جەكسەنبى, 14 ءساۋىر 2024
مىنە، اڭگىمە! 4851 3 پىكىر 5 تامىز, 2017 ساعات 09:45

«ەكسپو-2017»: 2 ميلليونىنشى، قوناق، قوش كەلدىڭ!

الەمنىڭ 115 مەملەكەتى قاتىسىپ جاتقان «ەكسپو-2017» حالىقارالىق كورمەسىن تاماشالاۋعا كەلگەن 2 ميلليونىنشى قوناققا قۇرمەت كورەتىلدى، - دەپ حابارلايدى اباي-اقپارات.كەشە كەشكى ساعات 20:21-دە ەكسپو-نىڭ ءتورت وتكىزۋ بەكەتىنە ورناتىلعان بەينەباقىلاۋ كامەرالارى مەن ەسەپتەۋىشتەرى 2 ميلليونىنشى كەلۋشىنى تىركەگەن. ول – ورال قالاسىنىڭ تۇرعىنى، وندىرىستىك سالا قىزمەتكەرى عايسا جۇماليەۆ.

ول ءوزىن كورمەنىڭ 2 ميلليونىنشى قوناعى بولامىن دەپ كۇتپەگەن.

«مەن وتە قۋانىشتىمىن. بارلىعى اياق استىنان بولدى. بيلەتتى جاڭا «مەگادان» كەشكى جەڭىلدىكپەن 2000 تەڭگەگە ساتىپ الدىم. چەحيا پاۆيلونىن ارالاپ ۇلگەردىم. Shell پاۆيلونىن ارالاعالى جاتقانمىن. بىراق مەنى «ەكسپو-2017» ءباسپاسوز ورتالىعىنا جۋرناليستەرمەن كەزدەسۋگە الىپ كەلدى. مەن مۇندايدى كۇتكەن جوقپىن. ورالدا تۇرامىن. ەگىز بالام بار»، - دەدى عايسا جۇماليەۆ.

«ەكسپو-2017» مەديا-ورتالىعىندا «استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ 2 ميلليونىنشى قوناقتى ءوزى قۇتتىقتادى. ول عايسا جۇماليەۆكە باعالى سىيلىقتاردى تابىستادى.

«بۇگىن «استانا ەكسپو-2017» ۇلتتىق كومپانياسى ءۇشىن ايتۋلى كۇن. الدىمىزعا قويعان مەجە 2 ميلليون بولاتىن. سول ماقسات بۇگىن ورىندالدى. عايسا «ەكسپو-2017» كورمەسىنىڭ 2 ميلليونىنشى قوناعى اتاندى. «ەكسپو-2017» كورمەسىنىڭ اياقتالۋىنا ءالى دە ءبىر اي ۋاقىت بار. ەلباسىنىڭ جوباسى ويداعىداي جۇزەگە اسۋدا»، - دەپ تۇيىندەدى ءسوزىن توراعا.

سونداي-اق، «استانا EXPO – 2017» ۇق» اق باسقارما توراعاسى احمەتجان ەسىموۆ ەلباسىنىڭ جوباسى وي­داعىداي جۇزەگە اسىپ جاتقانىن ايتتى.

«كورمە باستالعان ساتتەن باس­تاپ، استانادا تۇرعىن ءۇي الۋ 33 پايىزعا، ساۋدا اينالىمى 20 پايىز­عا، ال ساۋدا ويىن-ساۋىق ورتالىعى­نا كىرىپ-شىعۋ كورسەتكىشى ەكى ەسەگە وسكەن. استانادا ماۋسىم ايىنىڭ وزىندە قىزمەت كورسەتۋ سالاسىنداعى سالىق 2,5 ەسەگە ارتتى. بۇل – داع­دارىس كەزىندەگى ەكونوميكانىڭ جاندانۋى. ءبىز قازىر جولدىڭ ۇشتەن ەكى بولىگىن ءجۇرىپ وتتىك. جوعارىدا ءتىزىپ شىققان تابىستارىمىزدى ەسەپكە الساق، ەلباسىنىڭ كورمە ءوت­كىزۋ تۋرالى كورەگەن شەشىم قا­بىل­داعانىن تۇسىنەمىز»،  – دەدى توراعا.

ەستەرىڭىزدە بولسا، استانادا ءوتىپ جاتقان "ەكسپو-2017" حالىقارالىق مامانداندىرىلعان كورمەسىنە 2 ملن ادام كەلەدى دەپ جوسپارلانعان بولاتىن.

استانا – ارماندار ورىندالاتىن قالا.  سوندىقتان EXPO-2017 ەۋرازيا تورىندە. «EXPO-2017» كورمەسى – تەك استانا ءۇشىن عانا ەمەس، بۇكىل ەلىمىز ءۇشىن ەكونوميكالىق دامۋدىڭ جاڭا قادامى بولادى» دەگەن ەلباسىمىزدىڭ ءسوزى سانامىزدا سەنىمنىڭ شوعىن مازداتىپ، كەلەشەككە باعىت العان ۇكىلى ءۇمىتىمىزدى ەسەلەي تۇسەتىندەي.

Abai.kz

3 پىكىر