ەقىۇ: باقىلاۋشىلار دونباستان رەسەي اسكەرىن كوردى
دونباستاعى ەۋروپاداعى قاۋىپسىزدىك جانە ىنتىماقتاستىق ۇيىمى (ەقىۇ) مونيتورينگ ميسسياسى باسشىسىنىڭ ءبىرىنشى ورىنباسارى الەكساندر حۋگ باقىلاۋشىلار ۋكراينانىڭ شىعىسىندا رەسەي ارمياسىن كورگەنىن، ولار اڭگىمەلەسۋ كەزىندە وزدەرىن رەسەيلىك ساربازدارمىز دەپ تانىستىرعانى جونىندە مالىمدەدى.
ول سونىمەن بىرگە باقىلاۋشىلاردىڭ ۋكراينانىڭ شىعىسىنداعى جانجال ايماعىندا رەسەيلىك قارۋ-جاراقتى بايقاعاندارىن دا ايتتى. "شەشىم شىعارۋ ءبىزدىڭ قۇزىرىمىزدا ەمەس، ءبىز تەك كورگەندەرىمىزدى ايتامىز", – دەپ اتاپ ءوتتى حۋگ.
كيەۆ پەن باتىس ەلدەرى كرەملدى دونباستاعى سەپاراتيستەرگە قولداۋ كورسەتىپ وتىر دەپ ايىپتايدى. ۋكراينانىڭ قارۋلى كۇشى باس شتابىنىڭ مالىمەتى بويىنشا، وزدەرىن وزدەرى جاريالاعان "حالىقتىق رەسپۋبليكالار" جاعىندا 40 مىڭعا جۋىق سارباز سوعىسىپ ءجۇر. ونىڭ ىشىندە 5 مىڭنان استام رەسەيلىك اسكەر بار. بىراق ماسكەۋ مۇنى جوققا شىعارىپ كەلەدى.
Abai.kz
