلارعا ارنالعان تۇرعىن ءۇي» باعىتى بويىنشا 33 مىڭ شارشى مەترلىك 7 ءۇي نەمەسە 593 پاتەردى پايدالانۋعا بەرىلگەن. جالپى 2017 جىلى 6 ءۇي سالۋ جوسپارلانسا، سونىڭ 4-ەۋى تالدىقورعاندا بولماق.

Abai.kz